سكريبت ❤
-مريم إياد فاق!!
فتحت عيني والنوم طار خالص... وأنا بقول بأمل :
-صحيح يا رضوي فاق... إياد فاق!
-اه والله فاق
بكيت من الفرحة وأنا بقولها:
-طيب طيب أنا جاية فورا...
قفلت التليفون بسرعة وقمت أخدت شاور ولبست هدومي بسرعة... إياد حبيبي فاق... بعد غيبوبة استمرت لست شهور.. أنا كنت خلاص بنهار من غيره بس اتمسكت بالأمل.... أنا وإياد اتجوزنا من سنة ونص... صحيح هو اغني من عيلتنا بكتير بس عمره ما حسسني بالفرق... كنت عايشة معاه أجمل أيام حياتي.... كنت حاسة إني طايرة ولأن السعادة مبتكملش إياد جوزي عمل حادثة كبيرة من ست شهور ودخل بسببها في غيبوبة... من وقتها وحياتي وقفت حرفيا... انهارت وبكيت وفضلت جمبه في المستشفي لأيام بس مفقدتش الأمل....
.......
أخيرا وصلت للمستشفي.. قلبي كان بيدق جامد... أخيرا... أخيرا هنرجع سوا.... أخيرا حبيبي فاق... في طريقي قابلت رضوي صاحبتي وممرضة في المستشفي... كانت الوحيدة اللي ساعدتني في ازمتي دي
ابتسمت رضوي وقالت :
-ما صدقتش لما الدكتور اللي بيشرف عليه قالي انه فاق... كان طالب يكلمك.
مشيت ناحية أوضة إياد وأنا بقاطعها وبقول :
-بعدين بعدين يا رضوي...
جريت علي أوضة إياد وقلبي طاير من الفرحة.. فتحت الباب واتصدمت باللي شوفته... إياد كان حاضن نورا بنت عمه وخطيبته السابقة.... ابتسامتي اختفت وحسيت قلبي انكسر..
بصلي إياد بحيرة وقال :
-انتي مين وازاي تدخلي كده!
اتصدمت وأنا ببصله... افتكرته بيهزر... ازاي مش عارفني... بس عيونه مكانتش بتهزر باين فعلا عليه الحيرة والتشتت... كنت لسه هرد لما اتكلمت نورا بخبث وقالت :
-دي مريم يا حبيبي تبقي الخدامة بتاعتي طلبت منها تجيبلي هدوم.
بصتلي نورا وقالت:
-جيبتي الهدوم يا بنت
بصتلها بذهول... حاسة إني بحلم... لا ده مش حلم ده كابوس مرعب.... قامت نورا من مكانها ومسكت أيدي وخرجتني برة وبعدين قفلت الباب وراها ولسه هتتكلم جه الدكتور وقال مدام مريم انتي وانسة نورا حابب اتكلم معاكم شوية...
.......
-فقدان ذاكرة جزئي؟!! يعني ايه مش فاهمة!
قولتها وأنا مصدومة رد الدكتور بهدوء:
-يعني يا مدام مريم جوزك لما عمل حادثة فقد ذاكرته بس مش بالكامل هو نسي بس الفترة اللي قابلك واتجوزك فيها.... هو آخر حاجة كان فاكرها أنه كان خاطب آنسة نورا.
دموعي نزلت وانا ببص لنورا اللي بتبص ليا بإنتصار.
بصيت للدكتور وإنا بمسح دموعي وبقول :
-أكيد في حل يا دكتور ابوس ايديك ساعدني ازاي نرجعه كويس زي الأول.
-للأسف يا مدام دي حاجة مش بإيدي ولا بإيد أي حد دي بإيد ربنا... ربنا إذا أراد ترجعله هترجعله ولو ما اردش مش هترجعله.
-طيب مش ممكن أنا افكره بذكرياتنا سوا.
بصتله نورا بخوف.. فرد الدكتور :
-لا اوعي تعملي كده... بالطريقة دي هتأذيه.. قولتلك دي حاجة بإيد ربنا.
مسحت دموعي وأنا بحس الدنيا بتدور بيا... حطيت ايدي علي وشي وقعدت ابكي... ابتسمت نورا وبصت للدكتور وغمزتله.
...........
-أنا مش هسيب جوزي.
زعقت مع نورا اللي ماسكة شنطة أياد وعايزة توديه بيتهم.
-جوزك مين يا حبيبتي فوق... إياد نسيكي... فأنسيه كمان ومتقلقيش هديكي مبلغ محترم...
كنت لسه ههزقها لقيت أياد خرج من اوضته بعد ما لبس هدومه... سندته نورا فابتسم وقال :
-يالا يا حبيبتي نخرج من المكان ده.
قلبي وجعني وأنا بشوف نظراته وكلامه ليها... النظرات والكلام ده من حقي مش من حق البومة دي... لا مش هسمحلها تسرقه مني... أخدت الشنطة بتاعة أياد وأنا بقول :
-عنك يا ست هانم ميصحش تشيلي الشنطة وخدامتك موجودة يالا نروح علي العربية لأحسن البيه شكلها تعبان...
ومشيت بسرعة قدامهم وانا مقررة إني هرجع جوزي منها مهما حصل... وهي قدمتلي فرصة إني أكون جمبه لما قالت إني الخدامة بتاعتها.
بصتلها نورا بحقد وقالت بصوت واطي :
-يارب تموتي وارتاح منك يا معدومة الكرامة.
....
بعد أسبوع.
كان الحال زي ما هو... مفيش أي إشارة أنه ناوي يفتكرني.... كنت بنضف الصالة لما سمعت حد بيزغرد... وقفت وانا قلبي بيدق بخوف لقيت نورا ماسكة أياد وأهلها بيباركولها... معقول اللي في بالي حصل... بصتلي نورا بخبث وقربت مني وقالت:
-مش هتقوليلي مبروك يا روما كتب كتابي أنا وإياد بكرة!!!
يتبع
#حبي_الوحيد
#سولييه_نصار
لو لقيت100 فوت هنزل الباقي النهاردة إن شاء الله ❤
