مشاعر حائره (مكتمله )

♥17/قصه حياتى♥

راقب حسين غمزه وهى تبتعد عنه مسافه كافيه حتى لايلمسها وكانها تعرف انها ستضعف ما ان يفعل ذلك وستجد نفسها فى احضانه كما يحدث كل مره

ولكن ما ستقوله الان ليس فيه شيئا من العاطفه بل هى ماساه بسببها رحلت امها للعالم الاخر ودمرت حياه غمزه السابقه والحاليه والقادمه ايضا

ولهذا تنهدت ووقفت فى شرفه مكتبه وتنظر الى الظلام فى الخارج فهو مناسب جدا لما ستقوله الان

قالت غمزه بصوت فاتر : الحكايه بدءت لما امى كلفتها شركتها اللى بتشتغل فيها مرشده سياحيه انها تسافر لتركيا

اولا : لانها تجيد اللغه كويس جدا

وثانيا لانها تعتبر من امهر المرشدات فى الشركه وفعلا سافرت مع الفوج على تركيا

ومره راحت هى والفوج السياحى علشان يتغذوا فى فى واحد من المطاعم المنتشره على الساحل......... فحصلت مشكله بين واحد من افراد الفوج مع جرسون من المطعم المهم نهايه الموضوع ظهر صاحب المطعم والمدير المسئول وحلوا المشكله وطبعا كان صاحب المطعم الفاخر كان كمال بيه الارندلى

و اللى وقع فى غرام الورده المصريه الجميله من النظره الاولى......... وحقيقى امى بدون مبالغه كانت ست جميله جدا فوق ما تتصور بدون مبالغه

قاطعها حسين بلطف حتى يخرجها من جو التوتر المحيط بها سائلا اياها : احلى منك يا غمزه؟؟؟؟؟؟؟

صاحت غمزه على الفور قائله بصدق : بمراحل عارف لما يجيوا يوصفوا ست فى القصص والاشعار ويقولوا تقف لها الجبال من شده حسنها امى كانت كده

ولانها غاليه وصعبه المنال اصبحت الهاجس لكمال بيه طاردها فى كل حته لاحقها فى كل مكان حتى انه خطفها تقريبا من فندقها علشان متسافرش مع الفوج على مصر وتسيب تركيا

وطبعا امى المسكينه لانها بريئه ومعندهاش اى تجربه سابقه ورمانسيه جدا افتكرت ان كل ده حب صحيح مجنون شويه بس حب وهى اول مره تحس بالشعور اللطيف ده.........

وفعلا وافقت على الجواز بيه ونزل فعلا معاها مصر وقابلوا جدتى وجدى اللى قبلوا بيه لان بنتهم قالت انها بتحبه جدا واتجوزها هنا فى مصر وبعدين سافرو على تركيا علطول

وبعد سنه اتولدت انا وطبعا فى نظر ابويا ان امى كده خلاص انشغلت عنه بالطفله الصغيره وما بقتش مهتمه به مع ان ده مش صحيح بس وقتها انا كنت بيبى ومحتاجه لامى زى اى طفل رضيع

وده طبعا دفعه انه يقيم علاقات محرمه مع الستات علشان يعوض اهمال مراته له وده لانها اهتمت بطفلته الرضيعه اكثر منه شويه........مع انها مكانتش مقصره فى حقه بس كمال الارندلى كان شخص امتلاكى يعشق الاهتمام الزايد والسيطره.........

ولانه علاقاته كانت مع ستات قذره تشبهه بلغوا امى بعلاقتهم به بمنتهى السفاله علشان يحرقوا دمها طبعا لانها كانت احلى وانظف منهم بمراحل.........