رواية :【« سوادي »】
بأنامل 🖋️ :【كابيطوسة المغربية】
بقات ساكتة لثواني اش غاتقوليه؟ هي اصلا ماعارفاش ماعندهاش ميول لشي حاجة محددة ولكن واش غاتقول ليه كانقرا باش فاللخر نولي ربة بيت؟ و لأول مرة فحياتها تحشم تقولها حيت عقلية خالها مغايرة على عقلية خال مها لي كانت قالت ليه بغيت نتزوج .. هاد المرة خافت يضحك عليها خالها يوسف ايلا قالت ليه هدفها هو تتزوج ولكن بلاتي علاش دابا خافت؟ و علاش فالأصل حشمات مدام هي حاطاه هدفها؟ واش زعما تكون بدات تستوعب بلي هداك ماشي هدف ساسو صحيح؟ ... بقات ساكتة شحال و مراقبة عيون خالها لي كاينتظر جوابها ... تفكرات الأفلام التركية و بالضبط مسلسل سامحيني من ديما كانت كاتعجبها شركة كوزان و كانت كاتتمنى تخدم حتى هي فيها .. يقدر يبان لكم حلم غبي و تافه ولكن بالنسبة لإنسانة هدفها غير الزواج ... لا.!
قاطعات انتظارو بجوابها
إيمان : [ بعفوية ] حلمي نخدم فشي شركة بحال الافلام
يوسف : فأشمن مجال بالضبط؟ ... المحاسبة؟ .. السكرتارية؟ ... الاشراف على المشاريع؟ ... من المهندسين؟ ... مساعدة فنية؟ ... ولا الإدارة؟
أكثر حاجة لفتات انتباهها هي الادارة ... زعما واش تقدر تخدم فيها ايلا قرات؟ شوية بشوية و بنقاش بسيط خلاها كاتخمم فواحد المجال محدد لي ثار انتباهها
إيمان : الإدارة
يوسف : اشمن ادارة بالضبط؟
إيمان : الإدارة و صافي
فهمها مامقشبلة والو فهادشي و كاتعرف حاجة وحدة هي الادارة كاتعني تكون مديرة شركة .. ولكن مابغاش يحرجها داكشي علاش بدا كايشرح لها بطريقتو
يوسف : بان ليا بالحماس لي مخبعاه تقدري تكوني مديرة مشاريع ولكن فنفس الوقت بالصبر ديالك و قدرة التحمل و حيت مكالمية و حنينة مديرة شؤون الموظفين كاتليق لك حسن من مديرة المشارع حيت ماغاتلقايش مشكل مع الموظفين و نيت هما كايفضلو مديرة هي لي تتكلف ولكن كايخصك ماتكونيش نية باش مايستغلوكش ... ادارة الشؤون الادارية و المالية ممكن [ بتاسم لها ] هدا كايبقا مستقبلك .. نتي لي غاترسمي خطاويه [ شد لها نيفها بيديه ] انا سولتك باش نعرف بنت خويا فاش كاتفكر
_ ردات عليه بإبتسامة و حدرات راسها كاتاكل و عقلها مع هاد المجالات لي ذكر ليها ماقدراتش تقوليه مافهماتش مزيان داكشي علاش قررات حتى تمشي للدار و تدخل لكوكل من تيليفون مها باش تقلب مزيان على هاد المجالات .. سالاو الماكلة و خلصو و ناضو .. بقاو كايتساراو غير و هو و ايمن كل شوية كايجبدوها بالهضرة حتى ضلام الحال و رجعو للدار .. حل ايمن الباب و دخل و يلاه جات تدخل حتى هي و هو يعيط ليها خالها
يوسف : إيمان تسناي واحد الدقيقة جبت ليك شي حاجة
بقات واقفة كاتتسناه اش غايجبد .. مشا للطوموبيل ديالو جبد منها مذكرة وردية بقلم أسود على شكل ريشة .. مدها ليها بإبتسامة و جرها من يديها بعدها من حدا الباب بحالا غايهضر معاها فشي سر
أنت تقرأ
سوادي
Romance◇ روايتي مهداه إلى كل سمراء و سوداء ... إلى كل أنثى شعرت أنها عبئ من الأعباء ... لدى الأباء و الأحباء و الأقرباء و حتى الأصدقاء ... روايتي مهداه إلى كل أنثى إعتبرت أن لونها أو شكلها عار و وباء و هرعت إلى الإختباء كخنفساء جرباء ◇ أما لون غيوم الشتاء...
