سوادي

البارت 1

                   》روايتي مهداه《
》إلى كل أنثى عانت يوما ما من العنصرية 《

                           •• المقدمة •• 

• هل الذنب ذنبي؟
• أم الذنب ذنب ربي
• أم الذنب ذنب شكلي و سوادي
• أم الذنب ذنب والداي اللذان أنجباني؟
• أم الذنب هو خطأ يقع على عاتق تربية مجتمع المسلمين؟ ههه المسلمين؟! نعم نفسهم المسلمين الذين لا يعترفون بقول الرسول لا فرق بين عربي أو أعجمي أو أسود أو أبيض الا بالتقوى ... نفسه المجتمع المتناقض الذي يمقت السود و يفخر بالصحابي بلال الذي كان هو أيضا عرقه من السود ... الذنب ليس ذنبي .. الذنب ذنبكم أنتم يا بشر.

كل وحدة فينا هنا فايت ليها عاشت حالة من حالات العنصرية ... يا بسبب مدينتها و أصلها ... يا بسبب لونها و شكلها ... يا بسبب طولتها أو قصرها ... يا بسبب سمنتها أو ضعفها ... يا بسبب مخارج الخروف ديالها و لهجتها ... كاين لي أثر عليها هادشي فحياتها حتى ولات تحس بإحساس مرير ديال الذل بحالا هي شي جرثومة وسط عباد الله و كاين لي ضربات هضرة بنادم بركلة ماتسوقاتش و قالت لهم " ايلا ماعجبكومش راسي انا عاجبني و راضية بيه "

_ هادي 20 عام و بالضبط فسنة 1999 فمدينة مكناس برج مولاي عمر و من لا يعرفه ... فواحد الدار فحي شعبي مع 7 ديال العشية صوت التزغريت كايتسمع من واحد الدار حتى لباب الدار باش يستقبلو مولود جديد بيناتهم ... الفرحة باينة فيهم و الراجل على برا كايتسنا القابلة تسالي و يشوف ولدو ولا بنتو ... العكوزة و اللوسة كل شوية يزغرتو و الجارات داخلين للدار باش يديرو الصواب ها لي مدخلة طبسيل ديال الرفيسة بالمساخن و ها لي مدخلة لها طبسيل ديال كسكسو و ها لي مدخلة فيديها طبسيل ديال المسمن ... دازو دقائق قليلة و تسمع صوت البكاء ديال رضيع فالبيت ... زادو زغرتو و مشات لعكوزة و اللوسة باش يدخلو و فرحانين ... ولكن مع الدخلة لي دخلو و طاحت عينيهم على يدين القابلة شداتهم اللقوة

العكوزة : شهادشي؟؟؟

القابلة : هادشي لي عطا الله ا لالة السعدية

اللوسة : اويلي ا مي بنت من هادي؟؟؟ خويا بيض و كايشقشق بالبيوضة و حنا ماعندناش عرق صحراوي ولا شي كحلوش فعائلتنا

العكوزة : اويلي على شوهتي مع الجارات فين غاندير وجهي [ ضربات ففخاضها ] اويلي ستغفرت الله سيرتي غاتولي على كل لسان ... الجارات كايتسناو على برا يشوفو بيض السعد حتى تبلينا بكحلة السعد ولا مانعرفت اش هاد المس

اللوسة : مي اش غانديرو دابا؟؟ الجيران فوسط الدار كايتسناو باغيين يدخلو يشوفوها

العكوزة : خرجي دااابا شوفي كي ديري تسيفطيهم من هنا و عيطي لخوك يشوف هاد المحنة و الموصيبة لي جابت ليه هاد المرا

اللوسة : واخا ا مي

خرجات اللوسة تصدر الجيران لديورهم بحجة مرت خوها مريضة و هي لي مابغات تشوف حد و زادت شي فيخرات بالفقصة لي تفقصاتها ... عاد تقلبات عند خوها باش تزيد تزند الفاخر معاه