سحر الكون

الفصل الثانى عشر

الفصل_الثانى_عشر
سحر_الكون
شايفة كل حاجة ابيض مفيش حاجة غير البياض و بعد كدا تظهر جميلة و هى بتضحك و بعد كدا يجى زين و هو بيضحك و هى تقف جمبهم و يضحكو سوا و بعد كدا يظهر ايهاب و سارة و كلهم فرحانين و بعد كدا فى نقطة سواد هتبان و تبدأ توسع توسع و كلهم يجروا برعب منها و يبدأ السواد دا يسحب واحد واحد فيهم لحد ما هتفضل لوحدها فى السواد دا و تزعق و تسمع صوت سارة و هى بتقول : وردة وردة قومى فى ايه
بدأت تفتح عنيها و شافت النور الابيض تانى
وردة بصوت ضعيف : ايه اللى حصل
ردت جميلة بضحك و قالت بتعب  : يا بنتى انتى نمتى اكتر منى فى ايه هو مين اللى واخد بينج
كله ضحك و بعد كدا وردة فاقت و خدت بالها من جميلة اللى كانت قاعدة على السرير و فى محلول متركب فى اديها و باين على وشها علامات الارهاق
قامت وردة بسرعة و راحت عند جميلة و مسكت وشها و بدأت تتفحصها و تلف وشها و تقول بخوف و سرعة : جميلة انتى كويسة صح حاسة ب حاجة وجعاكى
بعد كدا مسكت ايد جميلة  و مشت اديها ع راسها و قالت : عاملة ايه دلوقتى جعانة اجبلك تاكلى عطشانة طب
و حطت اديها ع بطنها بالراحة و قالت : طب بطنك وجعاكى طب انتى عاملة ايه دلوقتى يا بنتى ما تردى
جميلة ببتسانة و صوت ضعيف : هو انتى مديانى فرصة ارد طيب ، انا كويسة الحمد لله
وردة خدت نفسها براحة و قالت بصوت عالى نسبيا: هو انا مش كنت بسألك فى ايه ، مش كنت ببقى معاكى ع طول ليه مقلتليش ، طب يا ستى متقوليش يا ستى لكن تهملى فى نفسك كمان و متكشفيش
و كملت بهدوء اكتر مع نبرة زعل : افرضى ملحقناش نيجى المستشفى ، افرضى كان حصلك حاجة كنت هعمل ايه انا
و حطت راسها على سرير جميلة بتعب و جميلة مشت اديها ع راسها و قالت بضعف و صوت تعبان : انا اسفة ، حقك عليا بصى انا كويسة دلوقتى اهو
وردة بصت عليها و حست بارهاقها راحت باست راسها و قالت : بعد لما تفوقى و تبقى كويسة يا جميلة هوريكى
جميلة ضحكت و قالت : ماشى يا ست براحتك
سارة مسحت لوردة وشها و قالت : ايه بقا اظن كفاية زعل و دراما لحد كدا احنا مش متعودين على كدا، و بعدين جميلة بقت زى القرد اهى
وردة و جميلة ضحكو و جميلة قالت : بقا انا قرد ماشى يا سارة لما اقوملك
سارة ضحكت و قالت بغمزة : بس قرد قمر 😉
وردة بتساؤل : هو محدش رن على عمو محسن و طنط و لا ايه
سارة : لا رنيت عليهم بعد ما جميلة طلعت و هما كانو هنا من شوية بس نزلوا يجيبوا الاكل اللى طلبو الدكتور و زين و ايهاب بعد ما اطمنو على جميلة بيلفو على المستشفى و كدا عشان تقريبا تبع حاجة فى شغلهم المعقد و حجات من هذا القبيل يعنى 😂
وردة ضحكت و قالت : دا انتى مشكلة يا سارة ، المهم انا هروح للدكتور اسئله عليكى تمام عشان شكلى اليومين الجايين دول هشتفل ممرضة بدل مديرة شركة
و ابتسمت و طلعت للدكتور و سارة قعدت تحكى لجميلة اللى حصل و هى فى العمليات
********************************
فى مكان تانى فى المستشفى
زين : انت فاهم خطورة اللى انت بتقوله دا
الملازم اول دكتور ابراهيم : ايوة فاهم و عارف كمان انى ممكن اروح فى داهية
ايهاب : هتعمل ايه
ابراهيم : حاسس ان قى حد بيتربص بيا اصلا فحاسس انه شم خبر انى اعرف حاجة
زين بثقة : متخفش من حاجة انت فى الحماية اهم حاجة متأمنش لحد خالص حتى لو كان عزيز عليك شك فى كل حاجة تمام اكلك شربك اى حاجة
ابراهيم : انا مش خابف الحمد لله و اللى مكتوب هيحصلى ، اهم حاجة بالنسبالى اديكو الاوراق
ايهاب : عرفت تاخدهه يعنى
ابراهيم : ايوة لازم يبقى فى دليل على كلامى
و مد ايده بمفتاح و قال : دا مفتاح خزنة فى البنك لما تروح هناك هتفهم كل حاجة
زين خد المفتاح و حطه فى جيبه و قال : اشمعنا قلتلنا احنا ، و متقلش عشان جيتو هنا ، فى مليون ظابط بيدخل المستشفى دى كل يوم
ابراهيم ابتسم و قال : مغلطتش لما اخترتكوا ، اخترتكوا لإنى عارف فريق زين و ايهاب و بسمع عنكو كتير اوى ، و عارف انكو قد المسؤلية دى
و وهما واقفين جت ممرضة و قالت : دكتور ابراهيم فى حالة جديدة لحضرتك
ابراهيم اومئ براسه و قالهم : بالتوفيق يا اسود
و سلم عليهم و مشى
ايهاب : لازم نتأكد قبل اى حاجة يا زين ، احنا مش بنلعب مع اى حد
زين : هنتأكد من الورق ان شاء الله
و راحو على اوضة جميلة و هما بيفكروا
******************************
وردة رجعت من عند الدكتور و قالت : الدكتور قال لازم ترتاحى ها و تاكلى كويس و ممكن تخرجى النهاردة بلبل كدا عادى لما المحلول بخلص بس هتفضلى قاعدة على السرير اسبوع متتحركيش
ريهام مامت جميلة : هنتابع كل حاجة يا وردة متخافيش
وردة : دا انا هقدم طلب اقامة عندكو لحد ما جميلة تبقى كويسة
كله ضحك و محسن بابا جميلة قال : تنورى اكيد يا وردة ، اصلا البت دى مش بتسمع كلام حد غيرك
وردة بصت ل جميلة و قالت : دا انا هعلمك الادب
جميلة بهزار : انى خايف والله
و دخل فى الوقت دا زين و ايهاب و سلموا على محسن و ريهام و زين قال : الف سلامة عليكى يا جميلة
جميلة : الله يسلمك يا زين ، تعبتكو معايا والله
زين ببتسامة : لا عادى طبعا اهم حاجة تبقى كويسة
ايهاب : الف سلامة عليكى يا جميلة عاملة ايه دلوقتى
جميلة : الحمد لله بقيت احسن
ايهاب : لازم تاخدى بالك اكتر من كدا و متهمليش نفسك تانى
جميلة باحراج عشان باباها قاعد : احم حاضر ان شاء الله المرة الجاية
و زين خبط ايهاب فى ايده عشان ميتكلمش تانى و زين قال فى نفسه : حمار اوى مش بيكلمها خالص و يجى قدام باباها و يقلب بطة بلدى
ايهاب سئل : امال فين سارة
وردة بصت حاوليها ملقتهاش و قالت : ايوة صح فين هى
جميلة : كانت نعسانة جدا راحت تنام فى اوضة فاضية
ايهاب ابتسم و قال : طفلة اوى ، خلاص يا زين هاخدها و امشى انا ماشى
زين : ماشى روح انت و انا هوصلهم و كدا و هروح ابات عند بابا النهاردة
ابهاب بفرحة : هيفرح اوى ياريت تعمل كدا بجد
زين ابتسم و قال : ايوة ان شاء الله
ايهاب مد ايده و سلم على زين و حضنو و قال : شكل خروجة النهاردو عملت مفعولها
زين ضحك و قال : و لسة هتعمل
و سلم ايهاب على محسن و الباقى و خرج
محسن : تقدر تروح انت يا بنى عادى احنا معانا عربيتنا و هنروح كلنا
زين بزوق : و دى تحصل برضو يا عمى ، هفضل معاكو لحد ما اطمن عليكو
ريهام بلطف : متشكرين يا بنى تعبناك معانا
زين ابتسم و قال : و لا تعب و لا حاجة يجماعة عادى
*************************************
زين وصلهم و اطمن عليهم و مشى على فيلا باباه و دخل و لقى الدنيا كلها ضلمة
زين فى نفسه : ايه دا نامو بدرى يعنى دى لسة الساعة ١٠
طلع اوضته براحة عشان ميصحيش حد و فتح النور و لقى اخواتو نايمين على سريره
ابتسم و قال فى نفسه : مجانين و ربنا
دخل الحمام و استحمى و طلع قفل النور و نام ع الكنبة و قال ف نفسه : انا هوريكوا بكرة ازاى تدخلو اوضتى كدا لا و تناموا ع سريرى كمان
*************************
تانى يوم
زين صحى و دخل الحمام خد شاور و كان طالع سمع صوت اخواتوا اللى كانو صحيو بيقولوا
رهف بسعادة : احلى حاجة اننا هنروح ل زين النهاردة
مى بفرحة : ايوة فعلا
ريم مردتش و كانت زعلانة
رهف باستغراب : مالك يا ريم
ريم بحزن : زين لسة زعلان على نور
مى : مش اخته لازم يزعل عليها
ريم : ايوة فاهمة و كلنا زعلانين و كلنا بنحبها ، بس هو مش بيحبنا زى نور و لا حتى ربع حبها
مى بزعل هى كمان : انا مكنتش عاوزة اقول حاجة بس فعلا انا بحس بكدا برضو ، بحسو ناسينا و ناسى ان عنده اخوات و بينتهز اى فرصة عشان يبعد
رهف حضنتهم و قالت : لا مش كدا ابدا يا بنات هو بيحبنا اكيد هو فى حد احلى من زين
ريم و مى : لا
رهف : بس خلاص احنا اهم حاجة النهاردة نحاول نخليه كويس زى ما هو بيعمل معانا ع طول ، اتفقنا
ريم و مى : اتفقنا
زين كان سامع كل دا و قال لنفسه : غبى اوى يا زين بجد غبى ، زعلك مش اثر عليك انت بس ، لا دا اذى اللى حواليك كمان ، هو فعلا زى ما قالت وردة محدش قالى انسى ،  و نور كانت كويسة جدا ، زعلى فى قلبى بس عشان مأذيش اللى حواليا ، و مين اخواتك ، اذيت اخواتك و خلتهم يحسو باحساس وحش زى دا ، لازم اصلح كل دا .
فتح باب الحمام براحة و طلع فجأة مرة واحدة و زعق بصوت عالى و قال : عااااااااااااا
و فى نفس اللحظة البنات قامو يجروا و يصوتوا بصوت عالى
مى بخوف : يا ماماااااااااا
ريم بصوت عالى : الحـــقوناااااااا
رهف : يـــــلاهـــــــــوى
و كانو هيجروا ناحية الباب لكن زين سبقهم فهما رجعو تانى لورا و هما بيزعقو و طبعا من صوتهم العالى طلعلهم شاكر و مراتو و دخلوا و فتحو الباب و النور و قال شاكر بخضة  : ايه دا فى ايه
سامية بزعر  : ايه اللى حصل
و كلهم بصو لما النور اتفتح و لقو زين و زين قعد يضحك عليهم : شكلكو ......يلاهوى مش قادر لا
و فضل يضحك و وقع ع الارض من كتر الضحك
شاكر باستغراب : زين هنا
سامية : كنتو بتصوتوا ليه
رهف و هى بتاخد نفسها : يلاهوى يا ماما دا طلع فجأة من الحمام و زعق
ريم : حرام عليك والله
شاكر لما جمع الموقف فى دماغو ضحك و قال : حلوة يا واد يا زين معملهاش انا فيهم قبل كدا
سامية بصتلو بعتاب و قالت : دا بدل ما تعقله
زين كمل ضحك و حاول ياخد نفسه و قال : كفك يا بابا يا روش
و ضربوا كفوفهم ببعض و هما بيضحكوا
ريم ادايقت و قالت : انت رخم اوى يا عم
مى : انت ايه اللى جابك اصلا
رهف : جيت امتى
زين : انا قررت قرار كدا بعد الشر عليكو يعنى
شاكر بتركيز : خير
زين : قررت اقعد معاكو
البنات صوتو بفرحة
و ريم جريت ع زين و حضنتو و قالت بفرحة : بجد
و رهف و مى راحو وراها رهف بعدم تصديق : بتهزر
زين ضحك و قال : لا مش بهزر
سامية فرحت اوى و قالت : الحمد لله يا زين اخيرا
زين ضحك و قال : يلا صعبتو عليا
شاكر غمزلو بعينه و قال : شكل خروجة امبارح عملت مفعول جامد اوى 😉
زين باستغراب : حتى انت عارف خروجة امبارح
رهف : عملت ايه مع وردة ها
مى : ايوة ايوة احكى اللى حصل
ريم : هتتجوزا امتى
زين بصدمة و قام وقف : ايه دا فى ايه
سامية بخبث : ايه دا وشه احمر
زين اتكسف و قال : كدا طب اطلعوا كلكو برا بقا و بعدين صح افتكرت ،  بقا اجى بليل الاقيكو نايمين فى اوضتى و على سريرى كمان
ريم و هى طالعة برا الاوضة : دى رهف اللى اقترحت
مى طلعت وراها و قالت : كدابة دى هى ريم
رهف لحقتهم و قالت : لا دى مى
زين طلع يجرى وراهم و قال : انتو هتهربوا منى و لا ايه
*****************************
فى نفس الوقت جميلة صحيت و لقت وردة نايمة على كرسى جمبها و مش نايمة حلو حاولت تصحيها و تنادى عليها
جميلة : وردة   وردة ، انتى يا بت
وردة فاقت لما سمعت صوتها فقامت و قالت  : ايه مالك تعبانة فيكى حاجة
جميلة : لا انا كويسة ، ايه اللى نيمك على الكرسى مش قلتلك نامى جمبى عادى و كنتى نايمة فعلا
وردة ابتسمت و قالت : اه ما انا كنت نايمة فى حضنك كمان يا ست بس اول لما نمتى رحت قمت
جميلة : و ليه ان شاء الله
وردة : خفت اجى عند بطنك و تتوجعى و لا حاجة لا ، لما تبقى كويسة يا ست هنام جمبك
و قامت وقفت و قالت و هى بتتاوب : هقوم اجبلك الاكل بقا
جميلة : طب تعالى نامى الاول كويس عشان منمتيش
وردة و هى بتطلع و بتتاوب : مش نعسانة لا
وردة عملت الاكل و كلو هما الاتنين و وردة ادت الدوا لجميلة و طلعت ريهام مامت جميلة قعدت معاها و راحت وردة اوضة تانية عشان تنام
بعد الضهر سارة جت ل جميلة و كانوا قاعدين كلهم مع بعض
سارة ضحكت و قالت : كنت عاوزة اجى و افضل معاكى بس نمت فى المستشفى زى القتيلة و ايهاب معرفش يصحينى و فى الاخر راح شالنى و حاطنى ف العربية زى ما يكون خاطفنى 😂
ضحكو عليها و جميلة قالت : عادى و لا يهمك انا عارفة انى قلقتكو اوى
سارة و هى باصة لوردة و بتغمز : بس عرفنا انك غالية عند نااااس 😉
وردة ابتسمت و بصت لجميلة و قالت : حسابك معايا لما يعدى الاسبوع دا بس و تبقى كويسة
سارة : ايوة يا وردة وريها
جميلة : انتى بتهديها و لا بتولعيها
سارة ضحكت و قالت : انا مع الحق
ضحكو و وردة قالت : طول الوقت انا هفضل مع جميلة مش هينفع اسبها و مينفعش نفضل احنا التلاتة و نسيب الشركة ف يا سارة انا اسفة بس لازم امسكك كل حاجة
سارة : فعلا لازم حد فينا يروح عادى يا وردة مفهاش حاجة ، بس همسك كل حاجة لوحدى
وردة : انا قلت برضو ان المدة كبيرة و كدا عشان كدا عينت حد عشان يساعدك
سارة : مين
وردة : ..........
********************************
عند زين
و هو قاعد مع عيلته بيتكلمو ايهاب رن عليه
زين : ايه يا بوب عامل ايه
ايهاب بجدية : زين لازم تيجى على المدرية فورا
زين بتركيز : فى حاجة و لا ايه
ايهاب : هتعرف لما تيجى بس بسرعة مفيش وقت
زين قام وقف و قال : حاضر حاضر خمسة و هكون عندك ، سلام
ايهاب : سلام
و قفل معاه و قال و هو طالع : عاوزنى فى المدرية ضرورى هشوف فى ايه و اجى
سامية : ربما يوفقك
******************************
و بس لحد هنا ، ايه رايكو بقا دراما تلاقو ضحك تلاقو اى خدمة يعنى 😂💙
ايه اللى وردة هتعملو لجميلة ؟
مين اللى وردة عينتو مع سارة ؟
ايه القضية اللى قالها ابراهيم لزين و ايهاب ؟
ايه اللى حصل فى المدرية خلاهم عاوزين زين بسرعة ؟
كل دا هنعرفوا المرة الجاية 😂😚💙
الفصل_الثانى_عشر
سحر_الكون⁦♥️⁩
رحمة_محروس⁦♥