سحر الكون

الفصل الرابع عشر

الفصل_الرابع_عشر
سحر_الكون
بعد تلت ايام  كانت كل حاجة عادية سارة و ايمن ماسكين الشركة و زين و ايهاب بيخلصوا شغلهم عشان زين هيمشى ، وردة مع جميلة لحد ما تبقى كويسة و هى اتحسنت كتير و بقت بتقدر تقوم من على السرير و تتمشى ، زين مهتم بأخواتوا و مش بيزعلهم و ايهاب كذالك مهتم بسارة و كل حاجة لحد دلوقتى كويسة
****************************************
صحيت جميلة من النوم و قامت لوحدها و دخلت الحمام و بعد شوية وردة صحيت و ملقتش جميلة ندهت عليها محدش رد قامت و خبطت على الحمام و
قالت : جميلة انتى هنا
محدش رد
ندهت تانى بصوت اعلى : جميلة انتى فى الحمام و لا لا
محدش رد عليها برضو
ندهت اخر مرة و قالت : لو مردتيش هفتح
برضو محدش رد راحت فتحت الباب و لقت جميلة واقفة قدام المرايا و بتبص على وشها و عمالة تتفحصه كدا
وردة : انتى عبيطة يا بت مش بنده عليكى
جميلة بصوت واطى شوية : تعالى تعالى كدا بصى
وردة استغربت و راحت وقفت قدام المراية جمبها و قالت بصوت واطى برضو : ايه فى ايه
جميلة و هى باصة على المرايا قالت : شايفة ايه على المرايا
وردة بصت على صورة جميلة اللى على المرايا و ابتسمت و قالت : شايفة واحدة جميلة اوى من جوا و من برا
جميلة شاورت على حاجة فى وشها و قالت بزعل : لا بصى فى حباية اهى
وردة قربت و قالت بتركيز : تصدقى ايوة حباية مخدتش بالى منها
جميلة : شايفة هيطلع غيرها و هيبقى شكلى وحش
وردة بجدية : لا يا بنتى متجيش عندها و مش هتعمل حاجة و هتختفى لوحدها و شكلك حلو خالص مفيش حاجة وحشة
جميلة بصت تانى لنفسها فى المراية و وردة بصت على نفسها و قالت بخضة : ايه دا بصى انا كمان عندى حباية اهو
جميلة : هنعمل ايه
وردة و هى بتشوف مكان الحبة : مش عارفة
و سمعو حد وراهم بيقول : بتعملوا ايه يا هبل
بصو لقو ريهام مامت جميلة فقالت جميلة : بصى يا ماما فى حباية
وردة : ايوة و انا كمان بصى
ريهام و هى بتضرب كف بكف : لا حول و لا قوة إلا بالله  ، اتنين هبل و اتلمو على بعض
جميلة و وردة ضحكو و طلعو من الحمام
وردة : اتفضلى بقا يا ست جميلة اقعدى عشان متتعبيش تانى
جميلة : خلينى اتمشى شوية بقا كفاية بقالى اربع ايام على السرير زهقت منه
وردة : تنامى على سرير فى اوضة تانى طب
جميلة بملل : يعنى فرقت
وردة : لا هتقعدى انا مش ناقصة يحصلك حاجة تانى
جميلة قالت ل ريهام : يا ماما بقا قوللها حاجة
ريهام : خلاص تعالى كلى بس الاول و بعد كدا يا وردة نمشيها شوية و تطلع تشم هوا فى الجنينة كدا عشان كتر القاعدة على السرير بتتعب و شوية و نطلعها تانى برضو
وردة بعدم رضا : طيب ماشى حبة قليلين بس كلى الاول
جميلة بفرح : يسس هو دا و بعدين بحس انك انتى امى مش ماما ليه هى اللى تقولى ماشى او لا على فكرة مش انتى
وردة بغيظ : بقا كدا طب مفيش نزول
جميلة بسرعة : لا لا خلاص بهزر فين الاكل
وردة و ريهام ضحكو و جميلة قعدت تاكل
********************************
فى فيلا شاكر
زين صحى من النوم و دخل الحمام و طلع و نزل يفطر معاهم تحت و هما بيفطرو
سامية بتقول للبنات : اظن ايه بقا كفاية لعب و هزار كدا النهاردة مذاكرة
ريم بتأفف : يووه بقا يا ماما احنا خدنا بريك تلت ايام بس
زين : اربعة بعد اذنك انا من ساعة ما جيت ما شوفتش حد بيذاكر
ريم : والنبى اقعد انت على جمب اما مكنش حد بيشوفك بتذاكر و انت فى  ثانوى
زين بتفاخر : يا بنتى انا كان هدفى شرطة من الاول
مى : انا عاوزة ادخل صيدلة
زين : يبقى لازم تذاكرى حلو بقا
رهف : ايوة ان شاء الله هنكمل مذاكرة من النهاردة
ريم مكنش عجبها الكلام راح زين ضحك و قال : يا ريم يا فاشلة
ريم بغيظ : مش فاشلة يا عم بس مش بحب اذاااكر
سامية : بلاش دلع بس و كل حاجة هتبقى كويسة
شاكر : اوعدكو ان شاء الله لما تخلصو و تجيبو مجاميع عاليا هعملكو كل اللى انتو عاوزينه
مى بفرحة : انا عاوزة عربية
رهف : و انا عاوزة تلفون جديد
زين ضحك و قال : امالهم عاليا اوى
شاكر ابتسم و قال : لا اللى هما عاوزينه بس يشدو حيلهم هما بس
سامية بصت ل ريم و قالت : و انتى مش عاوزة حاجة
ريم : جوزونى بس و كل حاجة تبقى تمام
كلو ضحك عليها و زين قال : فى عسكرى عندنا يا بت يا ريم بس ايه  قمر
ريم بملل : عسكرى
زين كمل بضحك : هو يعنى صغير شوية بتاع خمسين سنة كدا
ريم قامت و قالت : اقوم اذاكر احسن
كله ضحك و شاكر قام عشان يروح الشركة
زين : استنى يا بابا خدنى معاك اعمل اى حاجة كدا بدل ما انا قاعد
شاكر ضحك و قال : مش ناقص يا عم بتقعد ترغى و هنضحك احنا الاتنين و مفيش شغل بقا
زين ضحك و قال : لا لا هتمشى و اشوف الاحوال و بعد كدا هطلع مشوار
شاكر : ماشى يلا
و مشيو هما الاتنين
********************************
فى شركة وردة
سارة راحت الشركة و طلعت على مكتبها و كان ايمن لسة مجاش قعدت و بدأت تنظم المكان و قالت : البارد اتأخر يعنى
ايمن من وراها : لا البارد جاى من بدرى بس كان بيراجع على الكاميرات
سارة : امممم تمام يبقى انا هلف و اراجع ورا موظفين الحسابات
ايمن : هيفضل كدا مراجعة على كام ثفقة و نتابع الباقى
سارة : صح كدا
ايمن : فطرتى ؟
سارة و هى باصة فى ورق قدامها : اه بتسأل ليه
ايمن : ابدا اصلى مفطرتش و مش بحب اكل لوحدى
سارة : ليه مفيش حد عندك فى البيت يعملك فطار و كدا
ايمن : ماما بتبقى نايمة قبل ما انزل و اخويا الكبير بينزل هو كمان شغله فبفطر هنا
سارة : اه لا انا بضطر اعمل فطار قبل ما انزل عشان افطر اخويا و كدا و بعد كدا بننزل سوا
ايمن : عندك اخ اكبر منك يعنى
سارة و هى مش عارفة تركز فى الورقة اللى معاها : ايوة ايوة
ايمن : اللى بيجى ياخدك بعد الشغل
سارة بزهق : ايوة هو
ايمن : اااه
سارة : روح افطر بقا عشان انت بتبقى رغاى و بارد من غير اكل
ايمن : فعلا والله بس مكسل اقوم
سارة مردتش عليه
ايمن : جعااان
سارة بتحاول تركز عشان تخلص
ايمن و هو متعمد يدايقها : عاوز اكل
سارة سابت الورق اللى فى اديها و قالت بنرفزة : يوووه ابن اختى قاعد معايا ما تروح تاكل
ايمن بكسل : مكسل انزل
سارة رفعت سماعة الفون و طلبت فطار ليه و عصير مانجا ليهم هما الاتنين و قفلت
ايمن غمز بعينه و قال : بقيت فاهمنى يسطا 😉
سارة ضحكت من حركته و قالت : ممكن اركز بقا
ايمن ابتسم و قال : اتفضلى
*****************************
فى شركة المهدى
زين كان قاعدة مع شاكر و هو بيشتغل فقال
زين بتفكير : بابا على كدا
شاكر : اممم
زين : مين اللى هيمسك الشركة دى بعديك
شاكر قام و قال بصدمة : عاوز تموتنى يا واد
زين ضحك و قال : اقعد بس صلى على النبى كدا
شاكر قعد و قال : عليه الصلاه و السلام
زين : يعنى شركة كبيرة طول بعرض مين همسكها بعديك بجد مش لازم موت انت ليه فهمتها كدا قصدى انك ممكن تكبر فتسيبها لحد يعنى
شاكر : انا بصراحة حاطط املى على رهف و اللى عاوز منهم يعنى بس ان شاء الله خير عندى مهندسين هنا يعتمد عليهم و كدا عادى
زين : اه ماشى
و شاكر كمل شغل و زين فضل ساكت شوية و قال : بابا
شاكر بنرفزة : اطلع برة
زين باستغراب  : الله !! انا قلت حاجة
شاكر : قاعد عمال تسئل اسئلة كونية يا عم اطلع برا
زين قام و قال : طب خلاص متزقش ، هروح اشوف الشغل ماشى ازاى و بعد كدا رايح مشوارى
شاكر : مشوارك دا هتأخر فيه
زين بصلو و قال : اشمعنى
شاكر : لو هتتأخر استناك نروح مع بعض لو لا ابقى روح انت
زين : خلاص ماشى تمام ، سلام
شاكر : سلام
طلع زين و فضل فى الشركة شوية يرغى مع دا و شوية مع دا و فى الاخر كان واقف مع واحد من المهندسين كان المفروض يودى تصاميم لشاكر بس زين كان واقف معاه فشاكر بيرن على المهندس عشان يطلعلو الورق
شاكر : ايه يا بنى التصاميم فين
المهندس : معلش يا فتدم والله بس واقف مع استاذ زين
شاكر : زين تانى ، تمام خليك عندك و انا هتصرف انتو فى انهى دور
المنهدس : فى دور الاستقبال تحت خالص
شاكر : ماشى
شركة شاكر كانت عبارة عن ١٠ ادوار و الادوار كانت فيها سلالم و اسنسيرات و السلالم فى نص الشركة و واسعة فبالتالى كل الشركة شايفة بعض و كل دور يقدر يشوف اللى تحته و الحيطان الفاصلة بين المكاتب ازاز
المهم بقا شاكر طلع من اوضته و بص من على السلالم و شافهم و  قال بصوت عالى عشان يسمعو زين : هو انا مش قلتلك امشى بالادب
زين ضحك و قال : و انا قلتلك هشوف الشغل ماشى ازاى
شاكر : انت عطلت الشغل ما شوفتوش
بعد كدا زعق بصوت عالى و قال : حد يندهلى الامن هنا بسرعة
طبعا الشركة كلها متابعة الحوار و محدش فاهم حاجة بس لما شاكر زعق كله اتخض و كام واحد راحو ينادو الامن
زين لما شاكر عمل كدا فضل يضحك و فى ناس متعرفش زين فكانو مستغربين ازاى المدير بيزعق و دا بيضحك
الامن جه و كانوا تلت رجالة طوال كدا بعضلات
شاكر و هو بيشاور على زين : علموه الادب طلعوه برا
كلهم بصو لزين واحد من الامن اتقدم و كان لسة هيضربوا بالبوكس كان زين مسك ايده قبل ما تيجى عليه و لواها ورا ضهره و ضربه بركبته على ضهره فالحارس وقع كان لسة واحد تانى هيدخل بس زين طلع بطاقته بتاعة الشرطة و قال بجدية و صرامة : الرائد زين المهدى اقف مكانك
الحارسين وقفو مكانهم بخوف و قالوا : اسفين يا فندم مكناش نعرف
و الحارس اللى كان على الارض قام و قال بخوف : مكنتش اعرف يا فندم بجد انا اسف
زين بصرامة : تحب اعملك جزا بسبب تعديك على اللى اعلى منك رتبة
الحارس و هو باصص على الارض بندم : لا يا فندم اسف والله
زين حط البطاقة فى جيبة و بص ل شاكر و ضحك و قال : ايه يا شاكر بيه انت مفكر ابنك عبيط هتطلعو بالامن
و بعد كدا كمل و هو بيغمز : اسم زين المهدى مش قليل برضو 😉
شاكر ضحك و قال : انت عارف انا لو نزلتلك مش هتنفع معايا البطاقة بتعتك دى
زين ضحك و قال : اوعى الثقة انت فوق القانون يا باشا ، يلا همشى بقا انا مش فاضلكو اصلا
شاكر باستنكار : والله
زين و هو ماشى قال بضحك : ايوة
شاكر : اخر مرة تدخل فيها الشركة دى يا زين
زين شاورله و هو طالع و قال :  باى باى
شاكر شاورله و قال للشركة : يلا كل واحد يكمل شغله و دخل شاكر مكتبه
و الناس اللى فى الشركة شوية عارفين زين و هزاره فعارفين ان دا كلو هزار و ضحكو على اللى حصل و اللى مش عارف زين اتخض و فكر ان فى مشاكل بين مدير شركتهم و ابنو لدرجة انه يطردوا من الشركه 😂
*************************************
فى بيت جميلة
كانو قاعدين فى الجنينه على المرجيحة وردة و جميلة قاعدين بيتكلمو و بيضحكو و بعد كدا وردة جالها مكالمة من الشركة كانو بيسئلوها على حاجة و بعد ما ردت عليهم جالها مكالمة تانى من سارة ردت و سارة سئلتها على حاجة فى الشغل
سارة : يعنى التعامل مع الشركة دى هيكمل و لا لا
وردة : ايوة لو اتعدلو ف الثفقة دى تمام لو لا يبقى خلاص
سارة : خلاص ماشى
وردة : راجعتى على كل حاجة
سارة : كل حاجة ماشية تمام
وردة : طيب كويس ، بعد لما تخلصى بقا عدى علينا بقالك تلت ايام مش بتيجى
سارة : ايهاب قاعد فى البيت و بيودينى الشغل و يجبنى من كتر فراغوا 😂 هو فى اجازة و هتخلص بعد يومين و مش هعرف اسيبه لوحده و كدا
وردة : ما انتى بتقولى بيجبك اهو يبقى لما يجيبك عدى علينا انتى و هو عادى
سارة : خلاص ماشى هحاول
وردة : ماشى يلا باى
سارة : باى
جميلة سئلت وردة : هتيجى و لا لا
وردة : قالت هتحاول تيجى هى و ايهاب
جميلة : اووو ايهاب
وردة : مالو ايهاب
جميلة : معرفش يا ست ظابط مثلا و شكلو حلو فى البدلة بتعته و بحب اديقه اوى
وردة ضحكت و قالت : هتقعى يا جميلة
جميلة : انا هوقع نفسى و  بزمة كمان
وردة ضحكت عليها و قالت : و هو وقع خلاص اصلا
*****************************
فى شركة الهراوى
ايمن : هتروحى لجميلة
سارة : احتمال اه اخلى ايهاب يودينى
ايمن : خلاص اشطا انا جاى معاكو
سارة : بجد و اقول ل اخويا دا مين
ايمن بسترخاء و ابتسامة : انا هعرفوا انا بنفسى
سارة بتريقة و هى بتغير ضوتها : انا هعرفوا انا بنفسى ، كأنك وزير الوزرا اعرفو بنفسى قال يا بنى اخويا ظابط
ايمن : و لا يهمنى
سارة ضحكت بخبث و قالت : هنشوف مش هيهمك ازاى
*********************************
وردة هى و جميلة كانوا قاعدين فى الجنينة مستنين سارة و ايهاب و بعد شوية جت ريهام و قعدت معاهم و قالولها ان صحابهم جايين و وهما قاعدين جه الحارس اللى بيحرس بوابة الفيلا
و قال : يا ست ريهام فى ظابط برا عاوز يدخل
وردة عرفت انه ايهاب فقالت : ايوة هما دول يا طنط
ريهام : دخله عادى
و ريهام دخلت تجيب حاجة عشان يشربوها و هما مستعدين عشان يستقبلو سارة و ايهاب و بعد كدا لقو حد جى عليهم فجميلة بتقول باستغراب : مش باين انه ايهاب خالص
و لما قرب اكتشفوا انو زين 😂
زين ضحك و قال : منظركو يدل على انكو كنتو مستنين حد تانى
وردة ضحكت و قالت : فعلا ، سارة و ايهاب كانوا جايين عشان كدا فكرنا انك هما
جميلة بتمثل الزعل و بتبص على السما : لا ياربى انا كنت عاوزة ايهاب مش زين
وردة و زين ضحكو و قعدوا و جميلة قامت و قالتلو : تشرب ايه
وردة و زين مع بعض بضحك : اشرب شاى 😂
جميلة ضحكت و كانت قايمة تجيب الشاى وردة وقفتها و قالت : انتى عبيطة يا بت رايحة فين
جميلة : هجيب الشاى
وردة : لا يا حلوة اقعدى هجيبه انا
جميلة بغمزة : قال يعنى زين جاى عشانى انا 😉
وردة اتكسفت انها قالت كدا قدامه و زين ضحك و قال : لا جاى عشانكوا انتو الاتنين و اقعدى يا جميلة لا متتعبيش نفسك
فى الوقت دا جت ريهام و هى جايبة عصير و لقت زين بس اللى جه و افتكرته فقالت ببتسامة : ازيك يا زين يا بنى عامل ايه
زين قام احتراما ليها و قال بزوق : فى فضل و نعمة الحمد لله
ريهام شاورتله عشان يقعد و قالت : اتقضل يا ابنى اقعد
و قعد زين و قعدت ريهام
جميلة بتريقة : حلو اوى يا زين ماما بتعاملك احسن منى
زين ضحك و قال : يا بنتى انا مش اى حد
بعد كدا قال بجدية : طمنينى عليكى بس عاملة ايه دلوقتى
جميلة : بقيت احسن الحمد لله
زين : الحمد لله ، مش عاوز اسئل بقا بتاخدى الدوا و لا لا او بتاكلى حلو و لا لا عشان عارف ان وردة قايمة بالواجب
كله ضحك و ريهام قالت : قايمة بالواجب و نص كمان و ريحتنى جدا
ضحكو و زين سئل وردة : وردة كنتى بتقولى ان نور سابتلك حاجة ليا ، ايه هى ؟
وردة سئلتو : النهاردة كام فى الشهر
زين بص فى القون بتاعو و رد عليها باستغراب من سؤالها :  ١٢/٦ ، ليه ؟
وردة : تمام بعد بكرة بالظبط هدهالك
زين باستغراب : اشمعنى ؟
وردة : هى نور قالتلى كدا ، هبقى اجى الفيلا عند عمو شاكر عشان اسلم عليه هو و طنط و رهف و ريم و مى و هجيب جميلة معايا 
زين ضحك و قال : هى هتبقى حفلة و لا ايه و بعدين انتى لسة فاكرة اسامى اخواتى العفاريت دول
وردة ابتسمت و قالت : اه طبعا
ريهام سئلت : انتو تعرفوا بعض ازاى يا زين
فوردة هى اللى ردت و قالت : كان فى مشاكل عندى فى الشركة و ديون و كدا و باباه صاحب شركة كبيرة كان ليه ديون عندى و كدا فعرفته من كدا يعنى و ساعدنى فى شوية حجات قانونية تبع الشركة و كدا و بس بقينا صحاب و بنساعد بعض و كدا
زين فهم انها مش عاوزة تجيب سيرة الموضوع بتاع نصر الدين تانى
و قال : ايوة يا طنط و عرفتهم بقا و كمان طلعت نور اختى الله يرحمها صاحبة وردة و جميلة
ريهام باستغراب : نور اختك بجد
جميلة : حوار طويل يا ماما
زين ابتسم و قال : اختى فى الرضاعة
ريهام ابتسمت و قالت : ربنا يرحمها يارب بجد كانت طيبة اوى
كلهم قالو : ربنا يرحمها
فى نفس الوقت دا كان ايهاب مستنى سارة قدام الشركة و سارة كانت خلصت شفل و نازلة هى و ايمن و لقت ايهاب واقف قدام الشركة راحت عنده و ايمن جه وراها
طبعا ايهاب بص باستغراب على ايمن فسارة كانت هتعرفوا عليه و بتقول : ايهاب دا اي....
لكن قاطع كلامها ايمن و هو بيقول : لا انا اللى هعرفه على نفسى
ايمن بيقول ل ايهاب و هو بيمد ايده عشان يسلم عليه : ايمن السيوفى ابن خالتك
***********************************
بوم بوم بوووم ، صدمة ها 😉😂الفصل طويل شويتين اهو اى خدمة
ايمن ازاى ابن خالة ايهاب و سارة ؟
و ازاى سارة معرفتوش لما شافته ؟
ايه هى الحاجة اللى نور سايباها مع وردة ؟
و اشمعنى وردة هتديلو الحاجة فى وقت معين ؟
كل دا هنعرفوا المرة الجاية ان شاء الله
الفصل_الرابع_عشر
سحر_الكون
رحمة_محروس⁦♥️⁩