سحر الكون

الفصل السابع

الفصل السابع
سحر_الكون
عند وردة
جميلة كانت لسة عند وردة مخلية بالها منها و سارة كانت مشيت عشان ايهاب اتصل بيها و كان عاوزها ، وردة كانت نامت من تأثير الدوا و جميلة فضلت جمبها و سرحت و قعدت تتخيل كانت هتعمل ايه من غير وردة و حياتها كانت هتبقى عاملة ازاى و بدأت عنيها تدمع من تأثرها بالخيال بتاعها و بعد كدا حست بحد بيفوقها
وردة : جميلة جميلة فى ايه مالك فى حاجة حصلت
جميلة مسحت دموعها و قامت نامت فى حضن وردة و قالت : اه وحشتينى اوى و انتى نايمة
وردة : خلصى يا بنتي بجد ، كنتى بتفكرى فى ايه خلاكى تعيطى
جميلة ابتسمت و قالت : كنت بتخيل حياتى من غيرك و اد ايه كانت هتبقى وحشة
وردة : متتخيليش حاجة زى كدا تانى انا معاكى على طول ، ماشى
جميلة ابتسمت و قالت : ماشى
وردة و هى بتشيل جميلة من جمبها : يلا قومى كدا عشان متتعديش
جميلة و هى بتمسك فى وردة اكتر : مش قايمة لا ، بس يا بت و بعد كدا جميلة افتكرت حاجة و ضحكت
وردة ابتسمت و قالت : بتضحكى على ايه يا مجنونة
جميلة : حصل حتة موقف
وردة : ايه
جميلة بتحكلها
Flash back
ايمن : يعنى نصر الدين متورط فى اعمال مشبوهة و كدا
جميلة : ايوة
ايمن : و انتى المفروض اللى مسؤلة انك تمسكيه
جميلة : ايوة
ايمن : و عاوزة مخطط الكاميرات
جميلة : ايوة و خلص بقا انت بتسمع اللى حفظته
ايمن : لا بتأكد انى فهمته ، طيب هجبلك انا المخطط
جميلة : بجد
ايمن : ايوة على بليل كدا يكون عندك
جميلة بسعادة : شكرا شكرا
جميلة لنفسها : هنيالك يا جميلة مش هتتعبى فى حاجة الحمد لله 😂
نفس اليوم بليل لما سارة راحت تجيب الدوا لوردة الجرس رن نزلت جميلة تفتح و هى مفكرة انها سارة فتحت و قالت : ايه لحقتى تيجى بسر...
بعد كدا بصت قدامها لقت ايمن
جميلة باستغراب : ايمن !! ايه اللى جابك
ايمن : ايه يا بنتى مش كنتى عاوزة المخطط
جميلة : ايوة صح ، جبته ؟
ايمن : ايوة اهو ، و مد ايده بورق خدته جميلة و بصت فيه لقته هو فعلا و بعد كدا سألت
جميلة : جبتو ازاى
ايمن :. عارفة السكرتيرة سعاد
جميلة : ايوة المتسهوكة دى
ايمن : ايوة هى اللى بتحط ٥٠ كيلو مكياج على وشها دى
جميلة : ايوة ايوة عرفتها اللى هى لبسها عامل زى الشحاتين دى
ايمن : هى دى نفسها اللى شعرها عامل زى الكنافة المسلوقة
جميلة : اه عرفتها ام لسانين و نص دى مالها احنا جبنا قرار البت و احنا قاعدين
ايمن : ربنا يسامحنا 😂 ، المهم رحتلها و ضحكت عليها بكلمتين كدا و بتاع المهم شوية و كانت جبتلى المخطط من الادارة و قالت ان نصر الدين هو اللى طالبو
جميلة : شكرا اوى يا ايمن
Back
جميلة : بس كدا و جاب المخطط و مشى
وردة ضحكت و قالت : دا انتو جوز مجانين صحيح
جميلة ضحكت : و بس زين بعت حد ياخده بعدها بشوية
وردة : زين بيخطط ل ايه ع كدا
جميلة : مش عارفة بصراحة طلع صعب حد يعرف هو بيفكر فى ايه مع انه كان باين انه سهل و كدا
وردة ضحكت و قالت : ايمن عرف ازاى انك هنا اصلا
جميلة : بعد ما مشى بابا اتصل و قال ان كان فى حد عاوز يدينى ورق شغل مهم و كدا و ادناله العنوان عشان يجيلك
وردة : اه عشان كدا عرف
جميلة : المهم بقا عاوزاكى ترتاحى كدا النهاردة عشان بكرة فى شغل كتييييير اوى
وردة : اه الشركة انا لازم اروح مينفعش اقعد
جميلة : تروحى فين ياما احنا بقينا العصر
وردة بصدمة : دا بجد انا نمت دا كله
جميلة : ايوة و متخافيش ع الشركة سارة مكانك هناك و بعدين مقصدش شغل فى الشركة
وردة : امال ايه ؟
جميلة و هى بتغمز : فى المخابرات 😉
*****************************************
اليوم عدى عادى
زين مستنى و بيخطط و الباقى بينفذ كلامه و هما مش فاهمين حاجة و مستنين يعرفوا كل حاجة فى الاخر
و وردة اتحسنت و بقت كويسة
تانى يوم ( عاوزة كدا و انا بقول على وقت معين تتخيلوا معايا كدا صوت الساعة و هو بيدق و كدا و احداث ماشية بالراحة حسوا بالاكشن يعنى 😂😁)
• الساعة ٦ الصبح
زين بيتكلم فى الفون
زين : ها كله جاهز
_ اه تمام
زين : محدش يعمل اى حاجة غير ما ادى الاشارة الاول
_ تمام يا فندم
• الساعة ٨ موبايل زين رن
زين : ها
_ خلاص كل الورق معايا
زين : كويس اوى الورق يروح المدرية بسرعة هناك هيبقى فى امان
_ تمام يا فندم
• الساعة ٩ زين كان بيلبس هدوم خروج عادية و رن على ايهاب
زين : لبست
ايهاب : اه جاهز انا و سارة
زين : تمام هعدى انا على جميلة و نتقابل فى ...... ، ماشى ؟
ايهاب : تمام
• الساعة ٩ و نص جميلة كانت مع زين فى العربية
جميلة : انت متأكد من اللى بتعمله
زين : سيبيلى نفسك بس و متخافيش و قوليلى اديتى ل وردة الوصايا العشرة قبل ما تسيبيها
جميلة ضحكت و قالت : اه طبعا 😂
الساعة ١٠ وردة كانت قدام الڤيلا بتاعة نصر الدين و الحراس دخلوها و فضلت قاعدة مستنية نصر الدين و بعدها بشوية نصر الدين جه
نصر الدين : عاملة ايه
وردة : الحمد لله تمام و انت
نصر الدين : الحمد لله ، تشربى ايه
وردة : اى حاجة عادى
نصر الدين : طيب ثوانى.
و دخل جوة
وردة لنفسها : اشمعنا انا مخرجش معاهم و اقعد الهى نصر الدين يعنى
*******************************
عند زين كانوا فى كافيه قدام البحر و قاعدين
ايهاب : يعنى احنا هنفضل هنا و الدنيا تولع حولينا
زين ضحك و قال : لا هناكل هنا و بعد كدا نطلع نجيب حاجة نشربها و نركب مركب
جميلة و سارة ضحكوا و ايهاب ابتسم و قال : يا عم بجد
زين بجدية : ايهاب ما تعمل اللى بقوله و انت ساكت احنا متراقبين
ايهاب : متراقبين ازاى يعنى
زين : النهاردة معاد دخول الشحنة و نصر الدين لازم يراقبنا عشان يتأكد اننا مش بنخطط لحاجة
جميلة : طب ليه مجتش وردة معانا بدل ما هى راحتله
زين : هو عارف وردة و وجود وردة معانا يبقى كدا احنا بنكشف قدامه كل حاجة و وردة كمان هتبقى فى خطر ، و كمل و هو بيضحك : دا غير انها هى اللى هتعرف تلهيه😂
جميلة بضحك : وردة فى الرغى معندهاش
ايهاب و هو بياكل : عرفت اللى بيراقبنا يا زين
زين ببتسامة : جدع يولا مشغلتكش معايا على الفاضى 😉
ايهاب : طب ايه نمسكه
زين : لا مستنين الشحنة لما تدخل
سارة : دا ازاى بتمنعوا الشحنة و فى نفس الوقت عاوزين تدخلوها
زين : لا اظن قلتلكوا حاجات كتير اوى كفاية عليكوا كدا 😂
ضحكو و بعد ما كلوا فعلا نزلو و اشتروا مشروبات و ركبوا مركب و كانو مستمتعين بوقتهم او دا اللى كان ظاهر للى بيراقبهم
نصر الدين : ها
اللى بيراقبهم : دول مجانين ياباشا والله
نصر الدين : بيعملوا ايه يعنى
اللى بيراقبهم : معاهم بنتين و بيتفسحو على النيل
نصر الدين : بتهزر
اللى بيراقبهم : لا والله زى ما بقولك كدا
نصر الدين : كويس اوى لو لقيت حصل حاجة قولى
_ حاضر
*****************************
عند وردة
نصر الدين جبلها عصير و كدا و قعدو يتكلمو حابة بعد كدا نصر الدين قال : ها قرارك ايه
وردة ابتسمت و قالت : هقولك قبل ما امشى
نصر الدين باستغراب : اشمعنى بعنى
وردة ضحكت و قالت : رخامة بعيد عنك
و بعد كدا قامت وقفت و قالت : الفيلا بتعتك حلوة اوى ممكن نتفرج عليها كلها
نصر الدين قام و قال : ممكن اوى
و طلعوا و قعدوا يتفرجوا و وردة فضلت ترغى فى كل تفصيلة فى الفيلا
****************************
عند زين
قعدوا كتير ف المركب بيتكلموا مع بعض و شويه جميلة و سارة لوحدهم و ايهاب و زين لوحدهم و قربوا يوصلوا بالمركب للشط
زين : فهمت
ايهاب لبس نضارته و قال : علم و ينفذ
طلعوا من المركب و كانوا ماشيين على الرصيف عادى جدا و فجأة ايهاب خبط فى واحد من اللى ماشين و حاجته وقعت
ايهاب : انا اسف مكنش قصدى
الراجل : لا عادى و لا يهمك
ايهاب لم الحاجة من الارض و اداها للراجل و همس فى ودنه
ايهاب بهمس : امشى قدامى من غير صوت خالص و حسك عينك تكلم حد
*******************************
و بس لحد هنا 😂😂
هيعملو ايه فى الراجل دا ؟
و ايه هو اللى زين بيخططلوا ؟
وردة هتعرف تهرب من نصر الدين ؟
نصر الدين هيتمسك و لا هيهرب منهم ؟
خطة زين هتنجح و لا لا ؟
هنعرف كل دا المرة الجاية 😂⁦♥️⁩
الفصل_السابع
سحر_الكون⁦♥️⁩✨
رحمة_محروس⁦♥️⁩
تصحيح : اسماء اشرف♥️