ဘဝတစ်ခု

2

ဒေါ်မိုမိုရွှေခိုင်သည် စီးပွားရေးကို ဖိဖိစီးစီး လုပ်နေလို့ သမီးလေး ဇိုဇိုရွှေခိုင်ကို လွှတ်ထားသည် လို့ ကွယ်လွန်သူ လင်ယောကျ်ားရဲ့ အမကြီး သင်းသီရိရွှေခိုင်က အပြစ်တင်သည် ။ဒေါ်မိုမိုရွှေခိုင်ကို တိုက်ရိုက် အပြစ်တင်တာ မဟုတ်ဘဲ ကွယ်ရာမှာ အတင်းချတာ ဖြစ်သည် ။ဒေါ်မိုမိုရွှေခိုင် အနေနဲ့ကလည်း လင်ယောကျ်ားကလည်း မရှိတော့လို့ ရှေ့ရေးအတွက် အိုဇာတာကောင်းစေဖို့ရယ် သမီးလေး မကြောင့်မကျ တသက်လုံး နေနိုင်ဖို့ရယ် အချိန်ရှိတုံး ကျန်းမာတုံးကြိုးစား လုပ်ကိုင်နေတာ ဖြစ်သည် ။ဇိုဇိုရွှေခိုင်သည် အမေရဲ့ ချမ်းသာကြွယ်ဝမှုတွေကြောင့် အစစအရာရာ လိုလေသေးမရှိ နေနိုင်သုံးနိုင်နေလို့ အပူအပင် မရှိဘဲ ကျောင်းနေဖက် သူငယ်ချင်းတွေနဲ့ တချိန်လုံး ပျော်နေသည် ။ဒါပေမယ့် အခု လောလောဆယ် ဇိုဇိုရွှေခိုင် မပျော်နိုင်ဘူး ။မင်းဝံထူးသင် ကြောင့်ပါ ။မင်းဝံထူးသင်သည် ဇိုဇိုရွှေခိုင့်နောက်ကို တကောက်ကောက် လိုက်ပြီး ဇိုဇိုရွှေခိုင့်ကို သူ တအားချစ်တဲ့အကြောင်း…တဖွဖွ တတွတ်တွတ် ပြောခဲ့လို့ ဇိုဇိုရွှေခိုင်က မင်းဝံထူးသင်သည် သူ့ကို တကယ်ချစ်သည် ..တအားချစ်သည်လို့ ထင်ခဲ့မိလိုက်သည် ။ ဒါကြောင့် ဘယ်ဘဲကိုမှ မျက်နှာသာ မပေးခဲ့တဲ့ ဇိုဇိုသည် မင်းဝံထူူးသင်ကို အနားကပ်ခံခဲ့သည် ။ တနေ့ကျရင် မင်းဝံထူးသင်ကို သူ့ချစ်သူ အဖြစ်လက်ခံမည် လို့ ဇိုဇို ဆုံးဖြတ်ခဲ့သည် ။ ချက်ချင်းတော့ မင်းဝံထူးသင်ကို ချစ်တယ် ဆိုတဲ့ အဖြေ မပေးသေး ။

မင်းဝံထူးသင်က ဇိုဇိုရွှေခိုင်က သူ့ကို အချိန်ဆွဲထားသည် ဆိုပြီး စိတ်ပျက်သည် ။ချမ်းသာလွန်းတဲ့ သူ့မိသားစု အခြေအနေကြောင့် သူ့ကို ကြိုက်နေတဲ့ ကောင်မလေးတွေက တပုံတပင် မဟုတ်လား ။ ဇိုဇိုရွှေခိုင်က သက်သက် အချိန်ဆွဲထားသည် လို့ သူ ထင်မြင်လာသည် ..။သူ့သူငယ်ချင်းတွေကလည်း ဇိုဇိုရွှေခိုင်က အဖြေလည်း မပေး..အချိန်တွေ ဆွဲထားပြီးမှ တနေ့ကျ မင်းကို ( မချစ်နိုင်ပါဘူး….ပြန်ပေတော့….) လို့ ပြောလာခဲ့ရင် မင်း ဘယ်လိုလုပ်မလဲ….လို့ ဝိုင်းပြောကြတာကြောင့် ဇိုဇိုရွှေခိုင်ကို ချစ်နေတဲ့ သူ့စိတ်တွေကို လျော့ပစ်ပြီး တခုခုနဲ့ ဖြေဖျောက်ပစ်ဖို့ ကြိုးစားလိုက်သည် ။သူငယ်ချင်းတွေ ခေါ်သွားတဲ့ မင်္ဂလာဒုံဖက်က ကေတီဗီမှာ တွေ့တဲ့ ကောင်မလေးတွေထဲက ( ချောစု ) ဆိုတဲ့ ကောင်မလေးဆီကိုဘဲ မင်းဝံထူးသင် အမြဲရောက်သွားသည် ။ချောစုသည် တရုတ်ကပြားမလေး ဖြစ်ပြီး ဖြူဖွေးချောမွတ်တဲ့ အသားအရည်နဲ့ မျက်နှာလေးကလည်း ချစ်စရာကောင်းသလို ကိုယ်လုံးလေးက သွယ်လျတယ် ထင်ရပေမယ့် ရှိသင့်တာတွေ ရှိပြီး ကြည့်ကောင်းတဲ့ ကိုယ်လုံး အချိုးအဆက်နဲ့မို့ အမှောင်ချထားတဲ့ အခန်းထဲမှာ ချောစုကို ဖက်ထားပြီး ချောစု သီချင်းဆိုပြတာတွေကို သူ နားထောင်နေရတဲ့ ဖီလင်ကို သူ ကြိုက်နေသည် ။ဇိုဇိုရွှေခိုင်သည် သူမဆီကို ရောက်မလာတော့တဲ့ မင်းဝံထူးသင်ကြောင့် စိတ်တွေ တိုနေသည် ။မင်းဝံထူးသင်သည် သူမကို တကယ်ချစ်တယ် လို့ ထင်ခဲ့မိတာ ။ အခုတော့ စိတ်ရှည်ရှည်နဲ့ မစောင့်နိုင်တော့ဘဲ ခွာသွားတဲ့ မင်းဝံထူးသင်သည် သူမကို တကယ် မချစ်ဘူးလို့ ထင်သွားသည် ။