💄 هــــبــــة قـلــبــــــه 💄
🥂بقلم لمياء الشادلي 🥂
✨ الفصل الأول: #لقلبي_رأي_آخر ✨#بارت_1
الشوارع كيصفرو ، صوت ريح قوي كيضرب بالجهد ، الخوامي المعلقين في النوافذ كيتحركو بقوة كبيرة ، والأضواء في البيوت مشتعلة .
خلف جدران أحد البيوت البسيطة ، لايحة مذكرتها فوق سريرها المغلف بفراش أحد أميرات ديزني ، ومخلية جسدها مسرح فوق السرير .
حيدت الستيلو من فمها ، وحلات المذكرة كتخطط حرف بحرف ، الحروف كثيرة وكلامها مابغاش يسالي ، الطريقة الوحيدة اللي كتخفف بيها الألم على قلبها هي هذي ، في الأخير كتبقى فتاة رقيقة المشاعر ، وعاصفة حب ساهلة تطيرها وتخلي قلبها يتعلق بشخص بعيد كل البعد عليها ، ختمات كلامها بقلب منكسر في أسفل الورقة ، ومسحت دمعتها اللي هبطت دون إذن منها .
سمعات صوت مألوف عندها كيعيط بسميتها جمعت المذكرة بسرعة كبيرة وحطاتها تحت السرير فوق منها صاك مغطياه بيها ، كتحس بيها هي صندوق أسرارها وحتى واحد ماليه الحق يعرف اش فيه ، هبطت بيجامتها الوردية واللي كانت حد ركابيها على رجليها وخرجت بخطوات مسرعة بعدما سمعت نداء أمها الثاني ليها .
خذيجة : هبة ، هبة أجي تعشاي
جمعت شعرها سفنجة فوق راسها ، بطريقة فوضوية ، وتوجهت ناحية لافابو غسلت يديها ووجهها ، ثواني قليلة وتمشات ناحيتهم منضمة ليهم .
خديجة هزات عيونها فيها ونطقت باستفسار : فين كنتي غارقة ابنتي ومال عينيك حومر .
حركت راسها بالنفي ونطقت مجاوبة استفساراتها : كنت ناعسة وحكيت عيني حمارو .
رشيد حرك راسو من طبقه اللي كان كيشمل صلاد خفيفة ونطق ساءلها : شحال بقى ليك الجهوي ؟
تنهدت بقوة إثر سؤال باها ليها ونطقت مزيرة على يديها : يومين .
بلل حلقو ، حرك راسو بالايجاب ، ونطق بعد ثواني قليلة من الصمت : وشحال من نهار كتدوزو فيه ؟
حطات يديها على جبهتها كتذكر ، مدة دقيقة ونطقت بحزن : يومين
رشيد : ووجدتي ليها مزيان ؟
عضت شفايفها ونطقت بتوتر طاغي على ملامحها : انا حفظت وو وجدت ولكن خا خايفة .
رفع حاجبو ونطق بابتسامة : المهم تكوني حافظة هذا هو المهم ، دبا خاصك ترتاحي في هاد اليومين متقيسيش الدفاتر باش متبلوكايش
حركت رأسها بالايجاب ، نطقت بالبسملة، وجرات الزلافة دالحريرة ومعلقة عمراتها بيها ووجهتها لفمها تلذذت بمذاقها ونطقت بابتسامة : الله يعطيك الصحة اماما مكاينش اللي كيصرع الحريرة بحالك .
خديجة حولت نظرها ناحيتها ونطقت بابتسامة : أمييين الحبيبة ديالي انا وياك
حنات راسها مرة أخرى على الأكل ما إن سمعت صوت باها : وجدي راسك ابنتي مور الجهوي ديالك غدي تسافري
رفعت حاجبها بإستغراب ونطقت متسائلة : فين ؟
خديجة ربعت يديها فوق الطبلة ونطقت بجوابها : عيطت لينا خالتك اليوم ابنتي
هبة : خالتي ابتسام ؟
رشيد حرك راسو بالنفي ونطق مخاطبها : لا نجية
#يتبع.....
آرائكن في البداية ❤️✨
أنت تقرأ
هبة قلبه
Romantik#حصــــريا_وفــقــط_علــى_مــاضــي_الشهــيرات ❤️✨ 🥂 #هــــبــــة_قــــلــــبــــه 🥂 _ممنوعــــــــة مـــن النشـــر إلا بــعـــد طــلــب الإذن_ #أقـــود_قــصــة_يــمــكــن_تــقراوهــا_بــأقود_أسلوب ❣️🍻 الحب بحال شي عاصفة في عهد قديم ، ك...