مراحب حبايب
مثل معودتكم بالقصص نسوي فقرة للترفيه سميتها "سالفة" احجي بيها عن مواقف صارت وياية او وي اشخاص يقربولي
قبل لا ابلش لتنسون التصووويت
ويلا نبلش...
هذا الموقف منقول من صديقة الي اسمها "زينب"
زينب صديقتي اهلها عايشين بالعمارة عدها ٢ اخوان واخت متزوجة
اخوانها اجو لبغداد علمود فرص الدراسة والعمل بيها افضل من العمارة واخذوا اختهم زينب وياهم
طبعًا اهل زينب مو من نوع الي يخلي البنات تكمل دراسة
بس زينب دَرست بحكم اخوانها تأثروا بالجو العام بالعاصمة بغداد
اخو زينب الجبير تزوج معلمة وهسة عدهم طفلة مثل القمر اسمها زهراء
زينب هي واخوانها كل عطلة ينزلون للعمارة زيارة ل اهلها
ومرة صادفت عطلة ونزلت زينب وي اخوانها للعمارة...
زينب،، جنت ابيت اهلي وجانت الدنيا تقريبًا ب ٢ الظهر
اني ما محجبة بس مرات اللبس حجاب ومرات انزعة
بيومها لبست بنطرون ستريج وبدي نص ردان اكتافة من هاي التوكع ما ادري اذا افتهمتوا المهم
جنت حاطة دبل مكياج احب اتمكيج اني وجنت مشسورة شعري وفالتة
اخذت تلفوني وسماعات وطلعت للبستان، مجان احد من الولد موجود لذلك اخذت راحتي
هو بساتين واحد مفتوح علة الثاني والبيوت تنعد ع الاصابع، الغالبية اشجار وبساتين منها ل اهلي ومنها للعشاير البصفهم
حطيت سماعات وكمت اسمع مرة كاضم مرة سيف جانت طاشة اغنية "فوك القمة" لسيف نبيل واني وياهة مندمجة
مرة اطگ اصبع مرة اهز جتاف ومرة اطگ صورة وهكذا
وامشي ضربت قدم كوومة
فجأة طفة تلفوني مابي شحن
... اهووو خل ارجع اشحنة
انداريت وضليت صافنة هاي اني منين اجيت؟
كلها اشجار وبساتين وتيهت الطريق
يلاا خل امشي ليكدام بلكي اشوف احد
وصدك مشيت ومشيت لمحت ديوان سعفي، من هذا الي يسووا من الكصب
باوعت على راسة مثلث، اجاني فضول ادخل بي واشوف من جوة مثلث لو عدل
وصدك رحتلة واني اطگ اصبع واكول
... يلااا مع السلاامة بيباااي يا غرااامة وروووح رووح الله الله اللله وياااااڪ
ودخلت باوعت على السكف رأسا، وممنتبهة للاعين الي تراقبني
نزلت عيوني من السكف وجان انصدم بالبشر الي بالديوان ضليت متجمدة بمكاني
لابية ارجع ولا بية اضل، همة كعدة عربية يكعدون بالكاع واني اول مدخلت باوعت للسكف ف منتبهت عليهم
جانوا سراوين واحد يمنة وواحد يسرة وبالنص فارغ وكلها معكلة واكو ملثمين وعدهم اسحلة....
الظاهر عشيرتين متخاصمين لان واحد ضل يذب بسامير للثاني
عرضكم وعرضكم...
حجيت بصوت عالي
... السلااام عليكم
كلها ردت، حجة رجال جبيرة يطلع عمرة بالخمسين خمسيني جاد ههههه وكلي
... هلا بوية شگاصدة
اني ضليت صافنة خاف اكلة متيهة ويخطفوني لو يسوولي شي ولا بية اكلة ممتيهة
شجعت نفسي وحجيت
... عموو اني متيهة طريق البيت وضايعة من اهلي
هز راسة وكلي
... تعاي گعدي هين انخلص سالفتنة واردج لهلج
كعدت بالنص ورجعوا العشيرتين يحجون جان كاعد يمي واحد لابس دشداشة جوزي وشكلة ثلاثيني جاد هههه عاكد حواجبة وحاط ايدة على خدة ويباوعلهم
استفسرت منه ع سبب عركة العشيرتين وعرفت اكو صديقين من هل عشيرتين واحد غالط على الثاني وواحد منهم بالغلط داچ صاحبة بالسجينة بكليتة ومتوقفة وميت الولد
وعشيرتة هادين يردون فصلية وفلوس لو دمة
اني ما اتدخلت، بس الحمد لله بعد نقاااااش طويل انحلت السالفة بفلوس وطابت النفوس
ضلوا شوية وراحت العشيرة الثانية اندار علية الخمسيني
وكلي
... بوية انتِ شسمج وشسم ابوچ
... اني زينب طلال من عشيرة.....
... والنعم بوية عرفتج
جان اكو واحد طول الكعدة عصبي وبس يخزر بس يندار علية يبتسم ونظراتة تخوف جنة جني
صاح علية الخمسني وكلة يوصلني اني كمزت وكتلة
... عمووو هذا طول الكعدة يباوع علية بنظرات تخوف واني بت بيوت واخاف يخطفني لو يسويلي شي
ضحك الرجال وكال
... ولج بوية انه مزوجة اربعة حتة مچان الج ماكو روحي وياه
وصاح على واحد ثاني يروح ويانه
بس هذا بعدة يباوعلي ويبتسم....
وصلوني لبيت اهلي وجانت الساعة ٨ بالليل اول مدخلت حظني ابوية وسألني لان جان قلق علية
وسلم على ذولي الوصلوني وراحوا
سولفت لبت عمي على السالفة وكلتلي
... ولجج عزةةة هذا حبج وراح يطلك وحدة من نسوانة ويتزوجج
واني هنا خرطت العافية بسرعة رحت لخواني ولحييت علمود نرجع لبغداد
همَ ملوا من ملحتي وصدك رجعنة لبغداد....
وبعد لا شفت ابو اربع نسوان ولا شافني ههههههه
وبس والله، هذا الموقف اتمنى عجبكم
وكتبولي اذا تحبون اذكر بعد هيج مواقف لولا؟
تبارك (توت)
يبايعنه ابضحج ساعات
وانت سنين شارينه
عليمن بعد تاذينه.؟
عليمن يالگلت والگال
تاخذنه وتودينه..؟
عليمن تشتكي امن الشوك
واحنه الشوك ماذينه
عريان السيد
أنت تقرأ
عندما تقسى القلوب
General Fictionࢪواية واقعية...... بقلمي ؏ندما تقسۍ القلوب ********♡******** للكاتبة تبارك (توت) تم بداية نشر الرواية ٢٠٢١/١١/٢٨ الخميس♡
