رواية عزاي انك رجاي العذب لو كل الدروب عثور / أديم الراشد

رواية عزاي انك رجاي العذب لو كل الدروب عثور للكاتبة الجزء33

*ـــــــــــــــــــــــــــــــــــــــــــــــــ*
*((, #ﻋﺰﺍﻱ_ﺇﻧﻚ_ﺭﺟﺎﻱ_ﺍﻟﻌﺬﺏ_ﻟﻮ_ﻛﻞ_ﺍﻟﺪﺭﻭﺏ_ﻋﺜﻮﺭ))*
ﻟ))*
*(( #الحديقة_الثالث_والثلاثون))*
*ــــــــــــــــــــــــــــــــــ*

#لطفا وليس امرا / لاتنسواااا متابعة صفحتي على الواتباد
#روايات _أديم_الراشد

.
ومن بكره
خلف اللي صار ينام اخر الناس ويصحى اولهم ماكان يبي يقابل احد اليوم كان يخف بخطوته بيلحق يروح السوق يخاف ليلى تتصل وهو مو موجود
شرع ابواب المحل كالعاده وجلس وكانت عيونه على دكان النوخذه اللي شوي شوي بدا ينسحب من السوق تنهد اول ما طرا له الفيديو وكان يحس انه اشتاق ليلى هالفتره
دخل زوايته وطلع السي دي وجلس وتردد كثير لكن شغله وتكتف يتأملها وقلبه يهتز مع كل خطوه تخطيها كان يضحك اذا ضحكت ويكشر على انقطعت الاغنيه وكشرت
انتهى الفيديو بعد ماعاده مليون مره وسحب السي دي وهو يدخله اول مابدوا اهل السوق يجون وفي عز صمته طرا له سحر معقوله هاذي حوبة سحر ؟! معقوله ان اللي الحراره اللي يحسها تحرق قلبه هي نفسها اللي كانت بصدر سحر اول ما حاول يبعد ويتهرب
غمض بألم وهو يقول بهمس( يارب والله مانويت لها الكسر يارب انا ماكنت ابيها تعيش بحرقة طول العمر مع واحد مايبيها بالعكس كنت احن عليها من هالوجع يارب لا تجازيني بذنب ماقصدته)
فز على صوت عمه محمد اللي جاء ومعه شنطته: هاه خلف مالك نيه تخاويني
ضحك خلف بصعوبه وقال: ياليت ياعمي ياليت
محمد : وش وراك
خلف : كل شي
جاء عقاب اللي طلع من بيته وهو مايبي يتصادم مع وجد من هالصبح وقرر يهج لخلف وضحك وهو يقول :عوداً حميداً يا عمي اشتاقت لك المطارات
ضحك محمد : اي والله انها اطول فتره مرت علي ماسافرت
عقاب: حمدلله عدت بخيرها وشرها
محمد : يلا انا رايح وما اوصيكم
خلف : توكل على الله ولا تخاف
عقاب :كل شي بيكون على حطت يدك
ضحك محمد : اييه كل شي بس ابي ارجع وتبشرني انك تحتري ضنى
ضحك عقاب : على خير
راح محمد وجلس عقاب : هاه خليف اشوفها مغيمه عليك
خلف : ابد لاهي مغيمه ولا شي بس مصدع
عقاب سكت وبعدها قال: احس اني هالايام ماعاد اعرفك
ناظره خلف بهدوء: ليه!؟
عقاب:احسك شايل امور كثيره بصدرك ومخبيها وهذا شي ماتعودنا عليه وانت تدري ان ماعمرنا خبينا عن بعض
ابتسم خلف بالقوه وقال: لو فيه شي يا عقاب قلت لك اكيد لكن ابد كل اللي فيني اني تعبت من الاحداث الاخيره وابي ارتاح شوي عطني وقتي
عقاب : خذ راحتك يا خلف لكن لا تنسى اني اقرب لك من الوريد
خلف :اكيد يا عقاب
سكت وهو ماهو متعود يخبي عليه لكن لو قال وش بيقول ماله وجهه يقول شي اصلاً
_______________________.
وفي بيت ضاري
صحى من بدري ولبس طلع لأمه واستعجل خطوته وهو يشوفها جايه بالصينيه لغرفته: عنك عنك يمه وينك بتروحين بهالصينيه
..
ام ضاري : قلت اجيبها لكم وتفطرون
ضاري : افا!؟ تجيبينها انتي! وافطر في مكان ما انتي فيه ابد والله معصي
ام ضاري :يا يمه انت معرس خلك مني والتفت لعروستك
ضاري : ما ابدي احد عليك ابد الفطور عندك ولا يمكن اني افطر بعيد عنك
ام ضاري: الله يرضى عليك اجل قم ناد عروستك
ضاري : ابشري
رجع وهو خبره في مضاوي نايمه لكن شافها صحت من بدري وجهزت وكانت تجمع اغراضها ووقفت وهي تناظر انعكاسه بالمرايه
ما طول ضاري النظر فيها ولكن قال: امي تنتظرك على الفطور
مضاوي : طيب
كانت مستغربه اسلوبه وصده فيه شي غريب لكن اعتبرته لصالحها وطلعت وانهلت عليها التراحيب من ام ضاري وهي تداريها وتعطيها كل شي وضاري ساكت
وبعد الفطور وقفت ام ضاري بتجمع الاغراض لكن فزت مضاوي : حلفت ما تلمسين شي ياخالتي خليها عنك انا اسويها
ام ضاري:توك يابنتي عروس
مضاوي: واذا عروس اجلس وتخدميني لا والله اجلسي ارتاحي
اخذت الاغراض ولفت ام ضاري بهمس له : قم قم مع البنت تراها ماتدل شي ببيتنا علمها عن كل شي بالبيت
وقف ضاري بضيق وراح ورا مضاوي وهو يقول : المطبخ يمينك
لفت مضاوي تناظره بهدوء ودخلت وهي تنزل كل شي ووقف ضاري وراها متكتف
وجات ام ضاري تقول : انا بروح لام حمود وبتغداء عندها لا تشيلون همي
ضاري: اوصلك يمه
ام ضاري: اجلس انت اجلس انا ادل الطريق
راحت وضحك ضاري وهو يدري انها تسوي كل ذا عشان يجلس مع مضاوي
كانت مضاوي تحاول ترتب وتجاهل وقوفه وراها لكن تجمدت اول ماقال ضاري اللي عجز يتحمل : اتركي كل ذا وتعالي بكلمك
طلع للغرفه وترددت مضاوي تروح ولا ما تروح بس مستحيل تروح له خايفه وهي ودها ان امه ماراحت جلست بالمطبخ ولا طلعت وانتظر ضاري وطول ينتظر بس ماجت لكن جاء هو وتكتف هو يقول : قلت لك تعالي!؟ تقدرين تقولين ما ابي اجي لكن ما تسفهيني؟ وانا ماني ذليل يا بنت الناس
وكل اللي بغيته منك انك تسمعين هالكلمتين مني ! ادري انك مجبره على الزواج ولا بغيتيه وادري بكل شي في خاطرك لكن انا تممت وقبلت هالزواج عشان امي عجزت اكسر فرحتها فيك وعجزت اكسر ثقة خلف ومحمد فيني
لكن ما انتي مجبوره عندي على شي وخيرك الله بين امرين
اذا بغيتي تجلسين فتره معنا عشان محد يتكلم عليك براحتك واذا حبيتي تروحين لبيتكم بعد براحتك لكن في كل القرارين انتي مجبوره تحترمين امي وامي ماهي مأذيتك لكن انتبهي تزعلينها عشاني ولدها
للحظه نست نفسها مضاوي وهي تناظره بصدمه كان هذا اللي تبينه بس هي تدري وش عواقب هالقرارين لكن
..
انقهرت من اسلوبه انقهرت منه بكبره
لكن ضاري كان مقهور منها بعد لييه توافق دامها ماتبيه من البدايه لييييه تعشمه دامها ماهي قادره تتخذ قرارها ليه تلعب به قالت بغضب :انا ما اجلس تحت رحمة احد ولا اجلس عند احد مايبيني
ضحك ضاري بقهر: ولا انا اجلس مع احد مايبيني لكن هاذي غلطتك وتحملي عواقبها
مضاوي : والله ان كل مدحه قالوها فيك خساره دام هذا اسلوبك وكل عشم فيك بيخيب
ناظرها ضاري بهدوء : عمري ماخيبت عشم احد ولكن انا ما انام على ضيم لكن انتي امانه وتأكدي مارح تشوفين شي مني يضيع الامانه وعلى هالاساس بنكمل لين يصير الوقت المناسب لكن حطي ببالك زييين اذا سكت هذا مايعني انك تتمادين ابد ، لان حتى اللقيط اللي مصيره مجهول يعرف يكسر عين كل شخص يشوف نفسه عليه
طلع وتركها واتجهه لسطح وجلس مايبي يروح لشباب وده يبين ان كل شي طبيعي
لكن مضاوي مازالت مصدومه بس انزاح من قلبها هم من ضاري وعرفت انه مثلها ماهو براضي ودخلت تنام وهي مبسوطه رغم انه سفل فيها بس عادي عندها تعتبره ردة فعل لكن ماتدري كيف عرف انها ماتبيه
_______________________.
في سيارة مبارك
اللي ماقدرت وعد تحمل التعب واتصلت فيه يجي ضروري يجي وجاء مبارك اللي كان يراقبها بخوف : كنت حاس قلت لك تعالي معي ما انتي بخير وما تطيعين
وعد : خلاص يا مبارك خلاص كفايه الدنيا تدور فيني لا تزيد الطين بله
مبارك: علميني وش يوجعك بالضبط
وعد اللي كانت ماتبي تسسمع حتى صوته:مباااارك فكني يابن الحلال من الصوت ارحمني الله يرحمك
سكت مبارك وهو كل شوي يلف ويشوف اذا تمام او لا
ووصلوا المستشفى وهي دايخه ما تشوف قدامها
وبعد ما دخلت الطواري واخذت المغذي تحليل انتظرت هي ومبارك لين دخلوا عند الدكتوره
الدكتوره: وش تشتكين منه ياوعد ؟!
قبل تكلم وعد قال مبارك : يا دكتوره دايخه وتع...
الدكتوره: انت وعد!؟ مبارك: لا انا زوجها
وعد : مبارك اجلس اجلس
جلس مبارك وابتدت وعد تشرح لدكتوره اعراضها وابتسمت الدكتوره وهي تناظر التحاليل: طبيعي يا وعد ما دامك حامل من اسبوعين طبيعي هالشعور
جمدت ملامح وعد بصدمه وهي تناظر الدكتوره وفز مبارك بفرح: الله يبشرك بالخير يا دكتوره
وعد ماردت ابد وكأنها مضروبه كف بكل قوه وقفت بهدوء وطلعت ماردت على كلام احد ابد
طلعت بوجهها لسياره وماكانت هاذي خطتها ابد ماكانت تبي تحمل ابد في هالوقت كانت في مرحلة تأكد من مبارك ماتبي تورط نفسها وهي ماعرفت مبارك زين وكانت ماهي واثقه فيه ابد وما انتهت حتى من دراستها
ركض مبارك وراها : وعد وعد وش فيك يا بنت الحلال وش فيك
لفت وعد وصرخت : وصلني البيت يامبارك
تحرك مبارك بهدوء وهو يعطيها اعذار واول ما وصلوا البيت قال: وش فيك اللي يشوفك يقول ميت لك ميييت
وعد بكل هدوء طلعت الورقه وهي تعطيها اياه: وش اتفقنا عليه !؟ ووش وقعت عليه يا مبارك
مبارك اخذ الورقه بضيق : وانا وش بيدي كتب لنا ربي وش نسوي يعني نقول لا
كانت وعد عارفه ان حملها رزق من ربي لكن ما كانت مستعده وهي تدري انه بيكون نقطة ضعف في حياتها
جلست وهي تحط يدها على راسها
مبارك: يا وعد لا تنكرين النعمه غيرك يتمناها
صدا وعد وهي تنسدح بتعب ماردت على مبارك ابد ودامها رزقت بهالطفل لازم كثير اشياء تتغير في حياتها واولهم مبارك لازم يكون قد هالمسؤوليه لازززززم
اما مبارك كان فرحان ولا همه رضا وعد او زعلها المهم انها حامل يعني بقائها معه صار اجباري
_______________________.
وبهالسرعه انتشر خبر حمل وعد والكل فرحان وفي نفس الوقت ماهم مستوعبين ان وعد بتصير ام كان شي غريب شوي على وعد
اما وعد صح كانت مو متقبله لكن ما بينت لأحد وبدت تستوعب وترضى وبدت تتغير قناعاتها وتنشغل في نفسها وشهور حملها المتعب
ومو بس وعد اللي تغيرتت حتى مبارك اللي انقلب حاله لاحسن وهو ينتظر شوفة طفله ومستعد يزرع له الدنيا ورد ولوعد وهذا شي هون على وعد كثير
..
خلال هالشهور كان خلف مزروووع زراعه بجنب التليفون مايفارقه ابد وينتظر ليلى ترجع تتصل لكن للاسف مرت ٨ شهور وهو مايدري عنها ولا قصرت هال٨ شهور ابد بالعكس رسمت في ملامح خلف معاناتها للي كلهم يدرون ان فيه شي بس ما يدرون وش هو ...
بالنسبه لليلى طول هالشهور كانت منقطعه تماماً عن العالم اجمع وكانت خاااايفه من زعل ابوها اللي طال وبدا جابر يرجع شوي شوي للبيت بس للحين متحسس وزعلان والكل مستغرب هدوء ليلى الغريب لكن عشان ما احد يشك اخذها ابو نهيان تعيش عند جدتها ام ابوها والعذر تكمل دراستها وهو قصده يبعدها عن البيت عشان محد يشك فيها وكانت في مدينه بعيده عن اهلها لكن ما نست خلف ابد ولا عندها طريقة انها تتواصل معه ومرت هال٨ شهور على قلبها مثل السكاكين
...
عقاب طول هالفتره كان متماشي مع حياته اللي للان ما انكتب ان زواجه يزينه طفل وكان كل مافرح بحمل وجد تسقط لاسباب مجهوله وهذا الشي بدا يطفشه وزاد نفسيته سوء لكن هدأ كثير هالفتره لان وجد حامل
..
اما وجد المسكينه كانت ماتدري كيف ترضي عقاب ولا تدري وش تسوي فيه وكانت تحبه لكن ماتدري كيف تعبر وكيف تتصرف وتدعي ربها ان حملها يبقى لان هي الفتره الوحيده اللي تبان فيها حنية عقاب
...
من طرف نادر وشوق ما تغير في حياتهم شي كثير الا ان الراحه ملت حياتهم وماكانوا قاطعين اهلهم بالعكس رغم صدهم لهم الا انهم يروحون كل اسبوع ويرجعون بخيبة وفي الحقيقه بدت تنشأ بعقل نادر افكار جديده كان يستعد لها .... من طرف ضاري مايدري كيف مرت عليه هالشهور وهو مقابل لمضاوي اللي طورت العلاقه بينهم بكل المسميات الا مسمى انهم زوجين كانوا ممكن يصيرون اصحاب او شركاء بنفس الغرفه او اي شي بس مايصيرون زوجين الا بنظر ام ضاري اللي من فرحتها تشوفهم مناسبين لبعض ما تشوف الاختلاف
ومضاوي اللي ما توقعت انها بتعيش مع ضاري ابد لكن اكتشفت انه ماهو سيء ابداً لكن كل ماقررت تروح يضيق صدرها على ام ضاري اللي تحبها وشايلتها من الارض شيل .... وهالشهور كان ماجد مختفي فيها يستعد لبداية حياه جديده ومصر انه ماعاد يسكت ابد ورايح لعقاب رايح وبياخذ سحر ماعاد عنده صبر كانت هاذي الشهور خلاصة صبره .... اما  بالنسبه لبيت ابو خلف كانت هالشهور شهور النعيم كان ابو خلف متغير لدرجة انهم ماعاد يدرون وش يطلبون منه وكل شي صار عندهم بعد ماكانوا يتحسرون على كل شي ... وبيت الجد قايد كل شي كان زي ماهو الا ان هيا انخطبت  وصارت على مشارف الزواج ولكن سحر وعهد وشهد للحين في دوامة العزوبيه يدورون ومحمد اللي رجع للمطارات والرحلات وهو يشوفها تسليته الوحيده اللي تنسيه كثير اشياء توجعه ... _______________________.
وفي احد الايام بييت ابو خلف
كانت وعد جالسه بين البنات اللي يطقطقون كالعاده
ندى : انا احس اني احلم مستحييييل وعد تكون حامل مستحيل
وعد: ليييه ماني انسانه!؟
سحر: لا بس سبحان الله ياوعد احس انك قياديه يعني احس لازم تجلسين بقوتك واذا جبتي عيال احس بتتغيرين
هيا : نفس احساسي بس احس بعد انه شي حلو يعني الاطفال يزرعون الحنيه بالقلوب
حنان: ياربي تولدين بسرعه لأني مرره متحمسه
وعد وهي تناظر بطنها : هاااانت خلاص
فزوا على صوت فيصل اللي ينادي : ياولد فيه احد
وجدان: ارجع بنات عمي فيه
عزوز اللي كان معه : سووا لنا طريق لو سمحتوا
ضحكت ندى : ابشر يا عزوز لكن جبتوا مضاوي!؟ فيصل : تقول تنتظر ضاري يجي وبيجيبها ويرجع لأمه عشان ماعندها احد
هيا : يلا ننتظرها وش ورانا
فيصل : قوموا يلا
اماني: ياخي مانقدر نغير مكانا وعد تتعب
عزوز: اطلعوا انتم احنا نبي نجلس مع وعد
ضحكت وعد اللي كانت تحب عزوز عكس عقاب واخذت جلالها وغطاها وهيي تتغطى
طلعوا البنات للغرفه الثانيه ودخل فيصل وعزوز اللي كل متعتهم جلستهم مع وعد
وثواني وجات ام ناصر وام خلف وام وعد اللي كانو مسيرين وانظموا لجلستهم
_______________________.!
في بيت عقاب
طلع مستعد لدوامه وهو يقول : وجد تجهزي عشان تروحين للبنات تجلسين عندهم لين اجي
طلعت وجد من المطبخ: ابشر بس انت متى بتجي
عقاب : على حسب متى ماطلعوني طلعت و.. التفت لها وغمض بضيق واتجهه وهو يسحب القدر من يدها ورماه بالارض : انا وش قلت لك يا وجد وش اقول  ما قلت اجلسي لا تسوين شي
وجد : انا ما سويت شي بس ارتب ما احب البيت مكركب
عقاب : خليييه يتكركب خليه في ستين داهيه وجد ارحميني وارحمي نفسك واجلسي انتبهي على نفسك واللي ببطنك
وجد: طيب ابشر ابشر
عقاب : لا تقوليين ابشر شبعت منها ابي فعل ابي تجلسين والا والله لربطك والله
سكتت فجأه لكن ضحكت واعتدل عقاب يراقبها وهي تضحك : وش قلت يضحك؟
وجد: بزر تربطني
ضحك عقاب بقلة حيله: ادري عنك أسالي نفسك تفرين كأنك مكينه اجلسي خلي هالبزر اللي ببطنك يركد
وجد : طيب خلاص من عيوني
عقاب : يلا اجل لا تبطين
وجد : زين
راحت تجهز وطلع عقاب اللي وده يثبت حملها
_______________________.!
وفي بيت ام ضاري
كانت مضاوي تغسل وهي تغني ومبسوطه وجات ام ضاري ببتسامه: الله يقويك يا بنيتي
مضاوي : تسلمين ياخالتي
ام ضاري : انتبهي يا حبيبتي من الصابون ترا ضاري ما يحب ريحته بالملابس يتحسس منه
ناظرتها مضاوي ببتسامه ( جيتي بوقتك ياخالتي): ابد لا تشيلين هم
ام ضاري : انا بنسدح شوي وانتي لا تعبين نفسك
مضاوي : مافيه تعب ابد خذي راحتك
راحت ام ضاري وابتسمت مضاوي بخبث وهي مقهوره من ضاري اللي ماخلاها تنام زين الصبح ويتعمد يزعجها ويصقع بكل شي نذاله فيها
وكانت علاقتهم مبنيه على نذاله اغلب الوقت واغلبها تكون مزح وضاري عبيط ولقى اللي اعبط منه
كتت كل الصابون على ملابسه ولا نظفتها بالمويه مزبوط
وابتسمت وهي تنشفها وتكويها وعلقتها عشان تجف قبل يجي ضاري
ولا هي الا دقايق وجاء ضاري وقال بعبط : سلام عليكم دار قوم مؤمنين
ناظرته مضاوي بطرف عين ترد عليه : ان شاء الله انك من السابقيين
..
ضاري اللي سلم عليها سلام اهل القبور ردت عليه بمثل كلامه وهي تقوله ان عساك تكون من السابقين للقبور وهذا مفهوم المزح عندهم
ضاري : ان شاء الله تسمعك امي وتغسل شراعك
ضحكت مضاوي بإستهزاء : الله العالم بتغسل شراع من والبادي اظلم
ضاري: مسكييينه مظلومه
مضاوي : اها بس وش عندك راجع بدري !؟ كان نقعت برا كنا مرتاحين
ضاري: ابد جييت ودي اغثك ما لقيت احد اغثه اليوم
ناظرته مضاوي بطرف عين : استح على وجهك رجال طول عرض وعقلك عقل بزر
كان ضاري يدري انها قهرها وينبسط على انه ينزفرها وضحك : بشويش على نفسك لا تموتين
ماردت مضاوي وهي ماكانت تبي تتعابط معه اكثر ويرفض يوديها لأهلها
ضاري : جيت ببدل وين ملابسي !
مضاوي : فالغرفه وين بتكون يعني !؟ ضاري: عدلي لسانك ازين
دخل يبدل ودخلت مضاوي وراه تبي تقوله يوديها ولف ضاري وهو ينزل ثوبه وفانيلته وتكتف : مبسوطه الهانم معجبك المنظر
صدت مضاوي بفشله وهي اللي ماتدري كيف تنحت : من زينك يعجبني منظرك كنت ابي ا ا
نست وش بتقول من الفشله ولبس ضاري بسرعه وهو يضحك ووقف قبالها وهو يمشط شعره : مالك لوى لكن قبل تقولين اللي تبينه ياليت تسحبين كلمتك عشان ما اقول لا
مضاوي تخصرت : على كيفك ! ان شاء الله ودك تحبسني
ضاري : ايه بحبسك
مضاوي : ماشاء الله ولييه ان شاء الله !؟ اتجهه ضاري لثوبه المعلق : احبك مقدر اقعد بدونك
ناظرته مضاوي باستهزاء : يوووه مااهو اكثر من انا لو تغيب خمس دقايق يمكن يتوقف قلبي
صد ضاري بضحك: وين ناويه تروحين بس
مضاوي : من شوي جاء فيصل وعزوز بياخذوني البيت اليوم مجتمعين وطبعاً مارحت انا معهم تدري ليه !؟ ضاري بنفس الاستهزاء والضحك: ايه عشانك ماتقدرين تروحين بدون ماتشوفين زوجك وحبيبك وتستاذنين منه
مضاوي تجاريه: صدت مقدر سبحان الله بس
كان ضاري متعود على هالاسلوب مع مضاوي كله مزح وطقطقه مافيه شي حقيقي
مضاوي : لا صدق ما بغيت اخلي خالتي لحالها
واذا صار الموضوع ام ضاري وهو يشوف مضاوي كيف طيبه مع امه وهذا اللي يغفر لها عنده : زين اجل ماقصرتي اجهزي بوصلك بطريقي
مضاوي: زين
لفت لكن رجعها صوت ضاري اللي فصخ ثوبه ورماه وهو يكح : وشووو ذا
ناظرته بهدوء تحاول تكتم الضحكه: وشو!؟ غمض ضاري وهو يمسح وجهه بانزعاج ويحك جسمه : بقى شي من الصابون ما حطيتيه للحين !؟ كل الثوب صابون ! خبله انتي
..
ماتت مضاوي من الضحك بنفسها لكن اعتدلت وهي تدري ان ضاري على طول يحس بالذنب ويضيق صدره اذا زعلها من دون ذنب وكانت تستغل هالفرصه كثير قطبت حواجبها بضيق : وشو صابونه !؟ توني مخلصته ومنظفته هذا جزاتي من صبح الله اكرف بثيابك وملابسك والبيت والطبخ انكسر ظهري احوس وفالنهايه هذا كلامك لي
على طول ضاق صدر ضاري اللي وقف وهو يقول : يابنت الحلال ماهو هذا قصدي لكن انا عندي حساسيه من الصابون
مضاوي اللي تمثل الزعل : وش دراني ان باقي صابون فالثوب ووش دراني انك معك حساسيه لكن الشرهه علي انا الخبله
رمت عبايتها على الارض بغضب وجلست وصد ضاري بضيق وراح يغسل ورجع بضيق: انا ادري انك ماتدرين وادري ما انتي متعمده لكن انا ما اتحمل حتى ريحته لكن ماعليه حطيتها بكيس وانا اوديها اغسلها
ماردت مضاوي اللي مستانسه انه ندمته وحسفته ورحع ضاري يقول : قومي تعوذي من ابليس وحصل خير خليني اوصلك
مضاوي : ماعاد ابي اروح لمكان بنثبر هنا اكرف واغسل عشان حضرتك ما تزعل
ضاري : يابنت الحلال لا تسوينها سالفه انتي ماقصدتي وانا بعد ما قصدت خلاص قومي
مضاوي : يلا حصل خير لكن انا ابي انام عند اهلي اليوم
وقف ضاري اللي كان بيوافق لان ندم انه هاوشها وهو في نظره يشوفها ماهي ملزومه فيه لكن كان بيقولها تخليه بكره عشان هو اصلا بكره لان اليوم عنده شغل وبرا الخفجي ومايبي امه تجلس لحالها وبكره بيجي ويخليها تنام عندهم وقال: خليها بكره تنامين اليوم ماينف...
حقدت مضاوي اللي توقعته بيستلعن فيها وقالت تقاطعه : زين خلاص ماني رايحه اليوم بعد
استغرب ضاري بس قال: لا اليوم اوصلك وبكره اوصلك بس..
مضاوي اللي مبيته النيه وخالصه : لا ماعليك
ما ارتاح ضاري يعرفها مستحيل تراجع وترضى بهالسرعه وخصوصاً انه مهاوشها المفروض تقوم الدنيا وتقعدها بس مايدري وش ناويه : زين اجل انا بطلع
طلع وترك مضاوي اللي قالت: هييين اوريك والله لنام اليوم وبكره غصب عليك
بدت تجهز خطتها  وضاري يا غافل لك الله
_______________________.
وفي بيت نادر
اللي رجع من دوامه بدري وبعد ما قرر قراره النهائي وانه خلاص صبر بما فيه الكفايه وراعى شوق وخصوصاً ان شوق تغيرت وكبرت عن اول ما تزوجها
دخل وهو مبتسم ويدور عليها وشافها جالسه تقرا في كتبها ووقفت مبتسمه: يا هلا ! راجع بدري
اقبل لها نادر وهالمره تجرأ هو وحضنها ببتسامه: ابد اشتقت لك وجيت
انحرجت شوق لكن ضحكت وهي تبعد شعرها: لا صدق عاد ! لا يكون فيك شي
..
جلس نادر مبتسم: لا لا  مافيني شي بس قررت إني اطلع بدري واجيك ونجهز ونروح لدمام وش رايك !؟ ضحكت شوق بفرح: وهي فيها رايي بعد اكيد موافقه
نادر : اجل يلا اجهزي وخلي زينب تجهز بنوديها عند ضاري تجلس عندهم لين نجي
شوق : ابشر
راحت ونادر مبتسم وهو ماعاد يحس بالذنب اتجاهه شوق ولا يحس انه ممكن يأذيها
_______________________.
وفي السوق
كان خلف جالس وهو مسترخي على الكرسي وهي نفسه وكل ما تحرك الكرسي تحرك شوقه لليلى كان يحاول ينساها هالفتره وهو يدري ماعاد لهم مع بعض مجال وكانت وعد تعيد وتزيد عليه مهما وصل حبك ليلى انتهى كل شي بينكم ولا تنسى اماني اللي مكسوره بدون ذنب كان يحاووووول يتوب وينسى ليلى لكن في الحقيقه كل ما حاول يتوب يشوف نفسه يذوووب في حبها اكثر وكل ما حلف انه ينهي هالشي يحصل نفسه يرجع يحبها اضعاف مضاعفه كان يتردد على باله هالبيت وهو يمثل حاله (‏ألست وعدتني ياقلب أنّي ..إذا ما تبتُ عن ليلى تتوبُ ؟.
‏فها أنا.. تائبٌ عن حب ليلى..فمالك.. كلما ذُكِرت تذوبُ ؟
‏ومالك قد حننت لوصل ليلى..وكنتَ حلفت انك لا تؤوبُ
بلى قد عُدتَ يا قلبي إليها ..فهذا الدمعُ مُنسكبٌ صَبيبُ
يخَبِّرُ أنَّما الأشواقُ نارٌ .. وتحت النارِ أضلاعٌ تذوبُ
إلى كم تنحني شوقاً إليها .. وأحناءُ الفؤادِ بها نُدوبُ؟)
وهو خلاص ايقن انه ماعاد يقدر يصبر على شوقه اكثر يبي يروح للكويت ينبشها ويطلعهم من تحت الارض مستعد انه يدفع عمره يا يتزوجها يا يقتلونه ويرتاح من هالنار اللي تحرق صدره كل يوم
فتح عيونه على صوت ضاري اللي يقول :خلف وش فيك
اعتدل خلف بهدوء وقال : في داخلي نار يا ضاري عجزت اصبر عجزت اتحمل
ضاري اللي على طول فهم وقال: ما قلنا قفل الموضوع وانسى قلنا لك مالك امل يا خليف
خلف : ومن قالك اني ماقلته لنفسي وفهمتها مليون مره لكن مقدر مقدر يا ضاري انا خلاص تعبت
ضاري : وش بتسوي يعني!؟ خلف : بروح الكويت
ضاري : اقووول اعقل بس اعقل وين تروح وبعدين ربي ستر عليكم ليه تبي تروح تفضح البنت وتجيب لنفسك مصيبه
خلف : انا وعدتها يا ضاري ما اخليها
ضاري : وش بيدك انت
سكت خلف وهو مايدري وش بيسوي المهم ما رح يخيلها ابد
ضاري :وش رايك تروح ترتاح احسن شف حالتك كيف
خلف : لا لا خلني هنا اريح لي من البيت
ضاري : اجل تعال معي البيت ازين
خلف : لا يا ضاري خلني هنا
وقف ضاري بضيق : زين بس لا تجلس لحالك
خلف: زيين
راح ضاري وخلف في مكانه وهذا وضعه اخر الايام اول من يفتح بالسوق واخر من يقفل .
.
قررت اوقف فيديوهات البارتات واخليها صور واعتمد على لايكاتكم بشوف تبرد القلب زي المشاهدات .
.
في بيت ام ضاري
جمعت مضاوي كل الثياب من جديد وحطتها بالحوش وبدت تغسل من جديد وابتسمت اول ما جت ام ضاري باستغراب : مضاوي ما خلصتي للحين وش فيك يابنتي
ناظرتها مضاوي وهي تحاول تكسر خاطرها:الا خلصت من ساعه لكن وش اسوي بضاري قلت لك خلصت كل شغلي وبروح عند اهلي اسلم عليهم وابات الليله دامهم متجمعين بس تخيلي ياخالتي ما رضى ورمى كل الملابس بالارض ويقول فيها صابون وانا نظفتها من كل قلبي عشان تكون نظيفه وهاذي اخر سواته فيني
استغربت ام ضاري هالحركه من ضاري لكن عصبت وهي تقول : ماعلييييك منه انا اوريك فيك جمعي هالثياب بكيسه يقلعها ويغسلها برا وانا اوريك فيه قومي قومي ولا تضايقين اجهزي وانا بنفسي اوديك بيت اهلك
مضاوي : لا ياخالتي مابي اكسر كلمته
ام ضاري: ماعليك منه وقومي
وقفت مضاوي بنتصار وهي تدري ان بتروح وغصب من ورا خشم ضاري بعد
جهزت اغراضها وجهزت وجلست تنتظر ضاري اللي ما طول ورجع لكن مسكته أمه قبل يدخل: تعال تعال وينك رايح
ابتسم ضاري : هلا يمه بدخل ابدل ملابسي واجي
ام ضاري : اقول تعال هنا بس تعال
حس ضاري بغضبها وقرب مستغرب : افا يمه وش فيك معصبه وش صاير! مضاوي مسويه شي
ام ضاري: حاشاها بنت الناس ما سوت شي ولا قصرت بالعكس شايلتني وشايلتك على كفوف الراحه لكن الظاهر انك ناوي تطير بنت الناس
ضاري : افاا ليه هالكلام يمه وش صاير !
ام ضاري : انت وش فيك عليها! ليه ما تبيها تروح لأهلهاً
ضاري : من قال اني ما ابيها تروح
ام ضاري : ضاري اسمعني زيين المسكينه من يوم صحت وهي تكرف وتغسل ولادرت عن حساسيتك ولا درت عن شي وزود على ذا رجعت عيال اخوانها وما راحت لاهلها عشان تجلس معي وانت هاذي سواتك فيها تمنعها ما تروح وتخيلها تغسل من جديد اسمعني عاد توديها اللي تبي وتخيلها تنام عندهم وتجي متى ما بغت ولا ترا بزعلي عليك
فهم ضاري ان مضاوي سوت سواتها من جديد لكن هالمره ماهي مثل كل المره وقف بهدوء وقال: ابشري
طلع وهو مقهور هو ماسوى شي من ذا كله بالعكس كان متعاطف معها لكن لازم تحوس الدنيا
اتجهه لغرفته بهدوء وشاف مضاوي جالسه وهي مبتسمه كانت متوقعته بيرد نذالتها ويستنذل اكثر لكن صدمها اول ماقال : جهزي اغراضك بتروحين بيت اهلك
وقفت مضاوي : جاهزه
لف لها ضاري بهدوء وقال: لا لا كل اغراضك لاني ماعاد اقدر اتحمل اكثر
انفجعت مضاوي فعلاً انفجعت دققت فيه واكتشفت انه معصب وزعلان كان بتكلم بس قال بتهديد : إن زدتي حرف واحد زياده صدقيني بتشوفين وجهي اللي ماتعرفينه
تدبست مضاوي بمكانها حاولت تستوعب .
.
#عزاي_إنك_رجاي_العذب_لو_كل_الدروب_عثور

#لطفا وليس امرا / لاتنسواااا متابعة صفحتي على الواتباد
#روايات _أديم_الراشد

.
*ـــــــ((( @ahgeel )))ـــــــ*
*, #ﺃلى_هنا_اقفل_ﺣﺪﻳﻘﺘﻲ_الـ33*
*📚 #يتبع👇🏻💜*..
..
*طبعا الرواية تم نشرها كامل في التلجرام لمن يريدها كاملة انضم بقناتنا على التلجرام
رابط القناة بالتلجرام ⇐ t.me/ahgeel
قم بنسخ الرابط وابحث في التلجرام ...