رواية عزاي انك رجاي العذب لو كل الدروب عثور / أديم الراشد

رواية عزاي انك رجاي العذب لو كل الدروب عثور للكاتبة الجزء 35

*ـــــــــــــــــــــــــــــــــــــــــــــــــ*
*((, #ﻋﺰﺍﻱ_ﺇﻧﻚ_ﺭﺟﺎﻱ_ﺍﻟﻌﺬﺏ_ﻟﻮ_ﻛﻞ_ﺍﻟﺪﺭﻭﺏ_ﻋﺜﻮﺭ))*
ﻟ))*
*(( #الحديقة_الخامس_والثلاثون))*
*ــــــــــــــــــــــــــــــــــ*

#لطفا وليس امرا / لاتنسواااا متابعة صفحتي على الواتباد
#روايات _أديم_الراشد

.
بدت التصريحات عن الحرب وان صدام بيهاجم الخفجي  وبدت الاستعدادات وبدا الكل يخاف ومحد كان متوقع هالغدره
في بيت الجد قايد كانوا كلهم مجتمعين ويسمعون التحذيرات والارشادات
ودخل ابو خلف فجأه ومعاه محمد اللي رجع من السفر بعد الخبر لكن كان معهم كيس كبير وفيه كمامات
ابو ناصر: وش ذا !؟ ابو خلف : اشتريت هالكمامات ضد الغاز وتحمي باذن للله من القنابل
ام خلف : وين خلف يا ناصر ما اشوفه
ابو خلف : خليته مع ضاري ونادر بالمحل يوزوعون الكامامات على الناس
ام وعد : ليه خليت العيال في الظروف لو صار لهم شي
محمد : ما صاير لهم شي ان شاء الله ، تووه دورهم بدا وجاء وقت وقفتهم خليهم خليهم
وعد : عمي ماجاك من مبارك خبر!؟ سحر: وعقاب!؟ محمد : لا والله بس يقولون الجيش يستعد وصدام نيته ماهي طيبه
ام ناصر: عسى الله يرد كيده في نحره هاللي انتهك حرمة جارهه وافزع المسلمين وزعزع امنهم
الكل:امين
_______________________.
في ظل هالظروف
كان الوقت يعدي مايدرون كيف يعدي كل واحد يبي يستوعب اللي صاير قد مايقدر عشان يعرف يتصرف
كانت المشادات السياسيه قائمه والاجتماعات في كل مكان وحالات الطوارئ معلنه والجيش على اتم الاستعداد المصير مجهول
هالظروف كانت صعبه على الكويت وشعبها وفي هالظرف بدت العوائل الكويتيه تلجأ للسعوديه وبدت تستقبلهم السعوديه وكل واحد يقدر يساعد ماكان يقصر
_______________________.
من ضمن اللي اعلن مساعدته ووقفته من اللحظه الاولى كان خلف اللي من يوم اعلنوا الغزو وهو مايرجع البيت الا في ايام قليله رغم مرضه وتعبه
كان واقف على الحدود ويساعد هالعوائل للي لجأت لهم بأكل بفلوس بكل شي يقدر يعطيه وكان ينتظر ويتمنى يكون ابو نهيان ضمن هالعوائل ...
وكان ضاري مع خلف وهو مافكر يمنعه ابد بالعكس كان يأيده انهم يكونون خيييير عون لأهل الكويت وهو من بعد رجعته من مكه ما سمع خبر من مضاوي ولا شي جمع بينهم
اخذ امه وتركها مع شوق في بيتها وهو يومياً يتطمن عليها
... نادر وتركي واغلب الشباب ماقصروا ووقفوا هالوقفه العزيزه كانوا مجهزين سيارتهم وكل واحد يروح ويساعد اي عايله تحتاج لهم ... عقاب ومبارك
كانوا من ضمن الجيش المستعدين وينتظرون اوامرهم وهم يحاولون يفتحون الحدود للكويتين
_______________________.
في الكويت
ما استسلموا اهلها ابد رغم الجور والظلم والبغي
كان بيت ابو نهيان تقريباً من أوائل البيوت الموزعه فالمنطقه .. كانت ام نهيان ومريم وليلى وعامتهم وشيخه وكل الحريم مجتمعين يطبخون المتوفر عندهم ويوزعون على بيوت المنطقه والحي ويتقاسمون كل شي مع جارهم ويحمون بعضهم ولا يقصرون
اما ابو نهيان ونهيان : اللي كانوا من اوائل الناس اللي صفوا مع الشباب بالمخابز يخبزون ويزوعون على الاهالي والعوائل والخايف يجيرونه والمطلوب يخشونه عن الجيش العراقي
اما جابر كان من ضمن ابطال مقاومه اللي ماقدر يتكتف ويصبر على الظلم بالعكس كانوا يجاهدون بكل السُبل والطرق
وما كانوا هم بس اللي وقفوا هالوقفه كانوا اهل الكويت كلهم متناصفين الهم والخوف والشغل
كان كل واحد عنده مونه او اكل زايد يطلعه ويوزعه لجاره  كانوا الشباب يجاهدون عشان يأمنون حاجات العوائل
وكانوا اغلب اهل الكويت اللي هجروا من بيتهم ضمتهم اغلب بيوت الكويت الباقيه وصاروا عايله وحده ويد وحده اللي يحتاج يقضون حاجته ، والجايع يطعمونه والخايف والمطلوب يأمنونه وكانت ارواحهم رخيصه بنظرهم مقابل الكويت وفدا للكويت شباب وبنات وشياب وكبار وصغار
وكأن اكبر أوجاعهم ان وجود علم الكويت ببيوتهم صار تهمه بعد ماكان يتعلق بكل عز بنص البيت ، صار وجود صور شيوخ الكويت تهمه بعد ماكانت تزين الشوارع والمكاتب والمدارس
صار كل شي كان يعز الكويتي .. في وقت الغزو يدينه بتهمه وجرم حتى منصبه واسمه وهويته
ومع ذلك كان كل كويتي عزيز نفس ولا يرضى الذل وتشهد لهم دماء الشهداء والمصابين والاسرى
_______________________.
ألين ما مر الشهر الاول
وصار بيت ابو نهيان من أوائل البيوت المطلوبه عند الجيش العراقي بعد ما اكتشفوا انهم يساعدوون
وجاء نهيان بخوف : يبه الجيش يدورون علينا يدورن بيت النوخذه وصلني خبر يدورونا بكل الكويت
فزت ام نهيان بخوف : وش يبون فينا
ابو نهيان: اسمعني يا نهيان : خذ امك وخواتك وزوجتك وياك واطلع لسعوديه
نيهان: وانت يبه
ابو نهيان: انا بقعد بالديره ما اهد الكويت ابد ما اهدها
نهيان: يايبه انت رجال كبير بالعمر واخاف ان صادوك يأذونك
ابو نهيان: فدا الكويت
ركضت ليلى بخوف : يبه الله يخليك لا تقعد هنيه هذولا ما يخافون الله يايبه
..
ام نهيان: لا تخلينا بروحنا يا ابو نهيان ولا والله مانطلع ونتم وياك هنيه يصير علينا اللي يصير عليك
نهيان: يبه انا بعقد بالديره مارح اهدها ابد المهم انتم تكونون بخير
دق الباب بقوه وركض نهيان بخوف وهو يطل وشاف جارهم ركض يفتح الباب : بو يعقوب شنو فيك!؟
بو يعقوب : بسرعه قول لابوك واهلك يفضون البيت ويطلعون الجيش جاي اطلعوا من الباب الخلفي روحوا بيت بو محمد تنطركم السياره هناك قولهم يطلعون على منفذ السعوديه بسرعه
ركض نهيان
نهيان يترجى ابوه اللي ماكان راضي لكن خاف على بناته واهله وطلع وهو ناوي يأمنهم ويرجع كانوا جيرانه ينتظرونه برا وكل واحد مزهب له شي يعطيه اياه لكن بسيط
عطاه واحد السياره وعطاه واحد نور خفيف وعطوه اكل وكل شي يحتاجه وودعوه وهم يدعون له وودعهم وهو حزين مايبي يترك الكويت في هالحال
الكل كان يبكي على فراق الكويت رغم انها في حالة حرب وبدت الاحوال تسوء
كانوا مستعدين يجلسون بالكويت ويتحملون كل شي لكن مايطلعون  لكن نهيان ماراح ابد وبقى في بيت بو محمد وتخبى داخل تانكي الماء لين راحوا وطلع وهو مايبي يطيح في يدهم ديرته تحتاجه برا ومن هنا انطلق مع جابر للمقاومه وماكانوا يقصرون في اي شي تحتاجه ديرتهم
_______________________.
على حدود السعوديه
كان هناك خلف الشباب كلهم كل واحد بسيارته ويساعد العوائل اللي يواجهونه ويضمونهم لاقرب بيت سعودي ويستقبلهم بحب
كان خلف يدعي ان اهل النوخذه بخييير ويدعي ان الله يجيبهم لسعوديه
وفي عز حوسته بالبر وهو يساعد المغرسين في البر شاف سياره
والتفت ينادي : ضاري هنا سياره يا ضاري
ضاري : يلا نبي نلحقها
ركبوا السياره واتجهوا لها كانت سياره ماتتحمل البر وطريقه وغرست وصل خلف ونزل ومعه حبل وهو متلثم بشماغه عن الغبار
دق السياره وهو يقول : حياك الله ياعم في ديرتك الثانيه و... تجمد وهو يناظره بذهول
وجاء ضاري اللي ماشاف هالشخص وقال: قواك الله ياعم... سكتوا كلهم بصدمه وهم يناظرون ابو نهيان وماعرف ابو نهيان ضاري لكن مانسى صوت خلف اللي حافظه زييين وكيف ينساه وهو اللي كسر ثقته في بنته وكسر قلب جابر بفعلته
اتسعت عيونه بغضب وسحب اللثام عن وجهه خلف يبي يتأكد وقال بغضب: هذا انت!؟
ليلى اللي نامت بتعب من الخوف والرعب اللي عاشو فيه غصب عليها نامت وهم شهر مرهقين ينامون وهم خايفين ويصحون خايفين ينامون مايحسون بأنفسهم ويصحون برعب على صوت الرصاص لكن هالمره صحت على صوت اشتاقت له حيل صوت وصل قلبها وهزه فزت وهي تحسبه حلم لكن شافته واقف بجنب الشباك بحاله المبهذل وعيونه الواضح فيها التعب والخوف
وقاال بصوت هادي: النوخذه
ابعده ابو خلف بغضب : ابعد عن سيارتي وعني
تدخل ضاري بسرعه : استهدي بالله ياعمي وحنا هنا عشان نساعدكم
ابو خلف : اخيس هنيه ولا يساعدني هذا
ام نهيان بخوف : يا ابو نهيان تعوذ من ابليس مايصير اللي تسويه
لف عليها بغضب: بس انتي بس
رغم ان خلف متللللللهف انه يلتفت ويناظر ليلى يناظر عيونها لكن عشان مايضرها قدر يمسك نفسه واخذ نفس وهو يقول : انا ادري وانت بعد تدري ان هالوقت مو وقت العداوات الزعل معذور ولك حق بكل شي تسويه لكن انت تخاطر بنفسك وباللي معك خلنا نساعدك
ضاري : ايه ياعم ولا تنسى ان كثير من العوايل ينتظرون بعد
كان ابو نهيان يكابر لاخر لحظه ولكن استسلم لانهم مقطوعين ومالهم الا خلف يساعدهم وخلف رافض انه يروح لين يساعدهم لكن وقف بصرامه ينتظر زلة خلف
اما خلف كأنها الروح توها رجعت له وتوه تنفس وانتعش وبكل حيله كان يساعد ولكن من برا السياره لان ابو نهيان رافض دخوله لسياره ولا احد يعرف السبب الا خلف وليلى
ليلى اللي تجاهد نفسها انها ما تناظر خلف لان نظرات ابوها عليهم وتخاف تصير مصيبه ثانيه
وبعد عناء رفضت السياره تطلع دخلت بعمق التراب والليل بدا يغيم عليهم
والتفت خلف : تعالوا معنا على سيارتنا يا عمي
ابو نهيان بغضب: ماني رايح وياك مكان
ضاري: ياعمي انت رجال كبير وتعبان والليل جاء والمكان ماهو امان تعالوا معنا
كان خلف يدري انه مستحيل يروح معهم وهو موجود وقال بضيق : انا بجلس روحوا انتم مع ضاري لا تروحون معي
ام نهيان: وين تجلس بهالظلمه !؟ ابو نهيان : اقول خذ رفييقك روح بنموت هنيه ولا نروح
ام نهيان : يارجال خاف الله فينا مو كفايه عيالي مدري وينهم هديناهم بيد العدو ماندري شصار فيهم
التفت خلف اللي يحب جابر حييل ومتأكد انه ماله ذنب باللي صار مع اماني لف بصدمه: جابر وييينه !؟ ابو نهيان: مو شغلك جابر رجال وبيظل مع الرجال
عرف خلف انه سب مبطن له لكن معذور وقال : ليه خليتوه للموت
ابو نهيان: يموت شهيد يدافع عن ديرته ولا يموت ردي
ضاري : استهدي بالله ياعمي
..
ام نهيان تعرف ان خلف يحب جابر وجابر بعد ورغم اللي صار وهي ماتعرفه لكن تبي اي احد ينقذ عيالها :جابر بالكويت ونهيان بعد والعدو يدورهم بيذبحهم تكفى ياخلف سو شي
ابو نهيان: عيالي مالك شغل فيهم وبيظلون بالكويت لو يموتون
خلف سكت وهو يقول : المهم تصيرون بخير الحين ضاري خذ النوخذه واهله وودهم لمكان امن
ضاري : ابشر
تحرك الكل لسيارة ضاري لكن خلف ماركب معهم وغصب عليها ليلى لفت بخوف معقوله بيخلونه بالبر لحاله وفي الليل والغبار وهو مريض وصدره مايتحمل ويمكن يطيح بأي لحظه وهو من الصباح يحفر بالتراب والغبار
التفت خلف وشافها فز قلبه بألم لكن غصب عليه صد
وقالت ام نهيان : بتقعد هنيه بروحك لا والله حشى
خلف : ماعليه
ابو نهيان حس بالذنب للمره الاولى من يوم صار اللي صار مهما كان خلف مريض ووحيد امه
ضاري: خلف وين بتجلس
خلف: ادبر نفسي
ابو نيهان: لا تبلينا بموتك واركب
ابتسم خلف بهدوء وقال:ماعليه ياعمي المهم انتم
رفض ابو نيهان يركب الا لين يركب خلف لكن خلف رفض يكون داخل السياره عشان ابو نهيان وقرر يتعلق في اطراف السياره في الحدايد الموجوده وتحركوا وهو طول الوقت متعلق رغم الغبار والتعب والجوع الا انه ما اهتم المهم انه قريب ليلى وقلبه مرتاح كل ما حس انها قريبه
اما ليلى كانت تبكي بصمت وهي تشوف خلف اللي يتصدد عن الغبار ولا يقدر يلتفت لان ابوها يراقبهم
لكن انكسر قلبها على ضاري اللي طلع شماغه وهو يلثم خلف به عشان الغبار و٢٤ ساعه يلتفت له ولا يسرع عشان مايطير التراب عليه ويتعبه اكثر
وماغاب هالمنظر عن ابو نهيان اللي تقطع قلبه عليه
ووصل لمكان ونزل خلف وهو يكح
ونزل ضاري بسرعه: خلف فيك شي
الكل فز بخوف لكن قال خلف :لا بخير بروح لنادر وارجع معه لكن وصلهم لبيتكم او مكان امين تدله
ضاري: زين لكن انتبه لنفسك
خلف : طيب
راح خلف وهو يجاهد نفسه لا يلتفت ويناظر ليلى واول ما وصل عند نادر اللي كانه معه تركي ومن ضمن الشباب اللي قريب الحدود واول ما التفت نادر وشاف حالة خلفف وجهه اللي يغشاه السواد والاحمرار ثوبه مليان طين وغبار
ركض نادر اللي يعرف ملامح خلف اذا اختنق وهاجمته حالات الربو الحاده
مايمديه يوصله الا طاح خلف من طوله وصرخ نادر ينادي تركي اللي صار يعرف وضع خلف وحاولوا يعطونه علاجه لكن ماكان له تأثير قوي وبسرعه انقلوه لاقرب مستشفى
وبعد فتره طلع الدكتور معصب وقابله نادر: دكتور صحى خلف
..
الدكتور: صحى ولكن صدره متشبع بالغبار والتراب كيف تعرضونه لهالكميه من الغبار بدون كمام او اي شي يحميه
تركي : ماعندنا خبر يا دكتور وبعدين هو متلثم بشماغه اول ما وصلنا
رفع الدكتور الشماغ وهو ينفضها بغضب: هذا الشماغ اللي تقوله!؟ شوف الغبار اللي يطلع منه
نادر: طيب يا دكتور هو ما تضرر كثير؟؟ الدكتور: سجل خلف الطبي موجود وقبل ٩ شهور كان في تحسن وقادر انه يحمي صدره ويخفف حالات الربو لكن الفتره الاخيره ماتبشر بخير خلف زاد اهماله وبدا صدره ورئته تضرر مو معقول انه كل اسبوع يتعرض لحاله حاده وانا خايف يجي يوم ويصير ماعاد في يدينا شي نسويه
سكتوا بخوف ولا توقعوا ان حالة خلف بهالسوء وكان نادر ملاحظ هالشهور ان خلف متغير ودايم تعبان وفيه ضيق
الدكتور: ياليت تاخذون الموضوع بجديه
نادر: ابشر
سكتوا ينتظرون خلف يصحى تمام ويكلمهم وهم مايدرون وش يسون فيه
_______________________.
على الحدود
كان هناك عقاب ومبارك والكل ينتظر الامر النهائي
وكان عقاب طول هالشهر ما راح لاهله الا مرتين ومبارك بعد
وفي عز الانتظار تنهد مبارك وقال: الله يستر عسى هالحرب تنتهي قبل تولد وعد
التفت له عقاب بهدوء: ماعليك بتروح ان شاء الله وتشوف ولدك
مبارك: يارب يا عقاب والله يرزقك بالضنى اللي يشيل اسمك
ابتسم له عقاب اول مره من شهور : امين
وعلى سكوته صرخ القائد يقول : استعدووووا القوات العراقيه قريبه
في ثواني انتشروا في ثواني صار كل شي واحد وفعلاً القوات بدت تتجه لسعوديه وبذات الخفجي
استعدوا بكل شي معهم
وبدت الانذارات في كل مكان تعلن ان الخفجي تعرضت لهجوم واحتلال
ووصل الخبر لسكان الخفجي اللي ماكانوا كثير ابداً كانت شبه قريبه وسكانها قليل وكانوا اقرب لمدينة الدمام من الحدود الكويتيه
_______________________.
من هالمنطلق
بدت القوات تقول للمواطنين انهم لازم يخلون المنطقه حفاظاً على سلامتهم
وصل الامر لبيت الجد قايد وابو خلف والحي هم فيه
وبدوا يستعدون بيطلعون لدمام
وكان الجد واقف بخوف وهو يستعجلهم ولاكان فيه الا فيصل وعزوز وسالم وابو خلف فقط والحريم
الكل صار في السيارات ووقف ابو خلف بتوتر: وين راح خلف ابطى ما جاء
ام خلف : ياربي تحفظه يارب
جاء فيصل يركض: يبه اتصل نادر يقول انهم فالدمام وخلف معهم
الجد : اجل يلا خلونا نطلع
ابو خلف : يلا
طلعوا متجهين لدمام وهذا امر ضروري
..
وكلهم في قلق وعد خايفه على مبارك ومضاوي ماتبي تروح لمكان وضاري مايدري وهي توها تحس بالخطر اللي فيه ضاري وخايفه عليه وعلى امه وسحر وخواتها خايفين  على عقاب ووجد مع اهلها وفعلاً كانوا متشتتين
مضاوي : يبه مانبي نترك خالتي وشوق بلحالهم
ابو خلف : بنمرهم وناخذهم
الجد: الله يكشف الضر عنا ويكفينا هالشر
ام ناصر والكل: امييين
_______________________.
وفي بيت ام ضاري كانت شوق عندها وهي خايفه والكل خايف نادر اتصل وقال انه بالدمام وهم وش بيسوون
ماهي الا دقايق وجاء ضاري
اللي بالطريق صادفته القوات وبلغته يغادر هو واللي معه
وصل خايف على امه وشوق
ودخل وهو ينادي : يمه يمه
طلعت ام ضاري : حمدلله ياضاري جيييت سمعت الاخبار يا يمه
ضاري: سمعت سمعت يمه ويلا بسرعه عشان نطلع
ام ضاري : زين زين بس مضاوي
سكت ضاري شوي وقال: بتكون مع اهلها
طلعت شوق وهي جاهزه وصد ضاري يقول : ما جاء نادر
شوق : اتصل يقول انه بالدمام
ضاري : زيين اجل يلا
طلعوا لكن انصدموا بوجود ناس بالسياره والتفت ضاري : حالوا تركبون سواء مامعنا وقت
ركبوا بالقوه لكن شوق سكتت بذهول من رجعت النوخذه واهله وهي تعرف ليلى كذا مره شافتها وام نهيان بعد
والكل تحرك لدمام
_______________________.
في الدمام
بدا ماجد يفتح بيته للكل والكل جاي عنده وحمد ربه مليون مره ان بيته كبييير وبيسعهم
لكن اتصل فيه نادر وقاله انهم نقلوا خلف لمستشفى في الدمام وانه بخير وصحى وحالته مستقره
وبعد ساعات وصلوا عائلة الجد قايد كلهم ماعاد خلف وعقاب
وكان ماجد يستقبلهم واول ما لمح سحر تبكي  تقطع قلبه عليها ولا يلومها واخوها في حرب
ومو بس سحر الكل خايف وبذات عزوز اللي بدت ملامح الخوف تطغى عليه ماخاف من حرب خايف من فقد عقاب
اما مضاوي بدت تخاف وتبكي من اول ما رجعوا من بيت ام ضاري وماحصلوا فيه احد ماتدري وينهم ووش صار لهم ووين راحوا
_______________________.
في احد الشقق
وصل ضاري وهو بالقوه لقى شقه تضفهم نزل وهو محتار كيف بيخليهم ويروح
وقف يناظر بهدوء وقطع عليه صوت ابو نهيان وقال: لا تخاف على اهلك بدير بالي عليهم مثل اهلي
التفت ضاري : اكيد ياعمي مافيه شك ولكن انتم مرتاحين !؟
استعجب ابو نهيان رغم ان اهل الخفجي مصيرهم متشتت مثل الكويتين ولكن مع ذلك كان المهم ان الكويتين مرتاحين ؟! ابتسم بضيقه وقال: ونعم الجار والجوار يا اهل السعوديه هذا هو الجار الصادق ماهو الغدار اللي غزا جاره واغتصب ارضه وشتت اهله وقتلهم
اتجهه له ضاري بعجله وهو يبوس راسه : السعوديه ديرتكم مثل ما الكويت ديرتكم وبأذن الله بترجع كويت العز لكن شده وتزول
غورقت عيون ابو نهيان وقال: ماقصرتوا ما قصرتوا
ضاري بدا عليه الخوف والقلق وقال: هذا مفتااح السياره ياعمي وهاذي الفلوس وكل شي تحتاجونه قريب واحطكم في امانه الله وانا بروح
ابو نهيان:وين بتروح!
ضاري : بروح ادور خلف ماني مرتاح والظاهر انه ماهو بخير
قال كلامه ضاري وطلع مستعجل بعد ماقال لامه وشوق انه بيروح والنوخذه موجود
جلست ام ضاري وشوق مع اهل النوخذه محد يدري وش يقول ووش يواسي كلها مصيبه وصارت عليهم
_______________________.
في المستشفى
من يوم صحى خلف والدكتور معصب عليه وزعلان ويعاتبه انه اهمل صحته ونفسه ومع ذلك ما اهتم خلف اللي من يوم عرف ان اهل الخفجي طلعوا طاح قلبه من الخوف وطلع من المستشفى بيروح لأمه اكيد انها خايفه عليه ولا تدري وينه
نادر: خللللف اسمع الكلام يا خلف هاذي صحتك
خلف : دريت يا نادر خلاص تراك اذيتني
تركي : ياخلف انت سمعت الدكتور وش قال
التفت خلف بضيق وقال: بروح لامي ماني رايح مكان
نادر: لا تطلع لين تصير بخير
خلف : زين
تركي :اجل بروح ادور اهلي انا
نادر: وانا بعد مدري وينه ضاري
التفتوا على صوت الخطوات العالي معرووف صوت ضاري ومعروفه خطواته لفوا ببتسامه يناظرونه وهو جاي يستعجل خطواته من بعيد ووصل وهو يقول: خلف انت طيب
خلف :بخير بخير وش فيك !
ضاري : مدري خفت يصير لك شي
خلف: بخير ماعليك
ضاري: النوخذه واهله بأمان تركتهم مع اهلنا في شقه وجيت
التفت نادر :النوخذه
ضاري : قصه طويله تعال نروح لهم
تركي : زين
خلف : ماتدري وين اهلي!؟ ضاري : لا اخذت ماخلونا نروح لمكان طلعونا من الخفجي على طول
خلف : بشوف عند ماجد اذا ماهم فيه مشكله
ضاري: خلنا نوصلك
نادر: ايه نوصلك ونشوف
طلعوا متجهين لبيت ماجد وهو ماهم مستوعبين كيف الدنيا انقلبت فيهم كذا
_______________________.
في ساحات الجيوش
صار الاصتدام بين جيش العراق وجيش السعودي والحلفاء له واللي من ضمنهم مبارك وعقاب
في  ظل هالاصتدام قدرت قوات العراق تسيطر على الخفجي ورجعوا الجيش السعودي لحدود المناطق الشرقيه اللي كانوا موجودين عليها
وفي هالاصتدام سقط كم شهيد وكان عقاب يدور بالمعسكر يدور مبارك .
. .
ولا توقع انه بعيد لكن وقف يناظر الشهداء ودارت الدنيا فيه وطاح بصدمه اول ماشاف مبارك وواحد منهم ما صدق ابد وراح وتركه مايدري ليه مايبي يصدق ولف المعسكر مليون مره ورجع ووقف بذهول فوق راس مبارك وقرب احد العسكر يقول :تعرف اهل هالعسكري!؟ اسمه مبارك ال... للمره الثانيه طاح على ركبه مايدري ليه هالجزع اللي هو فيه جلس عند راس مبارك بحزن ورفعه وهو يسنده ويناديه ما يتذكر عقاب انه حزن على احد بعد امه وابوه هالكثر الا مبارك انهار عقاب فعلاً انهار وهو يصرخ ويردد بكسر وحزن: لا يا مبارك تكفى يامبارك ولدك يحتريك يا مبارك تكفى لا تموت وتخليه يا مبارك
عقاب اكثر واحد كان يسمع احلام مبارك لللي يرددها واللي ينتظر شوفة ولده بفارغ الصبر كان يعد الليالي والايام عشان تولد وعد لكن ما لحقريشوفه
وهذا اكثر شي عذب عقاب اللي مر في جزع فضيع ورغم ان الكل يحاول يهديه لكن ما فيه فايده كان عقاب متحضن مبارك بالساعات ويبكي وكان يردد هالجمله ( لا تموت ماشفت ولدك يا مبارك لا تموت وتخليه يا مبارك) موقف حزييين احزن المعسكر كامل
بعد ساعات تعب عقاب من البكى ووقف وهو يطلب من القائد انه يوصل مبارك لاهله واخذه هو واحد من العساكر وراحوا
وصل لعقاب خبر انهم في الدمام واتجهووا لدمام وهو ماقدر يسكت ابد
_______________________.
وفي بيت ماجد
وصل خلف وضاري ونادر واستقبلهم ماجد وجلسوا وهم يستفسرون عن العوايل اللي جت وعن الاحداث فالخفجي
خلف : بشوف امي قبل وبعلمكم كل شي
دخل خلف ينادي امه اللي جت تركض وحضتنه: وينك يا يمه وين اختفيت اشغلتني عليك
خلف : كان عندي شغل وجيت يمه
جات وعد : خلف ما تدري عن مبارك
التفت لها خلف: والله مارحت  المعسكر اليوم لكن بيتصلون وان شاء الله انه طيب
وعد : قلبي ماهو مرتاح
ام وعد : تعوذي من ابليس مافيه شي ان شاء الله
حنان: خلف تبي شي شكلك جوعان
خلف : انا لا لكن حطوا لضاري ونادر اكل هذا هم معي
ام ناصر: وينها ام ضاري وشوق
خلف: اخذوا لهم شقه وهذا هم فيها
ركضت وجدان تقول لمضاوي اللي جت بسرعه: خلف ضاري معك !؟ خلف : ايه هذا هو بالمجلس
مضاوي : وين خالتي ماجت معه
خلف : حطها بشقه هي وشوق وبيرجع لهم هو ونادر
سكتت مضاوي وراحت بهدوء تنادي غيث وهمست له: روح ناد ضاري
ركض لضاري اللي ماطرا له ينادي مضاوي ولا يكلمها لكن انصدم بغيث اللي جاء وهو يهمس يأذنه : عمتي مضاوي تبيك
وفز ضاري واعتدل والتفت له ماجد : وين!؟؟
ضاري : ا اهلي يبوني
..
فيصل : خلني اشوف الطريق
ضاري : ايه
راح فيصل ورجع : الغرفه اللي يمينك
تقدم ضاري وقلبه يدق من شهر وشوي ماشافها ولا يدري عنها كان يحس انه غريب بهاللحظه
دخل ومثل ما تعود شافها واقفه بارتباك على وجهها ابتسامه خفيفه لكن مليانه خوف
مضاوي اللي ماتدري كيف بتتصرف وتكلمه وهو قال مايبيها وبيطلقها لكن همها الاكبر أم ضاري اللي كبيره بالسن وضاري يروح ولا يرجع الا متأخر والدنيا حرب ولو يصير لها شي شوق ما تعرف تصرف وقفت تناظره لفتره كان شوي متغير عن ما عهدت
وصل لها صوته اللي لاول مره يكون هادي : سلام عليكم
مضاوي: عليكم السلام
كانت للحين بعيد وأول شي قالته: وين خالتي!؟ ما اشوفها معك !؟ ما كانت بالبيت اول ما رحنا نبي ناخذها
سكت ضاري اللي رغم انه اكثر شي تخوف منه بزواجه ان مضاوي تأذي امه لكن على عكس ظنه كانت العلاقه بين امه ومضاوي شي عظيييم لدرجة ان امه تناصر مضاوي  عليه وتزعل اذا زعلها وتحبها ومضاوي بعد وهذا اكثر شي يشفع لمضاوي
ضاري :امي بخير اخذتها انا مع شوق وهذا هم بشقه قريبه من هنا
مضاوي :جيبها هنا لو يصير لها شي لا سمح الله وانت مو فيه وش بتسوي
ضاري :معها شوق
مضاوي :شوق تبي من ينتبهه لها هي بعد جيبهم كلهم هنا
ضاري:بيت الرجال مزحوم خلقه مابي ازحمه
سكتت مضاوي بضيق بان على ملامحها وماعرف ضاري وش يقول تحرك بيروح لكن التفت في اخر لحظه وقال : ليه ما تجين معي لأمي وتجلسين معها هالفتره لان الاوضاع هالايام متوتره واخاف علي.. انقطع كلامه على صوت ازعاج برا وارعبهم صوت ابو خلف يقول : لا اله الا الله لا اله الا الله ، الله واكبر عليهم
ترك مضاوي وركض برا وتجمد وهو يشوف عقاب واقف بدلته مليانه دم وعيونه حمرا ومغورقه بالدموع ومعه عسكري واقف بعد وحزين
مايدري وش السالفه بس شاف خلف وفيصل وعزوز وماجد والجد ومحمد ونادر كلهم واقفين عند السياره  وملامح الحزن على وجيهم ركض واول ما قرب شاف يد رجال مليانه دم ورفع عينه لوجهه وصد بضيق صح مايعرفه كثير لكن كان يشوفه هذا مبارك  مايدري كيف شالته خطواته واتجهه لعقاب المنهار وقرب وهو يحضنه لاول مره يشوفه منهار بهالطريقه ولا مانع عقاب تعلق بضاري بكل حيله مايدري ليه ماهو قادر يتحمل اللي صار
كان ضاري يحاول يهديه لكن مايدري كيف
ابعدوا برعب مايدرون وش يسوون والتفت الجد بحزن: وشلون مات ياعقاب
مارد عقاب الا بعد فتره وقال: مدري مدري لقيته بين الشهداء مدري كيف مات
فيصل بخوف : وشلون نقول لوعد وشلون نقول لها .

#لطفا وليس امرا / لاتنسواااا متابعة صفحتي على الواتباد
#روايات _أديم_الراشد

.
*ـــــــ((( @ahgeel )))ـــــــ*
*, #ﺃلى_هنا_اقفل_ﺣﺪﻳﻘﺘﻲ_الـ35*
*📚 #يتبع👇🏻💜*..
..
*طبعا الرواية تم نشرها كامل في التلجرام لمن يريدها كاملة انضم بقناتنا على التلجرام
رابط القناة بالتلجرام ⇐ t.me/ahgeel
قم بنسخ الرابط وابحث في التلجرام ...