هو أنا الي وحشة ولا العالم الي كله ناس قاسية؟
لا العالم الي قاسي طبعا
قومت من مكاني بسرعة وبصيت ورايا بارتباك، فلقيت شاب واقف وحاطت إيده في جيبه بيبصلي باستفهام
رفع نضارته الشمس وقال: بتعملي أيه ورا الشجر يا آنسة
بصيت حواليا بارتباك وقولت: مش بعمل حاجة
رد عليا بثبات: أومال جاية المكان الي مفهوش حد ده لوحدك ليه
رديت بتوتر: والله لما الجامعة تبقى تكتب عليه مكان ممنوع الدخول فيه أبقى مجيش تاني
لبس نضارته تاني وقال: أنا الي بقولك متجيش المكان ده لوحدك تاني
وقفت ورا الشجر تاني وأنا بقول بلا مبالاة: المرة الجاية ماشي
جه جنبي عند الشجر وقال بحدة: هو أنا مش قولت........
قطع كلامه لما شاف الي كاتباه على الحيطة الي كانت متدارية ورا الشجر الكتير الي كان جنب بعضه
قال باستغراب: هو أيه ده بقى
بصيت للحيطة بحزن والي كان مكتوب عليها: مش هعيط تاني، محدش هيقدر يجرحني تاني، مش هسمح لحد يهز ثقتي في نفسي تاني
وعلى كل الكلام ده محطوت علامة x بالاحمر
بصيتله تاني وقولت: هو أنا ملاحظة إن حضرتك دخلت في حياتي فجأة من غير أي حق، وأنا مش هسم............
قطعت كلامي لما سمعت صوت مخيف جاي من قدام الشجر، فقولت بخوف: أنت سامع الي أنا سامعاه ولا أنا بحلم
ابتسم ابتسامة مستفزة وقال: لا سامع طبعا، بس متقلقيش ده تعبان صغير قد كده، بيحب كل يوم يمر من هنا، بس عادي متخديش في بالك
مسكت في دراعه بخوف وقولت: أنت أكيد بتهزر صح، أنا كل يوم باجي هنا ومش بلاقي حاجة
هز راسه بالنفي وهو بيقول: هو أنت مش سامعة صوته
هزيت راسي بآه فكمل كلامه وقال: خلاص يبقى أنا مبكدبش
روحت جنب الشجر شوية فشوفت تعبان فعلا فرجعتله تاني بسرعة وأنا بقول: ده تعبان بجد، اتصرف ونبي
طلع من الجنب التاني الي بعيد عن التعبان وشاورلي أجي وراه، مشيت وراه وأنا خايفة لحد ما طلعنا من المكان
بصلي بسخرية وقال: عرفتي ليه بقولك متجيش هنا تاني، بس عامة أنت حرة.....والله اعلم يمكن المرة الجاية تلاقي نمر، أصلهم بيعملوا ورديات، شوية تعابين وشوية نمور، والأسود كمان هي جت عليهم
رفع نضارته شوية وبصلي بسخرية وبعدها مشي
سندت على الحيطة وأنا بقول: يعني يا رب المكان الي شهد نكدي من أول السنة هسيبه بالسهولة دي
