الجزء الثالث
♡♡♡♡♡♡♡♡♡♡♡♡♡♡♡♡♡♡
برقت عيني بصدمة لما لقيت اسمي منور في السما بالأحمر، ورسالة جت على صراحة ومكتوب فيها: وحشتيني يا حور
دموعي نزلت اكتر وفضلت باصة للاسم بفرحة وبابتسم بسعادة
حور: فينك، التفتت لمريم الي بتكلمني وقولت: بصي يا مريم اسمي الي منور في السما
مريم قالت باستغراب: اسم أيه أنا مش شايفة حاجة
بصيت تاني فملقتش الاسم المنور، فقولت باستغراب: ازاي ده
مريم شدتني من إيدي وهي بتقول: يلا يا حور يلا، مش وقته تعالي اقعدي معانا برة
خرجت مع مريم وعيني لسه متعلقة في المكان الي كان فيه الاسم ومنور
قعدت على الكنبة جنب مريم وزياد قعد قدامي ع الكنبة التانية وكان بيبص ناحيتي بغموض فدورت وشي بعيد عنه
صاحب زياد شوية واستئذن ومشي، وفضلت أنا ومريم نرتب الدنيا، وبعد شوية قولتلها إني ماشية
ولسه هفتح الباب وامشي سمعت زياد بيقول: رايحة فين
قولت من غير ما ابص ناحيته: ماشية
طيب يلا عشان اوصلك، الوقت اتأخر ومينفعش تروحي لوحدك
بصيتله وقولت: لا شكرا، أنا متعودة اروح متأخر عادي
قال بسخرية: لما تبقي لوحدك ابقي اعملي الي تحبيه، بس لما تبقي في بيتنا هتعملي الي اقوله
وأنا هعمل الي عايزاه في الحالتين، ومتشكرة لخدمات حضرتك
مريم جت وقالت: هو في أيه
زياد قال: قولي لصاحبتك المحترمة تخليني اوصلها وتبطل شغل عيال
مريم قالت: يا حور خليه يوصلك، الوقت اتأخر
وقبل ما اتكلم مريم قالت: عشان خاطري أنا
********
بصيت للطريق بشرود واتجنبت الكلام مع زياد الي كان قاعد جنبي وبيسوق العربية ومتكلمش ولا كلمة
اضطريت اروح معاه بعد محايلات مريم
بصيت ناحيته لما قال: ايه اخبار الولد بتاع صراحة
معنى سؤالك بس عشان مش فاهمة
يعني بسأل لسه برضو عايزة تبلغي ولا خلاص
لا خلاص، أصلي رديت عليه وتقريبا في مشروع خطوبة قريب، وعملت بنصيحتك ولعبت بعيد فعلا، بس لعبت صح يا حضرت الظابط متقلقش
لا أنا مش قلقان خالص، أنا عارف إن سكة اللعب بعيد دي سكتك أنت، وخصوصا لو اللعب ليه علاقة بمشاعر الناس، أنت بقى في الحتة دي تاخدي جايزة نوبل
