يعني أوقات بحس إني محتاجة حد جنبي، أوقات كتير بحس إني لوحدي أوي رغم إني في لمة، وأوقات بحس إني مش مبسوطة وأنا حواليا ناس، أنا مش عارفة أنا عاوزة أيه، هو أنا كده ابقى مجنونة يا عمر؟
بصي أنا بقول تقومي تعملي لنا كوبيتين شاي وبكرة نكمل ممكن
بس كده حاضر، يا حضرت الدكتور من عيني
ابتسم وقالي: عيون الدكتور يا شهود
ضحكتله وقومت اعمل الشاي وأنا حاسة إني مرتاحة، حاسة إني مرتاحة عشان طلعت الي جوايا لحد، أنا وعمر اتجوزنا بطريقة غريبة جدا مبنحبش بعض آه بس علاقتنا فيها حاجة حلوة أنا بحبها، هو فاهمني أوي مش عارفة هل ده عشان هو دكتور نفسي ولا عشان هو فاهمني فعلا؟
أهلنا أجبرونا نتجوز بعض بحكم العشرة الي بينهم من زمان فكان لازم ولادهم هما كمان يبقوا مع بعض، وأنا وهو وافقنا عشان ميحصلش مشاكل واتفقنا إننا صحاب وبس مش أكتر من كده لإن ولا أنا ولا هو عاوزين نتجوز أصلا
قلبت الشاي وخدته وروحت لعمر البلاكونة وقولتله: الشاي يا دكتور
شكرا يا سيادة الصحافية، بقولك صحيح مش ناوية تعملي معايا بقى لقاء صحفي كده
ابتسمت بسخرية وقولتله: مش لما ألاقي مكان اشتغل فيه الأول بس، والله حتى لو جريدة تحت السلم أي حاجة موافقة
أنت شطورة يا شهد وأكيد بكرة هتلاقي شغل، ليه مستعجلة لازم نصبر شوية، يعني عندك أنا أهو معملتش العيادة بسهولة أنت أكتر واحدة عارفة أنا تعبت قد أيه لحد ما وصلت لهنا
اتنهدت وقولت: بس أنا ابتديت اصدق كلامهم، كان لازم ادخل حقوق عشان كل العيلة محاميين أنا الي صممت على إعلام عشان بحبها، بس النتيجة أيه قاعدة مش لاقية شغل أهو، تعرف أنا كل حاجة بعملها غلط يا عمر
عارفة يا شهد مشكلتك إنك مش صبورة، أنت لسه متخرجة بقالك كام شهر مش طبيعي أبدا تلاقي الجرايد كلها مستنياكي عشان تشتغلي عندهم، أصلا لازم تبدأي السلم من أوله، لكن أنت عاوزة تطلعي على اخر سلمة علطول، ثم إن عيلتك كلها الي اتخرجوا من حقوق عملوا ايه نصهم قاعد برضو مش لاقي شغل، الحياة مش سهلة يا شهد لازم يبقى في معافرة عشان نستحق نوصل
أنت معاك حق بصراحة، طيب بص أنا هحاول بس، ممكن تخليك معايا
هز راسه وقال: أنا ديما موجود يا شهد، يلا بقى ننام عشان عندي شغل بدري
...........................................................................................
ها يا ستي أخبار الثيرابيست بتاعك ايه بقى؟
قولت لها بضيق: حور قولت مية مرة محدش ليه دعوة بعلاقتي بعمر صح ولا لا
ردت مريم صاحبتي التانية: حور ملكيش دعوة بعمر بقى هو ده في زيه، يا جدعان نفسي حد يقعد يسمعني كده ياه، يا رب اوعدنا
