#البارت_السابع
#عشگ_الاربعين
رقيه _ شكووو احمد احجي فاطمه بيهه شي
احمد _ماتت...... فاطمه ماتت
بس كال هيج انهاريت كعدت بلكاع والطم عله وجهي واصيح.. احمد كعد عله الدرج مصدوم وساكت وحسين شال علاوي ويباوع عليه.. اني فقدت ضليت اضرب وجهي وباضافيري حته دم طلع.. حسين من شافني هيج نزل علاوي وكعد يمي لزم اديه بثنين اديه حيل
حسين _ كافييي رقيه مو هيج تسوين بروحج
رقيه _ عووفنيي..... ولكم بعدهه صغيره والله مو مال مووت شلوووون تموت كلولي... ويبقى سامر عايش ومرتاح.. واختي راحت من ورى
بس سمعني احمد هيج كلت طفر
احمد _ منو هذا سامر منين تعرفينه... ولج احجي راححح اتخبل
اجه يريد يجرني حسين عله كعدته لازم ايدي عاط بي.. مااتوصل لرقيه وخررر بعدين اسولفلك
ضل يعيط وراح يم ابوي يسولفله ويغلط... اني فاقده احس روحي جاي تطلع مني مااهتميت لابني اليبجي ولا لحسين وكعدته يمي...
رقيه _ كون متعوفو متهني.. ضحك عليهه.. ودمر حياتهه.. الموووت مو الهه.. والله بعدهه صغيره
جرني حسين وحضني حييل وضل يحجي يم أذني جانت كلماته كافيه تهدئني شويه
حسين _ كافي والله منعوفه بس اهدئي وصيري أقوى من هيج...
وخر ولزم وجهي بثنين اديه
حسين _ سمعيني رقيه.. شو باوعيلي راح اروح هسه اي احد يجي يسألج كلشي لاتحجين ماشي لاجيبين طاري سامر لو حامل
هزيت راسي اي عافني وراح لاحمد
حسين _ يلا احمد خل نروح امك وحدهه بلمستشفى
احمد _ دليني عله سامر منو هذا قندره
حسين _ امشي هسه صار الليل وامك وحدهه انكمل الاجراءات وبعدين نفرغله اني احجيلك بلطريق
اخذه وطلعو... بدت الناس منو يسمع يجي انترس بيتنه نسوان وكلهه تسأل شلون ماتت؟ وليش؟ اني مااجاوب بس الحجي وحده يطلع هاي تكول انتحرت وهاي تكول مريضه وكلمن وحدهه طلعت سالفه.....
اخذوهه من المستشفى ودفنوهه ماجابوهه للبيت ضلت روح تفرفح عليهه.. ليش ماخلوني اودعهه للفجر ياله اجوو دخلت امي رازقيه تصيح من الباب ولنسوان وياهه.. حالتهه منتهيه كعدت بلكاع وتلطم اجيت يمهه وابجي وياهه نضراتهه الي تحجي كانما تكولي ليش جنتي ساكته ليش ضميتي عليه.. بس متكدر تحجي..
ثاني يوم سوينه الفاتحه.. اجت الحجيه ولبنات كلهن ضلن يمنه وعلاوي ماادري عنه بقى يم زينب.. خلصت الفاتحه بس حالنه كلش صعب امي كل ساعه تتخربط وياخذوهه للمستشفى.. ابوي بس الدموع تنزل منه مايكدر يحجي ولا يكوم..
الحجيه _ رقيه باجر نرد احنه حسين يكول تمشين ويانه
