الفصل الاول : crímenes de Amor
#EL_OSO⚡
🥀RØSÀ🖋️
🦋 MARIPOSA 🖋️
.....
ضيق لاشان عينيه و هو كيشوف فيه ، و آدم غير كيورك على سنانو و يديه بعصبية ماكهرش يجبد سلاحو و يضرب رصاصة وحدة ينوض الحرب تماك .. كلو شاعل بسبب الديبو اللي تحرق .. و المتهم الرئيسي واقف قدامو بهدوء و ابتسامة مستفزة و كيهضر بحالا ماواقع والو ... بحالا راه فاقد الذاكرة على تاريخهم الدامي و حربهم اللي كيعقل عليها من نهار بدا كيفهم فالدنيا ...
الريُّوس: (شاف فآدم) رخي فيك النفس شوية أولدي و رتاح ... هاد التغوبيشة غادي غير تخلي التجاعيد يترسمو على وجهك الوسيم قبل الوقت ... و العصبية غادي تنقص من عمرك ... كون بشوش بحال عمك الريُّوس ...
لاشان عارف آدم على نقشة و ماشي وقت مناسب نهاائيا باش يتعرض لشي استفزاز .. داكشي علاش قبلما توقع شي كارثة هضر و عينيه على الريوس و بصوت مرتفع ...
لاشان: أدههم ...
الريوس: (شاف فيه و جاوبو بنفس نبرة الصوت) عمممر...
بجوج بيهم كيكرهو شي واحد يناديهم بأسمائهم الحقيقية ... لحظة دازت فيها لاشان كيخنزر فالريوس و الريوس كيشوف فيه بنظرات باردين .. من بعدهم رجع لإبتسامتو و كمل طريقو لداخل الفيلا و هو كيهضر براحة مامديهاش فالجو المشحون اللي وراه و العيون اللي غادي تحرقو غير بشوفاتها ...
الريوس: مراتك كتطيب شي ماكلة من داكشي أسي لاشان ... مزال عاقل على اخر طبق كليت عندكم ... الطاجين باللحم و البرقووق.. اممم...
لاشان: (شاف فآدم) هضرتي معاه؟ هو عارف باللي الريوس عندنا؟
آدم: (عينيه على الريوس اللي اختفى خلف الباب) اه عارف ...
مشا لاشان داخل تابع الريوس و آدم معاه ... فاش دخلو لقاو السيد جالس براااحة فوق الفوتوي رجل فوق رجل كيكمي السيگار ديالو و كيضور عينيه فالفيلا من لداخل ...
الريوس: هاد الديكور مزال ماناوينش تبدلوه؟ كيسد النفس صراحة ... ديرو شي لوينات مبهجين شوية ... الوردي و الأزرق ...
آدم ضار عاطيه بالظهر كيدوز يدو على وجهو و كيتنهد بعصبية ماقادرش يستحملو ... كيكره هاداك البرود اللي فيه .. كيكره هضرتو و ابتسامتو ... كان كتلة متحركة من الإستفزاز كتدور بيه....
لاشان: (جلس مقابل معاه) علاش جيتي لهنا؟
الريوس: نتسناو تا يجي مول الشي عاد نهضرو ... فين هي بنتي مابانتش ليا؟
لاشان: بنتك دات ولدها للمدرسة ...
نتر من السيگار ديالو و سكت مراقبهم .. كيتلذذ بهاداك الغضب اللي كيشوف فعينيهم ... كيعجبو الحال يشوفهم هاكاك معصبين فحضرتو و فنفس الوقت ماقادرين يديرو والو ....
الدقايق كانوا كيدوزو ثقااااال على لاشان و آدم .. و عاديين عند الريوس ....
حتى سمعو صوت فران قوي و عيونهم تعلقو بالباب ... عرفوه وصل ....
نزل من الطوموبيل اللي مزينة بدماء حمراء فالمقدمة ديالها، بسواد حوايجو و شعرو اللي نازل على كتافو و قرفادتو..
مزير قبضات يديه و خطواتو عراض .. و بسبب ضخامة جسمو كلشي الرجال كيسمعو رجليه فاش كيضربو الأرض .. ماوقفش باش يشوف فرجال الريوس اللي كلهم تزعزعو عينيهم فحضرتو واخا حاولو مايبينوش ...
داخل نيشان لفين جالسين ... غير شافو الريوس حل يديه كيرحب بيه بهاديك الابتسامة و كلامو اللي واخا مبرد و هادئ كان بحال ليصانص بالنسبة لهاديك العائلة اللي كلها شاعلة فيها العافية بسبب السلعة اللي تسرقات ليهم ...
الريوس: نسيبي العزيييييز!!!
كمل طريقو و جلس فالفوتوي اللي فجنب الريوس ... و نطق بنفس الصوت اللي كون سمعوه رجال الريوس فالخارج كان الخوف غايبان فعينيهم..
****: واش نتا اللي سرقتي السلاح؟
الريوس: نسيبي العزيز .. أولا خاصك تبوس ليا يدي و تسلم عليا و نرضي عليك ... هادو هوما الأصول...
مد ليه يدو باش يبوسها ليه ... عارفو ماغاديش يديرها ... و عارف بلي علاقتهم الحاجة الوحيدة اللي ممكن يستعملو فيها يديهم ماشي السلام انما باش يضغطو الزناد فوجاه بعضياتهم...
و لكن هاداك هو الريوس زعيم أكبر عصابة تهريب و تجارة بالمخدرات فالمنظمة ... بطبعو مستفز ...
الريوس: (رجع يدو عندو و حيد الإبتسامة من على وجهو) ثانيا ... كيفاش تشك فيا ؟ أنا أنسيبي العزيز؟! بصراحة فاش سمعت هادشي قلبي تجرح ...(حط يدو على قلبو) أنا وليت حزين أولدي..
آدم صافي ولا غير كيزفر الهواء بغضب و صوت مرتفع ماقادرش يصبر .. و لاشان غير كيشوف فالريوس و ماعارفش هاديك الليلة واش غاتسالي بيخير ولا بحرب كبيرة وسط الفيلا ديالهم ..!
****: واش نتا اللي سرقتي السلاح ؟ ماغاديش نسولك للمرة الثالثة ..
الريوس: (أخيرا هضر بجدية و لكن نفس البرود) 500 كيلو اللي تسرقات ليا .. و حتى انا حرقو ليا الديبو...
آدم أخيرا شاف فيه باهتمام و جلس جنب لاشان كيسمع ...
لاشان: يعني هادا شي واحد مستهدفنا ...
الريوس: هاداك الانجليزي الموسخ ... دانييل ..
آدم: دانييل !! و باش عرفتيه هو؟
الريوس: (بابتسامة) عمك عندو الطرق ديالو أولدي .. (شاف فهاداك اللي جنبو) ملي تأكدت بلي هو جيت عند نسيبي باش نقولها ليه ... دابا واش نتكلف بيه بوحدي ... ولا بجوج؟
وقف خارج و كيهضر و هوما مراقبينو من اللور ...
****: آدم جمع الرجال .... الليلة غاتكون حفلة شواء كبيرة ففيلا دانييل ...
الريوس: (وقف و حط السيگار ففمو) حفلة! حتى رجالي كيعجبوهم الحفلات ...!
أنت تقرأ
EL_OSO
ActionE L 🐻❄ Ø S Ø القصة تتحدث عن " يَاسَمِين " الفتاة المكافحة التي ستهاجر الى اسبانيا من اجل البحث عن الذات لتلتقي بمهوسها " el oso " الذي سيحول حياتها الهادئة الى جحيم ..... تابعو قصة " el oso " التي تُبحر في مواضيع كثيرة : منظمات...
