الفصل الاول : crímenes de Amor
#EL_OSO⚡
🥀RØSÀ🖋️
🦋 MariPosa🦋
......
الأوصو ماداهاش فيه ... كان راسو عامر بحوايج اخرين خاصو يركز عليهم بعيدا على الريوس و حركاتو و هضرتو لي ايلا دار فيها راسو غايصدق قاتلو تماك مع دانييل ...
ضار تحرك وقف مع الرجال و حتى الريوس تمشى بشوية و وقف حداه .... السكوت و الصمت المطبق مكيهضر حد غير كيتسناو ....
شوية و تسمع صوت مروحية آخرة ... هاد المرة كانت جاية من الشرق ... نفس الإتجاه اللي مشات فيه الطوموبيل لي كانت هازا آدم ....
كلشي بقى واقف بهدوء و المروحية بقات كتقرب حتى وقفات فوق الفيلا ... بدات كتنزل كتقرب للأرض من بعد تحلو البيبان ديالها بجوج و فكل باب كان واقف رجل قدامو برميل بلاستيكي كبيير ... حلوهم و بدا هاداك السائل كيطيح على الأرض و المروحية كتتحرك فوق أراضي الحديقة و أسطح الفيلا ....
عملية دامت لدقائق غطاو فيها كل ركن من هاديك البلاصة بهاداك السائل ... و انسحبت المروحية من نفس الطريق اللي جات منها....
------
∆بعد دقائق∆
ألم كبير فراسو .... الفك ديالو كيضرو بزاااف عاطيه الحريق .... و الرصاصة لي فرجلو حتى هي كتحرقو بلا قياس .... جسمو كلو كيضرو بحالا ضارباه شي طوموبيل .... زير على عينيه بألم و هو كيحاول يجلس ... شد راسو بيدو و هو ماعاقل على والو من شنو وقع معاه ... فجأة صدموه الذكريات دقة وحدة ... حل عينيه بالزربة و وقف بسرعة كيعرج برجلو عيونو موسعين بصدمة و دهشة و أنفاسو رجعو اضطربو بحال فاش كان كيشوف فالأوصو ...
واقف فوسط الحديقة و قدامو الفيلا ديالو مضوي عليها غير القمر المكتمل و العافية الضخمة اللي شاعلة فمولد الكهرباء ...
كيبانو ليه رجالو طايحين فكل جهة مزلعين حداه ... ضار وراه بشوية و شهق ملي بان ليه الريوس واقف بهدوء و ابتسامة على وجهو جامع يديه قدامو بأدب و لباقة ....
دانييل: (كيحاول يعرج و يتراجع) لا ..... الريوس لاا ...
الريوس: (مد يديه قدامو كيهدنو) كالما ... تهدن ماتخافش .. ماتخافش ....
دانييل: (بصوت متقطع) أنا ... أنا غلطت ... غلطت معاكم .... مابغيتش نمووت ..... أنا مكلخ .... ماكانش ... ماكانش خاصني نسرق السلعة ... (ضرب راسو) ماكاانش خااصني نسرقهااا ...
الريوس: (بابتسامة و هدوء) أمييغوو تهدن .... ماجيتش باش نآديك ... أنا ماشي بحال هاداك المتوحش ديال نسيبي .. ماتخافش مني ...
دانييل: غادي نرجع ليكم لفلوس ديال السلعة .... نعوضكم .....
الريوس: (زاد وسع ابتسامتو) مزيان ...
دانييل: غادي نخلصكم على الأضرار كلها اللي درت ....
الريوس: أنا موافق ...
دانييل: (مد عنقو كيطل على الأوصو لي ورا الريوس بعيد عليه غير بأمتار قليلة) و الأوصو؟
الريوس: تا هو غايوافق ...
دانييل كان قريب يبكي ... فاش وصلات الأمور لهاديك المرحلة عاد وعى بحجم الغلط اللي دار ... هو غير مبتدئ فالمجال ماعارفش بحق الحرب ... مزال حاس براسو تحگر و لكن إحساس الخوف كان أقوى من جميع المشاعر فالداخل ديالو ... ولا مستعد يقول أي حاجة و يدير أي حاجة غير يخرج منها حي .... مزال ماباغيش يموت و مزال كيشوف راسو صغير باش يعيش بزاف ديال لحوايج ....
الريوس: باباك مات غير 3 شهور هادي و نتا توليتي الرئاسة من بعدو .... كان خاصك تكون دكي أولدي بحالو ... سنين حياتو كلها دوزها و هو مبعد من منطقتنا و ماعمرو قرب لجهتنا حيت عارف راسو ماغاديش يقدر على الغضب ديالنا... و لكن نتا كنتي مكلخ و تغريتي ... (بغا يهضر دانييل قاطعو) و لكن صافي ... كيف قلتي غاتخلص و أنا و الأوصو غاننساو هادشي اللي وقع ليوم بحالا ماعمرو كان ....
دانييل أومأ براسو و الريوس حل يديه بابتسامة باغي يعنق دانييل ... دانييل بلع ريقو متفاجئ من الحركة و لكن مافكرش فيها بزاف ... باغي عناق؟ يعطيه عناق غير يتفك و يخرج من تماك على رجليه ...
قربو بجوج من بعضياتهم و الريوس عنقو ... دانييل حس بهاداك الحضن دافئ و بدا كيرتاح و دقات قلبو كتنتظم ... تنهد برااحة و زفر الهواء لخارج صدرو ....
الريوس: (مزال معنق دانييل حدر راسو شوية و همس ليه فودنو) و لكن غاتخلص بحياتك ....
وسع دانييل عينيه و قبلما يدفعو و يبعد كان الريوس شد ليه راسو بيديه و ضورو بسرعة و قوة ...
تسمعات صوت شهقة و تطرطيقة طاح من وراها دانييل جثة على الأرض ...
قرن الريوس حجبانو بمفاجأة ....
الريوس: مات!!!
ضار كيشوف فالأوصو اللي وراه و الرجال و ميل راسو بحزن ....
بدا كيسوس فيديه و كيخرج لعندهم .. شاف ففرانك و هضر و هو مزال كيتمشى ...
الريوس: صوني عليهم فالفيلا و قول ليهم يوجدو ليا الدبدبوب ديالي باش نعنقو هاد الليلة .... حيت كيبان ليا ماغاديش نقدر ننعس بسبب الكوابيس ...
ضغط الأوصو على الفك ديالو حيت اللقب ديالو كيعني (الدب) و عارف بلي الريوس كيحاول يستفزو بكلمة (دبدوب) ...
و لكن ماتجاوبش مع الإستفزاز ديالو ... بقا واقف بهدوء و برود ...
السائق حل الباب للريوس ركب و ركب تا هو كيسوق بيه بعيد على الفيلا ... الرجال كلهم ركبو حتى هوما و تبعوهم .... بقا غير الأوصو ... فاش سمع صوت المحركات بعدو مشا فاتجاه الطوموبيل ديالو ... ركب فيها و سد الباب ..... ثواني و نزل الزاج و خرج يدو لي فيها قنبلة .... زف بيها لداخل الجردة و ديمارا من تماك ....
كيسوق بيدو و كيشوف في المراية لي جنب اللوطو حتى بانت ليه القنبلة انفجرت و العافية شدات فليصانص لي رشات المروحية ... بقات كتنتشر بسرعة حتى شعلات فالفيلا كللها ... كتحرقها و كتحرق حتى الجثث لي خلاو فيها .....
طلع الزاج و كمل طريقو ....
المهمة صافي اكتملت ...
أنت تقرأ
EL_OSO
ActionE L 🐻❄ Ø S Ø القصة تتحدث عن " يَاسَمِين " الفتاة المكافحة التي ستهاجر الى اسبانيا من اجل البحث عن الذات لتلتقي بمهوسها " el oso " الذي سيحول حياتها الهادئة الى جحيم ..... تابعو قصة " el oso " التي تُبحر في مواضيع كثيرة : منظمات...
