الفصل الاول : crímenes de Amor
#EL_OSO⚡
🥀RØSÀ🖋️
🦋 MariPosa🦋
......
فبلاصة بعيدة على هاداك الديبو كانت اللوطو ديال الريُّوس واقفة فواحد الطريق ترابي خاوي فوسط واحد الغابة .... و حداها الطوموبيلات لاخرين اللي فيهم الرجال ديالو .....
كان السائق واقف خارج السيارة مشعل گارو كيكميه و كيشوف فالاتجاهات بجوج ديال الطريق ...
بينما لداخل كان جالس الريوس اللور براحة رجل فوق رجل السيگار بين صبعانو طالع منو خيط من الدخان ... ريحتو تخلطات بريحة الريوس الغالية و ريحة الجلد ديال الكوسان الجديد ...
كيشوف قدامو و عينيه كيلمعو واضح بلي كيفكر و عقلو خدام ....
حداه جالس المساعد ديالو و يدو اليمنى لي سميتو فرانك و لكن كلشي كيعيط ليه "بي إن" ... و هو اختصار للقب ديالو BLACK NIGHTMARE (الكابوس الأسود) ... رجل من الأفارقة الأمريكيين ... أصلع و حليق الذقن ... حتى هو لابس سترة مضادة للرصاص و فيديه بندقية كحلة كبيرة ملقمة ..... كيشوف فالريوس و كيتسنى فالأوامر ....
الريُّوس: (نفث الريوس الدخان من فمو بهدووء و هضر بلاما يشوف جهة فرانك) نتوما غاديين فحرب ضد عصابة ... و لكن ديرو فبالكم بلي يمكن فأي لحظة تولي ضد جوج .... عارف بلي هوما ماشي مكلخين باش يخالفو أوامر المنظمة ... و لكن تا واحد مايقدر يتوقع شنو يمكن يوقع فالميدان ملي كيكون الدم سخون ....
فرانك: واخا أسيدي كون هاني ....
خرج من الطوموبيل ديال الريوس و بان شحال هو بصح طويل ... مشا بخطوات عريضة ركب فطوموبيل رباعية الدفع حدا مقعد السائق ....
هز اللاسلكي و هضر فيه باش يسمعوه الرجال كلهم ...
فرانك: (بصرامة) خليو عينيكم محلولين ... و تسناو الأوامر ديالي ....
صونا تيليفونو جبدو شاف الرقم عقد حجبانو و جاوب على المكالمة غير حطو حدا ودنيه ماهضرش ...
آدم: (كيهضر منفخ) واجدين؟
فرانك: (حتى هو بنفس التنفيخة) واجدين ...
سمعو صوت محركات قوية و فثواني داز من قدامهم صف ديال الطوموبيلات مستفين فخط واحد مهرسين سكون الليل ....
مزال التيليفون عند ودنو سمع صوت آدم تاني كيهضر ....
آدم: تبعونا ...
قطع عليه و فرانك ضغط على التيليفون بعصبية ... هضرة آدم بهاديك الطريقة بحالا راه خدام عندو استفزاتو و خلات العروق فجبهتو يتنفخو .... هوما شركاء فالهجوم و هو ماشي خدام عندو داكشي علاش ماقدرش يتقبل أنه يآمرو هاكاك ....
فرانك: (قرب اللاسلكي من فمو و هضر كيضغط على سنانو بعصبية) تبعوهم ...
انطلقو وراهم فخط طويل .... و بقات تماك غير طوموبيل الريوس جالس فيها مضيق عينيه و كيفكر ....
••••
آدم كيسوق و مركز على الطريق ....
و هو مزال كيطابي بصباعو فلوحة مفاتيح البيسي ... ضغط على enter و تفتحو بزاف ديال البوابات فالشاشة كلهم تسجيلات لكامرات فطائرات بدون طيار كيحلقو فوق المنطقة ديال دانييل ....
قلب فيهم وحدة بوحدة مركز بعينيه عليهم كاملين .... بزاف منهم مصورين غير الغابات و المناطق الغير مؤهولة ... و شي وحدين شادين الفيلا ديالو ...
سد معظم البوابات و خلا غير التلاتة لي كيصورو فوق المزرعة ديال دانييل ...
ضار بجسمو للمقعد الخلفي و مد يدو هز واحد الجهاز كيشبه للتيليفون نوكيا بيل و لكن هو كبير عليه بزاف ... فيه شي أزرار و شاشة صغيرة ....
كتب فيها شي أرقام و بدا كيضغط على واحد الزر كيتحكم فالطائرة و الكامرة و كيضورها على الفيلا كلها و كيحسب عدد الحراس و البوابات بسرعة كبيرة و تركيز ....
وصلو لمفترق طرق ... و جوج طوموبيلات خرجو من الصف و كل وحدة مشات فاتجاه ...
كانو هادوك القناصين لي خاصهم يشدو بلاصتهم تماك فأعلى نقط ممكنة مقابلين مع الفيلا من فوق السور اللي ضاير بيها محصنها ....
كمل الحسابات ديالو و حدد الخطة فراسو .... و هز اللاسلكي باش يعطي الأوامر ....
أنت تقرأ
EL_OSO
Hành độngE L 🐻❄ Ø S Ø القصة تتحدث عن " يَاسَمِين " الفتاة المكافحة التي ستهاجر الى اسبانيا من اجل البحث عن الذات لتلتقي بمهوسها " el oso " الذي سيحول حياتها الهادئة الى جحيم ..... تابعو قصة " el oso " التي تُبحر في مواضيع كثيرة : منظمات...
