الفصل الاول : crímenes de Amor
#EL_OSO⚡
🥀RØSÀ🖋️
🦋 MariPosa🦋
........
اللور فمؤخرة الطوموبيل كان آدم متكي على الكوسان ... كتفو مزال كتنزف و كيزيد يحس بالسخفة مع كل دقيقة و أنفاسو كتصعاب .... مغمض عينيه مزير عليهم و على سنانو كيحاول يبقى صامد و فايق ...
هو تعرض لإصابات أقسى من هاديك فحياتو كلها اللي دوزها بين حرب العصابات و الجيش .... شاف الموت بعينيه لمرات لا تحصى حتى ولا كيعتبرو صديق و ماشي عدو ... و انعدم عندو الخوف من جهتو ...
صوت رنة الهاتف قطع الصمت .... صدرو كيعلى و يهبط ... يدو ثقيلة بزاف عاند و حركها ... خشاها فجيبو و جبد التيليفون اللي كيصوني ... قادها معاه شاف الشاشة بانت ليه سميتها ... مضببة و ماواضحاش ... بلع ريقو و غمض عينيه و شفايفو ناشفين ... ثواني كيحاول يرتب أنفاسو و يقوي صوتو و لكن بدون جدوى .. حيت فاش جاوبها صوتو كان باح و منخفض ...
آدم: ماريا ...
----
فالطرف الثاني من المكالمة كانت واقفة وسط الجناح الكبير ديالها ... السرير ملكي كبير و نازل على أطرافو ثوب مشبك أبيض ... جلسة بالفوتويات و تلفاز كبير معلق مقابل مع السرير ... المرايا و الكوافوزات و جوج بيبان واحد كيأدي للحمام المتصل بالجناح و الثاني للدريسينغ روم ... و ثرية كبيرة مدلية من السقف ...
كلشي بالأبيض و البيج ... جناح واضح عليه البدخ و الرفاهية ...
واقفة وسطو بسروال توب أبيض و شوميز سوداء ... رقيقة و طويلة ... شعرها الأسود نازل أملس للنص فظهرها ... بشرة بيضاء و عكر حمر ناصع ... عيون كتلمع بالدموع و يدين كيرعشو و صوت متقطع بالبكاء و الخوف ...
ماريا: نتا ... نتا تضربتي ...! نتا تجرحتي ا ادم ياك ؟؟؟
ساكت و مغمض عينيه كيتنفس بالثقالة لسانو ثقيل عليه ...
ماريا: (زاد خوفها و غوتات عليه وسط بكاها) آددم !! قول لياا شنوو واقع معااك راه غانحماااق ؟؟
آدم: (بلع ريقو و هضر بهدوء) أنا بيخير ...
ماباغيش يبين ليها .. و لكن هي كتسمع التعب فصوتو ... قادرة ترصد ارتجافة شفايفو و ثقولية أنفاسو واخا مكتشوفوش قدامها ...
زادت وتيرة بكاها و دموعها كيجريو على خدودها ...
ماريا: ماتكدبش عليا ... بابا قال ليا بلي تضربتي بالرصاص .... أنا غانجي للسبيطار ... غانجي لعندك ...
آدم: لااا .. (غوت بعصبية من بعد أن بألم حابس أنفاسو ... و كمل بأنفاس متقطعة) الأوصو .. غايكون تماك ... غايكون .. فالسبيطار تا هو ...
ماريا: (غوتات بعصبية تا هي) ما سووقييش .. بغييت نشوووفك .. سمع صووتك كيف دااير .. مانقدرش نبقى هنا و كنتسنى ...
آدم: و ملي .. يسولك راجلك شنو ... كاديري فالسبيطار ؟ و علاش .. مشيتي ليه ؟؟
شدات راسها بيدها كتبكي و خفضات صوتها بخوف و ألم ...
ماريا: و لكن أنا ... أنا خايفة عليك بزاف أ آدم ...
آدم: (ابتسم وسط الألم و غمض عينيه) دزت من كثر من هادشي ... تيقي بيا ... أنا بيخير ... كنواعدك ... غدا غادي نجي للفيلا .... بحالا ماعمرني تضربت ... بحال كل مرة ....
ماريا: (جلسات على الفوتوي كتبكي) ايلا خلفتي بوعدك ... غانقتلك .... كنقسم ليك غانقتلك ...
آدم: (ضحك بشوية واخا الضحك زاد ألمو) querido... No tengas miedo... "حبيبتي .. ماتخافيش"...
سكت خدا نفس عميييق و تنهد عاد كمل: ايلا ماجيتش غدا ... أجي قتليني ...
وقفات اللوطو قدام السبيطار اللي فالمنطقة ديال الأوصو و تحت سيطرتو ... كانو الأطباء و الممرضات واقفين و كيتسناوه مع الباياص العرق نازل عل وجوههم ... غير وقفات الطوموبيل نزلو كيجريو باش يدخلوه ...
آدم: غانمشي دابا ... Mi niña "صغيرتي" ... (سكت لثواني كيسمع صوت بكاها) نعسي مرتاحة انا ماغانموتش هاد الليلة ... ماشي بسباب قمشة فكتفي ...
ماريا: (عضات على شفتها حابسة الشهقة من بعد هضرات بصوت منخفض) Te quiero "كنبغيك" ..
جاوبها بابتسامة ماكانتش قادرة تشوفها .. من بعد قطع التيليفون و الباب تحل .. غمض عينيه مستسلم ليدين الأطباء اللي غايهزوه ... و فقد الوعي ....
----
لاحت التيليفون فوق الطابلة و رجعات براسها اللور غطات وجهها بيديها و بقات كتبكي ... ماكرهاتش تكون معاه و حداه و تشد بيدو و لكن ماقادراش .. حاسة براسها مربوطة و محبوسة واخا هي حرة ... خنجر كيقطع فقلبها و كينهش أحشائها ... ألم كبير بزاف و حرقة و غصة فحلقها ماقادراش تبلعها ... خوف و غضب و حزن ....
حبيبها كيصارع الألم بوحدو و هي ماقادراش تكون معاه ...
سمعات الدقان فالباب لمرات متتالية و لكن مابغاتش تجاوب باغية تبقى غير بوحدها حيت حالتها مكتسمحش ليها تشوف حتى واحد ....
المربية: (من خلف الباب) سنيورا ماريا ... جوزيف مابغاش ينعس كيقول بلي باغيك تنعسي حداه ...
ماجاوبتهاش ... ناضت مشات لواحد القرعة ديال الويسكي كانت محطوطة تماك كبات ليها كاس و شرباتو دقة وحدة ... باغية غير تسكر و تفقد الوعي .... باغية هاديك الليلة تدوز دغيا باش يرجع ... حيت هي عارفة بلي آدم رجل بكلمة ... و الوعد ايلا عطاه مستحيل مايوفاش بيه ...
أنت تقرأ
EL_OSO
ActionE L 🐻❄ Ø S Ø القصة تتحدث عن " يَاسَمِين " الفتاة المكافحة التي ستهاجر الى اسبانيا من اجل البحث عن الذات لتلتقي بمهوسها " el oso " الذي سيحول حياتها الهادئة الى جحيم ..... تابعو قصة " el oso " التي تُبحر في مواضيع كثيرة : منظمات...
