البداية كانت تقليدية زي اي قصة رعب رخيصة.. اتنقلت لسكن جديد في عماره معظم الشقق فيها فاضية وسعر الايجار كان رخيص جدا.. كلنا عارفين طبعا ان البنايات اللي من النوع ده بيكون فيها عفاريت او اشباح او قتلة متسلسلين.. بس الموضوع كان غير كدا..!
الاحداث بدأت مباشرة مع تاني يوم من وجودي هناك.. صحيت بالليل على صوت صرخة عالية.. جريت بسرعة وفتحت الشباك عشان الاقي بنت شابة واقفة على طرف البلكونة اللي قصادي وبتستعد انها ترمي نفسها.. مديت ايدي وانا بصرخ فيها:
- استني
لكن البنت كانت اسرع مني ورمت نفسها..!
جسمها اتكسر تماما على الارض وبقعة دم كبيرة بدات تكبر حوالين جثتها.. فضلت لدقايق احاول استوعب الموقف اللي حصل قبل ما انزل تحت الشارع ..
حاولت اتصل على الاسعاف او الشرطة لكن مفيش شبكة زي ما بيحصل في اي قصة رعب بتحترم نفسها..
لما نزلت الشارع مكنش في اي اثر لجثة البنت.. الارض فاضية تماما.. الدم اختفى وكل شيء طبيعي..!
*****
- استني
بس هى صرخت كالعادة ورمت نفسها..!
استمر الموقف ده يتكرر كل يوم..
كل يوم اصحى بالليل على صراخها واشوفها وهى بتنتحر..
رغم كدا كان عندي فضول اتكلم معاها.. عارف انها مجرد روح او يمكن قرين لبنت انتحرت في نفس المكان بس ليه لا.. يمكن تتكلم معايا.. يمكن اقنعها انها مترميش نفسها
*****
النهارده كان عندي فكرة جديدة..
جبت مرتبة هوائية وحطتها في المكان اللي بتقع فيه البنت..
على نص الليل وزي كل يوم كنت واقف بتابع البنت وهى بتقف على طرف البلكونة وبعدين بترمي نفسها..
وقعت بالضبط على المرتبة.. بس جسمها اخترق المرتبة كأنه هواء وسمعت صوت تحطم جسم البنت وبقعة الدم فرشت الارض كالعادة..
حاولت بعد كدا ان انقذها كتير اوي لكن بدون فايدة، بس لاحظت ان كل يوم بيحصل اختلاف بسيط جدا في الاحداث.. البنت بدأت تبص ليا.. وصرختها بقت اقل حدة..؟!
*****
- مساء الخير
قال كدا راجل عجوز وشه مليان خوف وبيحاول يبتسم.. سألته:
- اي خدمة
- اسف بس انا الساكن اللي تحت منك.. ارجوك كفاية اللي بتعمله كل يوم
- انت كمان بتشوفها.. صح..؟
- اكيد.. انا وكل سكان العمارة.. بس احنا اتعودنا على صرختها كل ليلة ومبقتش مشكلة.. المشكلة فيك انت.. طول الليل عمال تتحرك ورايح جاي بتحاول تنقذها.. انت اسوء منها بكتير وعامل ذعر لكل السكان
- مكنش قصدي بس انا مستغرب و...
العجوز خرج من جيبة ورقة جرنال قديمة فيها صورة البنت وصورتي وقال:
- مستسغربش.. هى تبقى مراتك وكان في بينكم مشاكل كتيرة اوي
بصيت له بدهشة وانا مش مصدقة وهو بيكمل كلامه وبيقول:
- معرفش ازاي انت مش فاكر الكلام ده بس هى انتحرت.. انتحرت بعد لما قتلتك من حوالي سنة.
تمت
محمود الجعيدي
