التابوت الأسود

الفصل الدراسي

حياتي كلها كانت تقليدية.. مفيهاش حاجة غريبه ممكن اقولها غير تجربة وحيدة حصلت لي لما كنت صغير..
وقتها كان عندي 14 سنة لما اتنقلت مع اسرتي لبلد تانية..
والدي استأجر بيت جديد في منطقة هادية نسبيا..
لحسن الحظ المدرسة اللي اتنقلت لها كانت قريبه من البيت..
مكنتش محتاج اركب باص المدرسه.. عشر دقايق تمشية الصبح بدري واكون وصلت..
في الحقيقة وانا رايح اول يوم كنت خايف وقلقان.. مضطر ابحث عن أصدقاء جدد وابعد عن المتنمرين..
وصلت المدرسة واستلمت الجدول.. تقريبا متكلمتش مع حد خالص.. كنت بتجنب ابص لاي حد..
بصيت في الجدول.. اول حصة هتكون رياضيات في فصل رقم 104
بصيت في الخريطة المصغرة للمدرسة.. مقدرتش اعرف فين مكان الفصل.. ارتبكت جدا.. حاولت ادور على اي حد اساله..
الممرات كانت فاضية.. كل الطلبه كانوا في فصولهم..
استمريت في المشي..
خرجت من الممر ودخلت ممر تاني له باب خشب قديم..
مجرد ما حركت الباب سمعت صدي صوت ولقيت قدامي دواليب حديد كتير كلها صدى.. كل الدواليب كانت مفتوحة..
فكرت ارجع.. لكن قبل ما اخد خطوة لوراء لمحت رقم 100 على باب احد الاوض..
مشيت ناحيته.. 102، 103، 104
اخيرا وصلت..
بصيت من شباك الفصل.. الاستاذ كان بيشرح والطلبه مركزين معاه..
فتحت الباب ودخلت.. اعتذرت على تاخيري وقعدت على اخر كرسي..
محدش التفت ناحيتي.. استريحت نفسيا بعض الشيء.. مبحبش موضوع الطالب الجديد واني اكون محور الانتباه..
المدرس كان شرحه ممتاز في الحقيقة..
من وقت للتاني كان بيسأل بعض الاسئلة.. الغريب اني لما كنت برفع ايدي عشان اجاوب كان بيتعمد انه ميختارنيش..
لاحظت ان الطلبه معاهم الات حاسبة قديمة.. النوع اللي معايا احدث بكتير.. انا اعرف ان بعض الاستاذة بيتعمدوا استخدام بعض الحاجات القديمة..
انتهى الدرس بعد ما حسيت بكمية زهق وملل كبيرة..
كل اللي انا كنت عاوزه في الوقت ده ان ارجع البيت..
بصيت في الساعة.. اليوم تقريبا خلص.. لو قلت لحد من اصحابي القدماء اني قضيت اليوم كله في درس رياضيات هيسخر مني بالتاكيد..
على العموم انا كرهت المدرسة دي من اول يوم..
رجعت البيت واول ما وصلت لمحت والدتي بتتكلم في التليفون.. كان واضح انها متضايقة جدا..
بصيت لي بغضب واتهمتني ان مكنتش في المدرسة..
ارتبكت في البداية لكن حكيت لها كل اللي حصل وازاي قضيت اليوم كله في درس واحد للاستاذ (تايلور)..
والدتي بدأت تكلم مديرة المدرسة اللي كانت معاها على التليفون، بعدين ملامحها اتجمدت وبصت لي بقلق شديد..
انهت المكالمة وبدأت تحكي لي اللي قالته المديرة.. الفصل 104 مهجور من سنين طويلة.. محدش بيستخدمه من وقت حادثة اطلاق النار.. شخص مريض اقتحم الفصل ببندقية وقتل الاستاذ (تايلور) وكل الطلبة الموجدين.
دخلت اوضتي وفتحت الكمبيوتر وبحثت عن الموضوع.. شفت صور الأستاذ والطلبه اللي اتقتلوا.. كانوا هما.. ايوه هما اللي كنت قاعد معاهم..
بعد اليوم ده اتنقلت مدرسة تانية..
مرت سنين والموضوع ده مش راضي احكي عنه لاي حد.. عارفين ليه قررت احكي النهارده.. لاني اتلقيت دعوة (لم الشمل) وعليها توقيع من الاستاذ (تايلور).