- كنت قاعده ف الصاله وادامي اوضه ماما، وفجاه ببص علي اوضتها لقيت حاجه شبه الضل واقفه، قومت جريت خوفت عليها اشوف في اي، ملقتش حاجه، بصحيها من النوم بقولها انتي كويسه لقيتها اترعبت مني وبتقولي ابعدي عني حد الله بيني وبينك، بقولها مالك، تقولي امشي، وكانت خايفه مني ولحد دلوقت معرفش كانت خايفه مني ليه؟!
- شفت جدي فى اوضة نومي. وهو مات اصلا قبل ما اتولد. لكني شفته وعارفاه كويس، لدرجة اني عرفت عنه تفاصيل محدش قالها عنه خالص قدامي
- تيته الله يرحمها حكتلى أنها مرة وهى طفلة اتأخرت بره البيت لبعد العشاء و كانت أيامها فى البلد لسه ... وهى راجعة لقت الشارع اللى فيه البيت بتاعها مسدود ... تلف و ترجع تلاقى الشارع مسدود ... شايفة كل تفاصيله بس تحاول تدخل كأنها بتخبط فى حيطه
ففضلت واقفه مش عارفة تعمل ايه لحد ما عدى شيخ المسجد بالصدفة فسألها انتى واقفه لوحدك بره بالليل ليه ؟ قالتله الشارع مسدود حتى بص و حاولت تدخل خبطت فى نفس الحيطة
ابتدى الشيخ يقرأ بعض آيات القرآن فالحيطة دى ابتدت تاخد اللون الأسود و تفاصيل الشارع تختفى و فجأة لقت قدمها راجل طويل جدا بطول عمارتين فوق بعض و عرضه بعرض الشارع و طبعا مش قدرت تشوف ملامح وشه بس كان اسود كأنه ضل انسان ... ومع نهاية القراءة الظل ده صرخ بصوت عالى جدا لدرجة أنها حست أن البيوت هتقع وان أهل البلد كلهم هيخرجوا جرى ... بس مفيش حاجة من دى حصلت الظل صرخ و اختفى ببساطة ...
حاولت تدخل الشارع فدخلت عادى .. لفت و سألت الشيخ ... هو ايه ده
قالها متخافيش ده كان مارد
- جدي الله يرحمه حكالي انه كان ف البلد عند محطه القطر دايما يشوف ولد قاعد بيعيط وكان بيساله مالك لدرجه ان الولد دا جاله قدام باب الشقه واكتشف انه ميت اصلا
- كنت راجعه من بره الساعه ١٠ بليل تقريباً وطلعه ع السلم .، اللمبه في الدور اللي انا فيه كانت محروقه بس كان فيه نور ضعيف من الدور اللي تحت و الدور اللي فوق يخليني اشوف .، لمحت جاي من ورايا واحد بس كان صغير وبيجري بسرعه جداً وبيطلع السلم جري لدرجه اني رجعت لورا عشان اسيبله مكان يعدي وفجأه اختفي ! فضلت واقفه في مكاني دقيقه من الرعب وبعدين طلعت ع البيت جري
-اخويا كان واخد التكليف بتاعة في وحدة صحية في بلد تبع مرسى مطروح ومكنش حد معاة وهو نايم السرير جنب الحيطة بيقول بمد ايدي لقيت حد ماسك في ايدي اتخضيت وفوقت شوفت ايد طالعة من الحيطة ماسكة ايدي وبيقسم ان دة حصل
- كنت بشوف دايما واحدة منقبة واقفة ورا باب الأوضة، وناس قاعدة في نص الأوضة علي الارض وبيتكلموا ، كنت بترعب وبعدها.. اتعودت.
