- كانوا بيقولوا لي متبصيش في المرايات كتير بالليل.. بصراحة مكنتش عارفه السبب او ايه الحكمه من ده. وفي يوم قررت اني لازم اعرف.. وعلى الساعة 12 بالليل وقفت قدام المرايه لمدة طويلة لغاية لما سرحت.. فجأة شفت في المراية شكل غير شكلي، رميت المراية وجريت على اوضي استخبى وحاولت انام.. ومن بعدها فضلت اشوف الشكل اللي في المراية حواليا في كل مكان.
- صحيت مرة بالليل وكنت عطشانه.. وانا في طريقي للمطبخ عديت على اوضة اخويا.. كانت الاوضه مفتوحة فبصيت بصة.. شفت كائن ناري شبه الانسان واقف فوق دماغ اخويا وعمال يحرك ايديه يمين وشمال زي حركات السحر
- في بيتنا القديم واحنا صغيرين كنت دايما بشوف واحد لابس عباية بيضاء وواقف عند سرير اختي ويبصلها ويضحك.. حاولت كذا مرة اقول لامي لكنها مكنتش بتصدقني
- كان لي قريبه متخانقه مع جوازها واتوفت.. بعد وفاتها بكام يوم كنت بكلم جوزها في التليفون، ودافعت عنها وقلت له انك اجبرتها انها تقول انها مسامحاك لكن من جواها هي مش مسامحه. وفجأة عدت من قدامي قطه من نور وهي رافعه ديلها وكأنها مبسوطة من اللي عملته.. في المعتاد ان بخاف من خيالي لكن المرة دي جسمي قشعر وحسيت ان روح قريبتي كانت بتشكرني
- وانا في الكلية اشتريت انا وصحابي لعية (ويجا).. كان الموضوع هزار وضحك.. لكن الغريب ان لما لعبنا كانت اللوحة بتتحرك وبتجاوبنا
- وانا صغيرة دايما لما كنت بروح عند جدتي واقعد ع الكرسي اللي ف وش الطرقة
كنت بشوف راجل تخين لابس لبس البلياتشو وبيشاورلي بإيده عشان اروحله
- أنا شغال ممرض في العناية المركزة. فبعد الساعة 2 بتبدأ ساعات نومنا بالتبادل بيني وبين زمايلي الي معايا كل واحد ساعتين لحد الصبح وبنبدل ع بعض . فدخلت نمت الساعة 2 بليل ع سرير . كان السرير ده مات عليه راجل كبير قبلها بأسبوعين . نمت ومفيش مشاكل بس وانا نايم حسيت اني مش قادر اخد نفسي . بقيت مخنوق عاوز انادي ع زمايلي صوتي مبيطلعش. عاوز اقوم حسيت اني متكتف في السرير ومش قادر اتحرك. اللي أنقذني ان الساعتين بتوعي خلصو وزمايلي كانو داخلين يصحوني عشان واحد غيري ينام .
مبقيتش عارف تفسير الي حصلي . تاني يوم بحكي لزمايلي في الشغل لقيت كل واحد قال ان حصل معاه نفس الكلام ع نفس السرير من غير زيادة او نقص في الكلام .
- مره كنت واقفه اصلي ف الاوضه والمرايا قدامي مكنتش اعرف انه غلط. المهم كنت ف قراية الفاتحه فجأه حسيت ان الصوره اللي ف المرايا بتركع قبلي. غمضت عيني من الخوف وكملت صلاه وانا مغمضه عيني وكل لحظه كنت حاسه ان هيحصلي حاجه وانا بصلي
- خالتي الله يرحمها توفت وعيالها صغيرين .. ابنها التاني كان عنده حوالي ٦ سنين . يوم الدفنه بالليل صحي على واحده بتقول له تعالى معايا مكنش شايف في ايه المهم هي مدت أيدها خبطت صدره .. صحيوا الصبح لقوا علامة كف على صدره زي الوحمه ما راحت.لغاية دلوقتي وبعد حوالي ٣٠ سنه
- واحدة قريبتي ماتت منتحرة.. ولمدة 40 يوم كانت بتيجي تخبط على بيت ولدها.. جبنا شيخ البيت.. سمعنا بعدها صريخ وحاجات مرعبة.. روحها مكنتش عاوزة تسيب البيت
