انك تكون اكل للحوم البشر، صدقوني ده امر مش سهل، وفي نفس الوقت هو مش مرعب او مخيف زي ما بتصوره افلام هوليوود الرخيصة.. كمان مفيهوش وحشية ولا حاجة، او ان لازم اطارد الضحية في الظلام ومعايا ساطور وانا بصرخ صراخات مرعبه.. بصراحة مجربتش قبل كدا ان اصرخ صرخات مرعبه.
(مطلوب شخص عمره من 18 الى 30 سنة عشان ادبحه واكله).. دي كانت صيغة الاعلان اللي كتبته على النت.. انا عارف ان كتير هيسخروا او مش هيصدقوا اللي عملته.. بصراحة انا نفسي متوقعش ان حد هيرد عليا.. لكن الغريب ان جالي حوالي 200 رسالة.
كانت معظم الرسايل من اشخاص بيحاولوا يهزروا او واخدين الموضوع بسخرية.. خمسة بس منهم كانوا مهتمين بالموضوع ووافقوا.. لكن للاسف 4 اتراجعوا في اخر لحظة..
الخامس طلب مني ان اعلقه في احدى المجازر واسلخه زي الخنزير.. خدته ورحنا لمجزر قريب بعد وقت العمل.. وبعد لما علقته على القلاب عشان ادبحه رجع في كلامه.. وزي ما قلت ليكم انا شخص مش متوحش ولا حاجة.. مزعلتش منه ونزلته وبعدين رحنا لبار قريب شربنا كام كاس بيرة واكلنا بيتزا زي اي شخصين محترمين.
(من النهاردة مش هتشتري لحم لان هيكون عندك منه كتير).. دي كانت اول رسالة توصل لي من شخص اسمه (براندز).. اعتقد انه بيتكلم جد.. بدأت اراسله واتفق معاه.. بصراحه براندز كان شخصية غريبة واسالته كمان.. غريبة.
سالني مره (هتعمل ايه بدماغي).. فكرت شوية وبعدين قلت له اني مش هعمل فيها حاجة لاني عاوز اسيب جمجمته.. لكنه طلب مني ان اعملها منفضة سجاير.
اتفقنا على يوم نتقابل فيه.. خدته معايا البيت وفرجته على الاوضه اللي هدبحه واكله فيها..
اديت لبراندز كمية كبيرة من الحبوب المهدئه والمسكنة، لكن قبل ما ادبحه طلب مني انه يأكل جزء من جسمه..
قطعت قطعه من فخذة وحطتها في مقلاية ورشيت عليها شوية ملح وفلفل وقدمتها له.. للاسف براندز كان بقى ضعيف جدا ونزف كتير ومقدرش يأكل..
سبته في الحمام ينزف وبعدين سحبته للاوضه اللي ورتها له، وهناك دبحته من رقبته وبعدين علقته على قلاب اشتريته مخصوص وبدأت اقطع اللحم..
بعد حوالي ساعة كنت مجمع حوالي 20 كليو لحم صافي.. بيتهيالي دي كمية معقولة وهتكفيني الكام شهر اللي جايين.. ولما تخلص هعمل اعلان تاني، واكيد هلاقي الشخص المناسب، بس اتمنى المرة الجاية اني اطلع كمية لحم اكبر.
(( دي كانت قصة حقيقية بطلها الالماني (ارمين ميفز) اللي اتقبض عليه بعد لما الشرطة شكت فيه وهو بيبعت اعلان بنفس المضمون.. تم الحكم عليها بالسجن المؤبد.. والغريب ان اللي عمله كان مصدر الهام لناس كتير انهم يحاولوا يقلدوه، وله كلمه شهيرة بيقول فيها: محدش يقدر يعمل اللي عملته بنفس الجودة او نفس المهارة.
#محمود_الجعيدي
