The turned-off EXIT Light

Part 8

The turned-off EXIT Light
Part 8

အမတ်မင်းမွေးနေ့ပွဲတုန်းက ပွဲအပြီး ချန်ယောလ် သူ့အဖေနားမှာရှိနေတုန်း ဂျောင်ဆူး သန့်စင်ခန်းသွားခဲ့သည်။ သန့်စင်ခန်းက ပြန်အထွက် လူတစ်ယောက်နှင့်တွေ့သည်။ ထိုလူ့နာမည်က ရှင်း။ ရှင်းက ဟာစောရဲ့အစ်ကိုဝမ်းကွဲဖြစ်သည်။ ဂျောင်ဆူးနှင့် တအားကြီးရင်းနှီးတာမျိုးမဟုတ်ပေမဲ့ သိတော့ သိကြသည်။ မြို့ပြင်က နေကြာခင်းတွေဆီသွားလည်သည့်နေ့က ဂျောင်ဆူးတို့ကို လိုက်ပို့ပေးသူက ရှင်း ဖြစ်သည်။ နှစ်ဦးသားဆက်ဆံရေးကိုလည်း သိထားပြီး ချန်ယောလ်နှင့် ဖြစ်ပျက်သွားသည့် ကိစ္စများကိုလည်း သိနေသူဖြစ်သည်။ ရှင်းက ချန်ယောလ်ဆီက လွတ်မြောက်ဖို့ ကူညီပေးမည့်အကြောင်းပြောလာပြီး ဟာစောမွေးနေ့တွင် သူချိန်းသည့်နေရာသို့ လာခဲ့ရန်ပြောသည်။

ချန်ယောလ်လိုက်ပို့ပေးသည့် ကော်ဖီဆိုင်သည် ရှင်း ပိုင်သည့်ဆိုင်ဖြစ်ပြီး ထိုဆိုင်ထဲက လျှို့ဝှက်ထွက်ပေါက်ကိုလည်း သူပဲပြောပြထားတာဖြစ်သည်။ ထိုရက်က ဂျပန်သို့ မှောင်ခိုလိုင်းမှ သွားရန် သင်္ဘောထွက်မည့်ရက်ဖြစ်သောကြောင့် ဘယ်အချိန်လာလာ သူကူညီနိုင်ကြောင်း ပြောထားခဲ့သည်။ ထို့ကြောင့် ဂျောင်ဆူးက ထိုဆိုင်ကို ရောက်အောင် လာခဲ့ခြင်းဖြစ်သည်။ ထွက်ပြေးဖို့ နောက်ဆုံးလမ်းစလေး ဖြစ်သောကြောင့် လက်မလွှတ်ချင်ခဲ့ပေ။

ရှင်းရဲ့ကားထဲမှာ ထိုင်ရင်း တဖြည်းဖြည်း မှောင်လာခဲ့သည်။ ကုန်တင်ကုန်ချလုပ်နေသည့် နေရာက လူအနည်းငယ်ရှင်းသွားပြီဖြစ်သည်။ ရှင်းက ဂျောင်ဆူးခေါင်းပေါ်က ဦးထုပ်ကို ပိုငိုက်အောင်ဆွဲချပေးပြီး ကားပေါ်က ဆင်းခိုင်းကာ သင်္ဘောရှိနေသည့်နေရာကို သူကိုယ်တိုင်လိုက်ပို့ပေးသည်။ ကုန်သင်္ဘောလိုမျိုး၏ အောက်ခန်းထဲတွင် ဂျောင်ဆူးကို နေရာပေးပြီးနောက် သင်္ဘောလုပ်သားများက အပေါ်ဘက်ကို ပြန်တက်သွားသည်။ ရှင်းက စိတ်မပူဖို့ တဖွဖွပြောပြီး နှုတ်ဆက်ကာ ပြန်သွားတော့သည်။

🚫

ပင်ပန်းသည့်အရှိန်ကြောင့် ကျွန်တော်အိပ်ပျော်သွားခဲ့သည် ထင်ပါသည်။ ပြန်နိုးလာသည့်အချိန်တွင် ဘယ်ညာယိမ်းနေသော လှုပ်ရှားမှုတစ်ခုကိုခံစားနေရပြီး အနည်းငယ် မူးဝေနေသေည်။ ကျွန်တော်အိပ်ပျော်နေသည့် ဆိုဖာပေါ် ထထိုင်လိုက်ပြီး ခေါင်းကို လက်နဲ့ဖိနှိပ်ထားလိုက်သည်။ သင်္ဘောက တလှုပ်လှုပ်ရွေ့လျားနေပြီး လှိုင်း ပုတ်နေပုံရသည်။ သင်္ဘောတစ်ခါမှ မစီးဖူးသောကြောင့် မူးဝေမှုဒဏ်ကို မခံစားနိုင်ဖြစ်နေရသည်။