بين العشق والعادات

البارت الثالث عشر

اثاري الحمل من يثكل يشيله الكلب مو لجتاف

خفت اشرد من همومي ويصيحولي البشر خواف

وخفت ابجي ويبين كل صدك كلبي على عيوني

وابو كلب الترف ينعاف

___________________^^^^^^^^^^^^^^^
رحت منهن وانه خايفه لان حجيهن بي غايه ومتاكده الهن نيه بالسالفة

مشت الايام والحياه
و مثل ميكولون اليموت من فكر روحه

الكل ترجع الحياتها بس هوه اليخسر حياته

وبيوم جنت رايحه للمدرسه وبالدرس القبل الاخير اجت بنيه وكالت اسماءنا
نور الهدى
ازل رحمان
واسراء ناصر
باجر اتجيبون ٣صور للاداره

كلنا خفنا ومن سألناها شكو كالت ما اعرف

كلت البابا وانه خايفه خوف يسألني وما اعرف شكوله

صدك والله شويه وكال لعمو اخذها للمصور

لبست حجابي وعبايتي وطلعت وياه

رحنا المصور اخذت صور
والله واباوعلك واشوف شكلي عباره عن شي اسود وبس وجهي مبين ابيض بي وحتى سواد خفيف جوه اعيوني عبالك ميت وطالع من كبره بكفاله

وديناهن للاداره وراها بيومين اجني البنات مخبوصات شكو

كوثر،،مسوين اعلان يم الاداره وبي صور المتميزات

طيبه،،وج لحكي حاطيلج صوره بشجره المتميزات

كمت داشوف شيحجن واشوفلك صوره كبيره مثل اللوحه بيها شجره ونازله من افرعها صور من الاول للمتوسط للسادس الاعدادي اباوع على صورتي عباره عن قطعه سوداء فقط
اما البنات وخاصه الاعدادية حدث بلا حرج العدسات والمكياج وانواع الفيكات بالشال

اخذت لي صفنه ويه روحي لخاطر ربج صورتي صوره وصورهن صور

مشت الايام بين مد وجزر وبين مسؤوليه رغد وغدير
واخواني وبابا ومساعده كبيره من عمتي مريم الي متركتني ولا لحظه

صار على وفاه امي مايقارب سبعه أشهر

امتحنت ثاني متوسط واستلمت النتيجه طلعت اعفاء بشكم درس بس مو الكل لان اكو دروس درجاتي ميساعدن ومستواي بيه و مينزل خاصه بالانكليزي جان معدلي سبعينات ميساعد علاعفاء العام

خاصه بيوم الامتحان الاخير ضلينه فتره نتوادع والدموع مغرغره بعيونه انا وصديقاتي

ما اعرف حسيت بعد محشوفهن ركزت بكلشي بالمدرسه
الحديقه
الساحه
الصفوف
الإداره

احس كلبي يكلي شبعي شوف منهن لان مراح تشوفيهن مره ثانيه

ورجعنا انا وصديقتي زهراء للبيت من وصلنا للشارع حسيت بشخص ديتبعنا بس ما متأكده لحد مردنا ندخل الشارع القبل فرعنا لمحتا لحسام