بانيقيا السلام

part 14

الڪاتبة:سارَه

#بانيقيا_السلام

_____________

- بصراحة مثل ما كتلك هالموضوع شايلته نهائيا بس اذا مصر فاعتذر منك ما موافقة لان ماكدر اخليك تنتضر شي ما مضمون شوف حياتك و ربي يوفقك وي أنسانة تستاهلك لان. بصراحه انت شخص متنرفض بس العمر سيد الموقف

آدم بأبتسامة- اشكرج على رفضج المحترم و احترم رأيج و اقدر عمرج و تكدرين تاخذين راحتج

ابتسمتله و كمت و قبل لا اطلع كال

آدم- اتمنى هالشي ما يأثر على علاقتنه يعني بالنهاية احنه ولد عم و اذا تردين اعتبريني أخ و اذا احتاجيتي شي اني موجود

درتله و ابتسمتله و اومئت بتشكر و طلعت صعدت لفوك لغرفة حور كعدنه نقره لحد ما هلكنه من التعب.. تمددت و هي تمددت بصفي

- حور سولفي قصتكم انتي و ملهم و تفاصيل حياتج المعروفة حتى لا ننام

حور- هممم جنت صغيره عمري 13 جنت امر بحالة نفسية سيئة جدا بعد وفاة والدتي و صار عندي نقص بالوزن و ما آكل و كلهه تواسيني و تحاول تطلعني من حالتي حتى آكل بس جنت اكللهم انو اني تخطيت هالشي صحيح لسه حزينه عليهه بس ما آكل مو لهالسبب لان صار هواي على وفاتهه بس ما اكدر آكل مو جوعانه..

جنت حتى اذا اكل بسرعه اشبع و كاموا يجيبولي فيتامينات لان يصير عندي تعب و أعياء بس هالشي ما فادني و ضل وزني يقل و اتعب بسرعه و بالليل اتعرق و يصر عندي حمى.. بالأضافة الى انو جان يصير عندي تورم و نزيف باللثة..

الكل جان رابط اعراضي وي وفاة امي انو اني حزينه عليهه و تمرضت لهالسبب..

لحد ما مره ساءت حالتي و تقلوني للمستشفى اسعفوني و سوولي تحاليل و فحوصات و بعد ايام طلعت النتيجة سرطان بالدم و للأسف متقدم و ما اتعالج بالأدوية الا كيمياوي.. جان اكثر شخص واكف وياي هو مُلهم لان ابوية كثير السفر و اخويه اغلب وقته ببيت جدي اهل امي لان بصغره تربى عندهم فمن امي توفت يروحلهم هواي و هم يحبوه.. لهالسبب مُلهم جان كلشي بالنسبة الي و هو يلي وكف وياي بكل مراحل مرضي و شفائي..

و جان دائما يكلي هالجملة.. "تأكدي انو لو شما يصير اني بضهرج سندج و حبيبج"

- حبيبج!!!؟

حور- اي لان جنه نحب بعض من الصغر

- تمام كملي

حور- استمرت فترة علاجي 3 سنوات صار عمري 16 و بعد علاجي جنت فرحانه لان شبه مأيسة جنت.. بس المجتمع دمر فرحتي لان بدأت الاشاعات انتي عقيمه انتي ما تكدرين تخلفين و حتى اذا خلفتي حتولدين طفل مشوه وووو... هواي كلام جنت اسمعه و جان الكل يكلي انو ما اهتم لحد ما مره ام ملهم كلتلي اروح للمستشفى حتى اعرف ان جنت عقيمة او لا لأن مستحيل تقبل اتزوج ابنهه اذا جنت عقيمة..