Kansè bèl mo nan kè jouda
Bèl boujou pa zamitay
Bèl souri ak bonè pa kòkòday
Bèl mo dezantere fantom lespwa
Kòfre fò pa swiv kòbya
Mo yo bèl tankou yon bouke flè
Nan men yon demwazèl
K ap kalinda ak yon maleng nan kè
Bèl pawòl kondane zòrèy
Bay fo lespwa ak rèv anba solèy
Pwezi pale tristès pou konsole lapèn
Respekte boutèy lè tafya ap koule
Bèl pawòl bay fil mòl san kase chèn
Rèv yo file kou zetwal lè lam yo ap koule
Bèl mo konn kache èn
Chak bèl mo kache yon melankoli
Chak fraz yo esprime yon maladi
Nan rekèy yo se doulè ki mare vant
Sikatris yo rete, pou kisa? yo pa ka di
Kansè Bèl mo, yon soufrans san konsyans
Doulè powèm se emosyon, kè brize
Santiman ap kouri anbrase bèl bouch san pasyans
Anba manti ki pral divize
Plim yo fatige ekri pou kò san lespri
Moral yo ba lè rèv yo vle panse wo
Mo yo ap kriye kote lavi pa ka ri
Nan zile a de je kontre bay verite pou fè defo
Jan sòt ri sa jan lespri pa ka di
