Ayiti, tè paradi
Ayiti, tè paradi, kat eleman yo reyini
Anba syèl ble a pou bay vi ak lanati, tè a beni
Sou tè vodou a, van soufle, solèy klere, lapli tonbe
Zèb pouse, pyebwa Yo grandi san n pa plante
Ap toujou gen vi, montay yo ap toujou briye
Enèji metrès tè a ap toujou la pou vibre
Tè anbyans, tè abondans, tè plezi
Fòs linivè a p ap sispann manifeste nan rasin plant yo
Pou yo bay bon fri kou bèl grenn mango
Bon legim lè fredi pou nouri vant yo
Menm si l ta abite dyab l ap rete yon paradi
Si gen mizè se pa fòt li san nou l ap toujou fleri
Syèl la detenn sou lanmè pou pentire lorizon
Tè a bay manje tout yon lane, l pa konn sezon
Ti zwezo ap chante nan rak bwa
Kou deyès Nefiti ak bèl vwa
Pou lalin fredone, pou klere l nan fènwa
Ayiti, ou ta di l se jaden Dedèn
N ap mache sou richès, li simen pwezi nan kè n
Bèl plaj, bèl rivyè, bèl peyizaj dekore ak flè
Natirèlman li bèl ak lanmou, nan respè ak lonè
Lò ap briye, petwòl ap koule
Kou kafe andeyò nan grèp latè
Manje kreyòl, Diri ak sòs pwa ak legim pi bon pase anbwazi
Ayiti kache sekrè lemond anba je lèzòm nan bra li
Tè lajwa, tè lagete nan mitan zantiy yo
Manmèl sila a ap toujou donnen lèt ak siwo
Tè sila a, tè Ayiti, li pi dous pase lòt
Yon paradi pou tout zanj li pa gen pòt
Bèl sitadèl, bèl fò sèvi n gratsyèl, ak bèl gwòt
Se pa mechanste lèzòm k ap anpeche zetwal li pi wo
Paske tè Ayiti, se paradi
Twely
+509 40675378
IG:Twely_dr
