Nègès, je lannuit, po kafe ak lèt
Fanm gwo mouda ak toke sou tèt
Nègès kò kafe griye, po chokola
Fanm fòm koka, fanm ti kola
Tout se nègès tout se fanm kreyòl
Fanm je kale, cheve gaye kou fòl
Tout se ayisyèn ki konn doulè jounen
Fanm gwo tete, fanm ti tete, ak tete moulen
Tout se fanm, fanm dous, fanm titato
Fanm ki pote souri kou blag tibato
Fanm kreyòl, tout se fanm gwo zouzoun
Fanm anba bouden, fanm gwo chouchoun
Pase la, n a kontre pi devan
Tankou mache sendenden, dan devan
Pa gen fanm ke fanm, nou tout bèl
Fanm ak bèl dyòl, pwès, gwo nen jouk nan syèl
Nègès, fanm kreyòl, fanm andeyò
Fanm lavil douvan lavi k ap fè jefò
Nègès, fanm kapital, fanm vant chodyè
Fanm ki wonfle kou machin move motè
Manyen m tout jan, m a reve n pita
Jouk zetwal nan je n sispann kabicha
Fanm merite respè, lanmou, sitou fanm nwè
Fanm ki sanble m, fanm nwè, sila m pot sou kè
Malgre dyòl yo gwo, se yo mwen renmen bo
Nan je m nan pwen fanm pi bèl pase yo
