Se nan bra w m anvi vwayaje
Lè senfoni makonnen ak kri yo
Nan melodi vwa w m anvi nwaye
Mwen louvri kè m pou m rele w siwo
Lè dwòg karès fè mwen eksite
Se sou fèy papye pou m egziste
Yon mizik lanmou k ap fè piwouèt
San plim nan lespri yon powèt
chak lè wòb ou leve
Ak yon sigarèt, yon gode tafya
M ap admire w chak fwa bote w kreve
Je syèl la kale kou lalin nan fè jouda
Sèt nòt mizikal nan pla men w,
Pou jwe dezi lè demon yo vle manyen w
Pou mi yo tande kri yo tou ba
Se sou kabann sekrè lanmou devwale
Pou kache peche yo lè klòch pwezi sonnen
Pou maske briganday ki vwale nan lajounen
A chak fwa lalin ak zetwal yo vire do ban mwen
Pwent tete w egize nan tay kreyon
Depi nan kreyasyon,
kou bebe m ap tete w anba je move tantasyon
Linivè antre nan somèy,
Gran jounen nan chèche solèy
Lè melodi lanmou ak tandrès gita ap jwe
Fènwa pote limyè ak dra pou kouvri kò w ki eklere
Se konsa melodi lanmou jwe
San moral
Anba benediksyon anvi, zanj yo dejwe
Lè lonè fanm dezabiye se bote l ki pale
Lè je l fèmen sou kabann se kè l pou w gade
M anvi vwayaje nan melodi vwa w
jouk mwen jwenn sekrè ki kache nan van
Jouk mwen keyi limyè nan fènwa w
Jouk melodi lanmou anchene tan an.
