Negrès yo se kòkòday ak waganègès
Ala yo bèl, fiyèl bote!
Kou bòs tayè yo ka koupe kout je
Yo ka taye san pantalèt pwent tete kreyon
Pou makiye syèl la, pou fè lapli tonbe
Lè Je solèy la louvri san l pa wè
Jouk li fè nwè
Ap reve souri sou dyòl fanm nwè
Je yo klere tankou lalin k ap chache somèy
Kou pipirit y ap taye banda
Nan defile sou branch pyebwa
Pye chape, tonbe sou bwa
Lavi mande lanmò
Lanmò rele anmwèy
Gade kouman yo bèl!
Ou ta di se sitadèl k ap respire bon lè
kout je yo fè tizon dife vole san zèl,
Mwen ta pyafe,
Sanble yo pa cho
Tankou dife anba yon chodyè lam ak patat k ap bouyi ?
Kilès ki pa sou goute?
Jan dyòl nou bon
Nou ta manje
Negrès yo
Manvi manyen yo
Jouk yo chifonnen tankou farin pou fè donbwouèy
Pou swè nou koule tankou rivyè ki fache
Ala yo bèl!
Ti toutou ta jwe,
Ala bèl mèvèy!
Lè kò yo ap bay dlo anba yon tonèl
Gade kouman yo bèl!
Gade dejwe sèvo m,
Yo fre kou pitit papa Legba
Yo fè mwen pè
Tibouch yo mwen ta manje san sèl
Kè mwen bat tankou tonmtonm k ap pile nan pilon
Panse m fè dezòd kale mwen bèl nègès
Ban m pinisyon men sentiwon
M anvi fè yo dedouble tankou manbo ki pran lwa
Bote yo pa gen parèy,
Genyen ki gra men po yo swa,
ala yo bèl!
Nan gade kè m limen dife
