Revolisyon pa fèt nan pati
Nou pa chen, yo pa ka di n pati
Vire do n ale kou chen
Kote zo a ye, se pa la k toujou gen vi
San mèt, ak kòd lesklavaj nan kou n
San nen, jouk nou pa konn sant libète,
N a va konn gou chen cho ak grenn diri
Kou mò n a sispann lite
Paske n pa konn valè yon peyi
Viza touye vizyon tèt san sèvèl
Ak sèvo chak grenn vye entelektyèl
Yon nasyon ap detwi, yon pèp ap peri
N ap souri nan foto pou n byen pase nan sèlfi
Li nan bèl liv pa sifi pou bati yon peyi
San konsyans ou se zonbi, move moun
Foli viv kay blan fè n kite lespwa n ap peri
N ap reve yon vi zonbi, san akonpli anyen serye nan lavi
Viza se pa kat pèsonalite
Memwa pèp sa kout, manje bliye rann yo sanwont
Pou viza diyite n bout, ap di viv blan san bri san kont
San ògèy, san fyète, kolòn vètebral yo dekoud
Mwens chen, mwens pis, kou chen n ap chèche zo ak vis
Gen sila k ap viv pou brase dyòl, sa k ap viv nan rezignasyon,
Grenn diri sifi pou yo di reyisi
San konviksyon ak dechay sou zepòl
Nou mare kou pèsekisyon
Yon bann sèvo pouri kou ze k ap degaje anba dyòl k ap souri
ke lespri Papa Desalin desann sou mwen
Pou m konbat tout ènmi sangwen, ki pè goumen, ki pè senyen
Je kale k ap reve kou chen
Nèg nwè pa zannimo blan
Nèg blan gen move plan pou nèg nwè
Trèt yo pa anpil pou defann yo non
M ap mouri nan goumen
M pa gen rèv chanje peyi
M ap mouri gran douvan sa k wè m piti
