Gade chat
Mimi myaw
K ap vòlè vyann
Sou tab pèp la
Leta gang
Leta repè
Dwèt long
Byen kostime
K ap piye
Volè ap di aba vòlè
Paske
Rat konnen sa chat konnen
Se menm vòlè
Byen serye
K ap gaspiye
Lajan pèp
Ak pafen koripsyon
Byen fye
K ap vòlè
Leta san manman
Granmoun sanwont
San nannan
San agrenay
K ap pran pwent nan
Men vòlè
Leta je chèch
Leta rizyèz
K ap plenyen
Pa gen lajan
Gade jan fal yo
Plen
Nan vòlè
Nan lari a pa gen vòlè
Tout vòlè nan biwo leta
Volè ak pantalon
Vòlè ak jip
Ak tèt vès
Gade yo
Byen abiye
K ap bay de dwèt
Nan bouboun kès leta
Leta san nen
K ap respire lajan
Ak poud kokayin
