ثـلاثيني ...
خامســة 🔥
____________________
( شقـة نور )
نور :: امتى جت وخيرني ماشفتهاش ؟
يزن :: ( حاط ايديه ع خده ) مانعرفش ..
نور :: وبعد العمله هاذي مزال تتفكر حتى بتاخدها ؟
يزن :: اسمعي نور انى من الاول ق(قصت عليه )
نور :: اااسمعني انت يايزن .. نسرين هذي تنحيها من راااسكـ نهائي من ربي سيرتهم مش بيضاااء ومش عارفه اصلا كيف لفة عليك اللفعه وغير هكي وحده تجي لي عرسك بكل وقاااحه هذي الي عمرها ماتربت ولا شافت تربيه
يزن :: نووور ريحينا عاد انى جاي باش نحكيلك وتسمعيني وكانه هذا خلي نوض نمشي
نور :: ماانيش سامعتلك ونوض امشي . لكن قبل ماتمشي يايزن الي بديره في بنت نااس مش ححرام ؟؟ واخدها مرتك و ع اسمك وتوا مقرر شهرين وبتاخد عليها وبتطلقها ؟
يزن :: انى مانبيش نطلقها ان(قصة عليه )
نور :: ممش انت يابابا الي تقرر بطلقها ولا لا .. سارة اصلا مش ح ترضى تقعد معاك دقيقه وحده بعد الموقف الحقير الي نحطت فيه . تي طيب فيك طلعت بنت ناس وبتتحمل شهرين لو وحده تانيه راه داارت مممصيبه يااباشا
يزن :: ( متبص رااسه وحاط ايديه علي )
نور :: تقددر تتقولي بأمانه ومن غير كذب .. عمرها نسرين قالتلك انه في عرسان تقدمولها ؟؟ ولا في عريس جي وبوها مايبيش يرفضه لانه كويس ؟
يزن :: ( سكت )
نور :: يااسيدي مش مصدق قصة سحر صح ؟ باه عمرك سألت روحك علاش بوهم بعد ماطلع موضوع سحر سيبهم وعاش بروحه ؟
يزن :: قالتلي ان(قصت عليه )
نور :: قاااالتلك .. اكيد ح تقولك شي يصفي صورتها قدامك .. امها وسحر الي درااته زمان لي عمي رضا باش يقعد خدام تحت رجلين اختها . هذي مش قصة شفناها ف مسلسل ولا فيلم ولا رواااية هذا واقع وعلم نقرو فيه ..
يزن :: ( وقف يتنهد بقوة ) انى ماشي
نور :: يزن ااعطي فرصه لي زواجك .. انت وااخد بنت ناس وعالم والعيله كلها تحلف بتربيتها وبعيلتها .. والا من توا روح طلقها ورجعها حوش اهلها . ماتتحكمش فيها شهرين وانت قلبك مع غيرها
يزن :: مع سلامه ( طلع وقربع الباب ) ..
نور :: ( طلعت مشت لي دارها وسيف كان مقعمز لداخل ومخليهم ع راحتهم .. بدت تنحي في اكسسوراتها )
سيف :: خيرك تنحي ؟
نور :: ( حطت ايديها ع وجهه وبدت تبكي )
سيف :: ( قرب منها ينحي في ايديها ) علاش تبكي نور شن في ؟
نور :: ( نحت ايديها وبدت تتكلم ) علاش دارلها هكي من الاول مدام يفكر في وحده تانيه علاش تزوجها ووهمها بحوش وعيله ؟ .. حرام سارة ماتستاهلش .. والله ماعندي وجهه نمشي ونضحك ونقعمز في حوشها وخوي بيطلقها ولاكأنه صاير شي
سيف :: ( حضنها ) خلاص حبيبتي اهدي .. كل مشكله وليها حل . ونصيب صدقيني مايمشي الا للمكتوب ليه
نور :: ( شبحتله وحطت ايديها ع لحيته وتبكي ) مم مم مانعرفش علاش تفكرت حياتنا . كل حاجة صارت معاك في يوم انى كنت سبب فيها . مانفرقش شي ع يزن دخلتك في دوامات وانت مش ذنبك وماتستهلش
سيف :: انى معاش يهمني الي فات ولا يهمني نفكر فيه .. انى الي يهمني انتي وطالمـا انتي معاي وجنبي وبصحة .. خلاص كسبت كل شي في دنيا
نور :: ( حضناتـــه وتبكي ) الله لا يحرمني منك .
سيف :: ههه ولا منك . .يالله امسحي دموعكـ ولو ماتبيش تمشي عادي ارتاحي وغدوا بري شوفيهم
نور :: ( حاضناته وساكته )
___________________________________
11:00م
( روحو كلهم وخشيت ضميت انى وتغريد وملاكـ والاء الكوجينه ودرنا دورة ع الحوش هدرزنا واستغربنا من نور ماجتش اتصلت بيها اكتر من مره ماردتش عليا وبعدين كل وحده مشت لي حوشها .. قعمزت نتفرج شويه ع تلفزيون وحسيت بالوقت بدي يتأخر وجت العشرة ويزن ماروحش . قمت تلفوني اكتر من مره بنتصل بيه ونتردد .. جبت بطانية خفيفه وتغطيت وقعمزت نتفرج لين معاش حسيت بروحي ورقـدت من تعب )
________
( تـاني يوم صبــح )
