ပြန်လည်ရှင်သန်ခွင့်ရတဲ့ ဖုဘလော့ဂါလေးရဲ့ ချက်မယ်ပြုတ်မယ် အစီအစဥ်

၃၉

အပိုင်း ၃၉ လက်ထောက်ခြောက်ယောက်

ယွမ့်ထန်းက မျက်တောင်တချက်ခတ်ကာ လေးနက်သောလေသံဖြင့် ပြောလိုက်သည်။

“ကြယ်ဖလားကို ပြောတာပါ”

ကြယ်ဖလားဆိုသည်မှာ သည်လောကတွင် ကျော်ကြားသော ပွဲကြီးတစ်ခုဖြစ်သည်။ ကမ္ဘာဖလားနှင့်ဆင်တူပြီး ဘောလုံးကန်ခြင်းဆိုသည်ထက် မက္ခစွမ်းရည်ကို ယှဉ်ပြိုင်ကြခြင်းဖြစ်သည်။ ထိုနာမည်ကို ပထမဆုံးအကြိမ် ကြားချိန်ကဆိုလျှင် ယွမ့်ထန်းက အချိန်အတန်ကြာရယ်ခဲ့မိသေးသည်။

ဟော်ယွန်ချန်းက ခေါင်းငြိမ့်ပြီးနောက် အပိုစကားမပြောတော့ပေ။
သို့သော် ဝမ်ကျယ့်ယန်က သူ၏အနားတွင် နီးကပ်စွာရပ်နေခဲ့ခြင်းဖြစ်ကာ မနေနိုင်ဘဲ ခပ်တိုးတိုးပြောလိုက်သည်။

“ကြယ်ဖလားအကြောင်းပြောမယ်ဆိုရင် မာရှယ်ဟော်က ဒီနှစ်တွေအတွင်းမှာ တောက်လျှောက် ချန်ပီယံဆုကို ရသင့်တဲ့သူပဲ”

ဟော်ယွန်ချန်းက ချောင်းဟန့်ကာ သူ့အား အေးစက်စွာစိုက်ကြည့်လိုက်သည်။

ယွမ့်ထန်းက တွေးတောပြီးနောက် စိတ်ဝင်စားသွားသည်။
“သူက ဒီလောက်အထိ စွမ်းအားကြီးတာလား”

ရွှယ်ရွေ့ကလည်း ထိုစကားကိုကြားသောအခါ တစ်ချက်ကြည့်လာသော်လည်း ဟော်ယွန်ချန်းကို ပြန်ကြည့်မိချိန်တွင် ချက်ချင်းဆိုသလို မျက်လွှာချလိုက်မိသည်။ သူက မပြောရဲတော့ချေ။

ယွမ့်ထန်းက ဟော်ယန်ချန်းကိုကြည့်သည်။ ဟော်ယွန်ချန်းက သူ၏အနားသို့ကပ်လာပြီးပြောသည်။

“ အတိတ်က ကိစ္စတွေပါပဲ၊ ဒါက ထည့်ပြောဖို့မတန်ပါဘူး”

“ဘာလို့ မတန်ရမှာလဲ”

ရွှယ်ရွေ့က မနေနိုင်ဘဲ ခေါင်းကိုပြန်မော့လာသည်။ သူက ခိုင်မာစွာငြင်းဆန်၏။

“အဲဒိအချိန်တုန်းကဆိုရင် မာရှယ်ဟော်က ချန်ပီယံဆုရဖို့ အလားအလာအရှိဆုံး လူတစ်ယောက်ဖြစ်ခဲ့တယ်၊ သူ့ရဲ့ကျော်ကြားမှုက မိုးထိုးမြင့်တက်ခဲ့တယ်မဟုတ်လား၊ နောက်ဆုံးပွဲစဉ်ကဆိုရင် အခြားယှဉ်ပြိုင်တဲ့ ဆယ်ယောက်ကျော်လုံးက သူ့ကိုအတူပေါင်းပြီး တိုက်ခိုက်ခဲ့ကြတယ်၊ ဒါပေမယ့် မာရှယ်ဟော်က သူတို့အားလုံးပေါင်းပြီး တိုက်ခိုက်လာတဲ့အချိန်မှာတောင် စွမ်းအားကြီးလွန်းလို့ သူက အားလုံးကို ရင်ဆိုင်နိုင်ခဲ့တယ်”