روايه بنت الجيران

(الحلقه الرابعه ) ( شكل العيال اللى هيعملوها ) ❤

في الحلقه السابقه :__
حسن : الو ! ها يابنى ماتنطق لقيتها ولا لا ؟
مصطفى : لقيت ايه ياعم انا شكلى كان زفت دلوقتى .. عمال ابص ف وشوش البنات زى الاهبل وبردو مالقيتهاش
حسن : انت اللى غشيم والله .. اركب وتعالى يا حيله ولما تيجى نبقى نشوف حاجه تانيه نفكر فيها
مصطفى . خلاص انا بركب وراجع اهو ... انا جوعت اصلا والشمس فرهدتنى النهارده
حسن : ههههههههههههههههههههه دانت مسخره ... ارجع اتغدى ونام شويه وعلى بالليل هرن عليك
مصطفى : ماشى يا اخويا
(مصطفى وصل ب عربيته تحت البيت ..... واسماء وامانى جايين على رجليهم بعد ما الباص نزلهم على اول الشارع ))
......................... ( الحلقه الرابعه ) ❤
حسن : حمد الله ع السلامه يا نجم النجوم ... يا خايب يا ضايع مش عارف تلاقي البت
مصطفى : الاقيها فين ياعم انا بصيت على وشوش البنات كلهم والنبى وكان منظرى زباله
حسن : ههههههههههههههههه طب طالع البيت ولا رايح فين ؟
مصطفى : ايوه ياعم طالع اريح شويه ...
حسن : طب هنخرج فين بالليل
مصطفى : اما اصحى ابقوا رنوا عليا بقي اما نشوف
((اسماء على باب العماره وطالعه ... ومصطفى ف طريقه للعماره ))
حسن : بقولك ايه يا درش ..
مصطفى : خير يابنى منا كنت لسا عندك .. اطلع من نافوخى انا جعان وعاوز اريح شويه
حسن : تعالى بس ...هات مفتاح عربيتك ورايا مشوار كده وهرجعهالك قبل ما تصحى
مصطفى : اهو بس خلى بالك ع العربيه لاحسن اطلع عين امك
حسن : ماتخافش ياعم هو احنا قليلين ف البلد ولا ايه
مصطفى : رايح فين يا نيله
حسن : عاوز افسح البت مراتى شويه ... هنروح نتغدى ف اى حته حلوه كده ماتيجى معانا
مصطفى : لا ياعم الله الغنى .. مراتك رغايه مابتفصلش هههههههههههههه
حسن : عشان تعرف انا شايل ف قلبى وساكت
.مصطفى : يلا سلام بقي
....................................
((اسماء طلعت وقابلت ام مصطفى ع الباب ))
ام مصطفى : ازيك يا سمسمه عامله ايه يا حبيبتى ؟
اسماء : الحمد لله يا طنط انتى عامله ايه ؟
ام مصطفى : كويسه يا حبيبتى اخبار شغلك ايه ؟ انتى بتشتغلى صح ؟
اسماء : اه يا طنط الحمد لله مرتاحه الحمد لله
نور (اخت مصطفى ) : ازيك يا ابله اسماء
اسماء : ازيك انتى يا نور .. بطلتى تيجى تقعدى معايا ليه ؟
نور : هبقى اجى .. هنتغدى مع مصطفى اخويا واجيلك
اسماء : ماشى يا روحى هستناكى
نور : اوكى يا قمر
ام مصطفى : اخوكى مصطفى طالع يا نور ... ماتيجى تتغدى معانا يا سمسمه
اسماء : شكرا يا طنط ماتحرمش منكوا .. طب عن اذنكوا انا بقي عشان شكل بابا وماما واقعين م الجوع
ام مصطفى : اتفضلى يا حبيبتى ... نور سيبى الباب مفتوح لاخوك عشان طالع
............................
مصطفى : انتوا سايبين الباب مفتوح ليه ؟
نور : كنت واقفه مع جارتنا ... دى بت عسوله اوى انا بحبها
مصطفى : والنبى ياختى ؟ طيب حبيها على راحتك
نور : ماتيجى نجوزهالك ياعم ... والله ما هتلاقى احلى منها .. دى مزه مزه والنبى
مصطفى : خليكى ف حالك يا فوزيه ياختى .. وبعدين منا شوفتها من يومين
نور : شوفتها فين ؟
مصطفى : كنت انا نازل وهى طالعه وقولتلها مساء الخير
نور : ايوه ورأيك عنها ايه ؟
مصطفى : عاديه يعنى .. حلوه بس مش للدرجه اللى عماله تتكلمى عنها دى
نور : ياعم اجرى .... والله تلاقيك احول وشوفت واحده تانيه
انا بنت اهو وبقولك دى احلى بنت ممكن تشوفها ف حياتك اجرى اجرى .. احسن من البنات اللى تعرفهم
مصطفى : هشش اخرسى هتفضحينى .. امك ف المطبخ يابنت المهبوشه هتسمع
نور : ههههههههههههههههه ماهى عارفه ..
مصطفى : طب ايه مش هنتغدى بقي ف ليلتكوا دى
نور : ماما خلاص بتسخن بس الاكل .. وبعدين انت اتأخرت ليه النهارده
مصطفى : لما تكبرى هقولك
نور : طب انا عاوزه اخلص اكل عشان اروح اقعد مع .... مع سمسمه
مصطفى : سمسمه مين دى ؟
نور : اسماء جارتنا
مصطفى : يا ماشاء الله .. ايه الصدف دى ؟ هى اسمها اسماء كمان؟
نور : ايوووون
مصطفى : طيب ياختى قومى هاتى الاكل من امك على ما اغير هدومى
........................................
ام مصطفى : كمل اكلك يابنى
مصطفى : كلت الحمد لله .. انا هدخل اريح شويه وصحونى على العشا كده
نور : ماما انا رايحه عند اسماء
ام مصطفى : ماشى واحترمى نفسك وانتى هناك ماتغلسيش عليهم
نور : انا غلسه ؟
مصطفى : دانتى منبع الغلاسه كلها يا فقريه .....
نور : كده ؟ وانا اللى كنت عاوزه اظبطك عندها واقولها عنك اى كلمتين حلوين
مصطفى : لا وحياه امك ماتنطقى .. مالكيش دعوه بيا
نور : انت الخسران اقسم بالله
........................................
((بعد اربع ساعات ))
ام مصطفى : صحى النوم يابنى انت لسا صاحى العشا خلصت من بدرى
مصطفى : اه .. بت يا نووووووووور اعملى شاى
ام مصطفى : نور لسا عند الجيران .. قاعده مع اسماء ومى اختها
ماتيجى اجوزهالك يابنى .. انت شكلك أهبل ؟؟ انت شوفت البت ؟
مصطفى : هو فيه ايه ؟ اه شوفتها وانا نازل من يومين .. فيه ايه يا جماعه عاديه يعنى
وبعدين انا قريب اوى احتمال اقولك عاوز اخطب
ام مصطفى : وهى مين بسلامتها اللى عاوز تخطبها
مصطفى : مش عارف
ام مصطفى : ماتنطق يابنى مين ؟
مصطفى : والنبى ما اعرف ههههههههههههههه واحده شوفتها وعجبتنى وبدور عليها
ام مصطفى : النبى يارب عوض عليا عوض الصابرين .. تصدق انت بتعليلى ضغطى
مصطفى : سلامه ضغطك ياست الكل يا بطه انتى ههههههههههههه بس لما تشوفيها هتفرحيلى والله . ادعيلى بس ربنا يعترنى فيها
ام مصطفى : لا . انا هدعى ربنا يهدى قلبك من ناحيه البت جارتنا دى
مصطفى : ياستى محدش عارف الخير والنصيب فين ؟
انا قايم البس وخارج .. عاوزه حاجه اجيبها وانا جاى
ام مصطفى : سلامتك يا بنى
...........................................
((( تحت البيت ))
مصطفى : اخبارك ايه ياعم محمد
ابو اسماء : تمام يا درش على فين ؟
مصطفى : خارج شويه مع صحابنا هنا ... اهو بنخرج شويه م اللى احنا فيه
ابو اسماء : ربنا يعينك .. ماتيجى تتعشى معانا انا جايب عشا زياده
مصطفى : الف هنا يا حاج ... حاسب بس لا البت نور اختى تخلص عليكو
ابو اسماء : نور اختك ؟ دى حته بونبونايه ربنا يخليهالكوا
........................................
((ف الكافيه ))
حسن : ايه ياعم اتأخرت ليه ؟
مصطفى : مافيش اهو ... بتعملوا ايه يا شله المقاطيع
فين مفتاح العربيه يااااض
حسن : اهى ياعم ... سليمه اهى وزى الفل
مصطفى : طب ولو لقيت فيها خربوشه هعمل فيك ايه ؟
حسن : وانا مالى انا بقي .. وبعدين اهى قدامك شوف فيها حاجه .. عيب بقي
مصطفى : ماتيجو نروح ل على نسهر معاه شويه هناك
.............................
((ف البيت بالليل ))
مصطفى : ايه اللى لسا مصحيك يابت مش وراكى مدرسه بكره ولا ايه ؟
نور : مش جايلى نوم .. وبعدين الساعه لسا ماجتش واحده ياعم
مصطفى : والنبى ايه وهو النوم متأخر ده يبدأ من امتى ؟
نور : يعنى من بعد 2 ونص كده ههههههههههههه
مصطفى : طيب ياختى
عملتى ايه عند الجيران النهارده .. اوعى تكونى فضحتينا
نور : عيب .. انت تعرف عن اختك كده ؟
مصطفى : دانتى كده وابو كده كمان
نور : مافيش قعدت مع اسماء ومى اختها .. مى طلعت زميلتى على فكره ف اولى ثانوى
مصطفى : يا ماشاء الله .. وكمان اتعرفتى عليهم كلهم اهو
نور : اسكت فضلنا نضحك على اسماء شويه ضحك النهارده ههههههههههههههههه
مصطفى : خير يا بومه
نور : مافيش فضلت تضحكنا على الشغل بتاعها وعلى شويه حاجات حصلت اليومين اللى فاتوا
مصطفى : اه وانتوا ماصدقتوا بقا ف الرغي بتاعك
نور : استنى هقولك
مصطفى : مش عاوز اتنيل اعرف انا ... قومى اعملى شاي بما انك سهرانه كده ومصحصحه ...
نور : لا ياعم انا هبطت شاى طول النهار
مصطفى : بتقولى ايه ؟ قومى يابت اعملى شاى
مصطفى : ايه ده مين اللى بيخبط دلوقتى ؟
نور : استنى هفتح دى اكيد اسماء او مى .. اسماء بتعمل كيك وقالت هتدوقنى هههههههههههههه
مصطفى : طب قولى مين الاول قبل ما تفتحى
نور : حاضر ..... مين ؟!
اسماء : انا يا نور افتحى
..............
نور : ادخل ياخويا جوه دى اسماء
مصطفى : هى هتدخل ولا ايه ؟
نور : معرفش يمكن تدخل
مصطفى : طب وايه يعنى منا جوه اهو وبعدين الستاره مداريه عليا يا ناصحه اللى واقف على الباب مش هيشوفنى
نور : طيب
نور : ادخلى يا سمسمه تعالى
اسماء : لا لا خدى بس الطبق بتاعكوا اهو وخلى طنط تدوق وتقول رأيها
نور : ماما نايمه دلوقتى . هناكل انا ومصطفى اخويا واقولك رأيى ورأيه بكره
اسماء : ماشى يا ستى .. يلا تصبحى على خير
نور : وانتى من اهله يا قمر
نور : خد يا اخويا ... كيكه ريحتها تفتح النفس اهى من بنت مزه وزى القمر
والله يا درش انا بقيت احس انك أحول
مصطفى : ماتحترمي نفسك يا بغله .. ايه أحول دى يابت ؟
نور : اصل مستغرباك بصراحه وانت بتقول على اسماء دى عاديه ومش اد كده
مصطفى : اهو كل واحد ورأيه بقي .. وبعدين دى اوزعه اوى يا نور مش كده يعنى
نور : هى مين دى اللى اوزعه ؟
مصطفى : جارتنا دى اللى عماله تتكلمى عنها
نور : انت بتتكلم عن مين ؟ مش بقولك أحول .. وربنا شكلك بتتكلم عن واحده تانيه
هههههههههههههههههههه اه يانى يا بطنى ...
مصطفى : وحياه امك ؟ لا هى جارتنا كانت طالعه وانا كنت نازل وقولتلها مساء الخير كمان
نور : والله ؟ وهى كده تبقى هى ؟ مايمكن تكون صاحبتها جايالها ولا حاجه يا ناصح .. لان وانا هناك كان فيه واحده جاتلها اسمها امانى بنفس المواصفات اللى بتقول عليها دى .. ممكن تكون بتتكلم عنها
مصطفى : ممكن بقي .. مش مهم ... بس ايه طعامه أم الكيكه دى ؟؟ هى عاملاها ازاى
نور : اتجوزها وانت تعرف عاملاها ازاى ؟
مصطفى : انا شوفت واحده يا بت يا نور من كم يوم مجننه اهلى وعمال ادور عليها والله
ولو شوفتها هاجى اخدك من ايدك انتى وامك ونروح نخطبها .. انا خلاص نويت وقررت على ده
نور : بس مش هتكون احلى من اسماء والله
مصطفى : والله اسماء دى عمرها ما تبقى احلى من البنت اللى شوفتها
نور : هنشوف يا اخويا
..............................
((تانى يوم ))
ام مصطفى : مصطفى انت نازل ؟
مصطفى : اه يامه !! عاوزه حاجه ؟
ام مصطفى : طب استنى .. خد البت نور معاك ف سكتك لاحسن هتتأخر مقصوفه الرقبه دى
مصطفى : بسرعه يا بت يا نووووور هتأخرينى
نور : اهو جايه اهو ..... استنى اما انده على البت مى
مصطفى : مى مين انتى كمان ؟
نور : مى يابنى جارتنا .. اخت اسماء
مصطفى : طب اخلصى انا مستنيكوا تحت هدور العربيه على ما تنزلوا .. بسرعه
نور : طيب خلاويص اهو
.........................
نور : يا مى .... يا مى !! انتى جاهزه ولا لسا
اسماء : ازيك يا نور .. تعالى ادخلى .. مى خلاص جاهزه وخارجه اهى
نور : لا خليها تشهل شويه ... مصطفى اخويا تحت هنروح معاه هيوصلنا ف سكته
ابو اسماء : يابنتى مش عاوز نتقل على اخوك
نور : لا يا عمو هو كده كده بيوصلنى والمدرسه ف سكته ...
تعالى معانا يا اسماء لو شغلك ف سكتنا
اسماء : مره تانيه ان شاء الله بقا انا لسا مش جاهزه
نور : عادى هنستناك .. مصطفى مش هيقول حاجه
ابو اسماء : لا اتوكلوا انتوا على الله بقي عشان مش عاوزين نأخر مصطفى على شغله
نور : ماشى .. يلا يا مى
مى : يلا
............................
نور : فاضي يا سطا ؟
مى : هههههههههههههههه
مصطفى : اركبى يا جزمه اركبى ان ما وريتك
مصطفى : ازيك يا مى ؟ انتى ايه اللى خلاك تعرفى البت اختى دى ؟؟ دى عقلها طاير
مى : دى حبيبتى يا عمو مصطفى
مصطفى : ايه ايه ياختى انتى كمان ؟ هو مين ده اللى عمو .. اسمى مصطفى بس . احنا جيران واخوات .. وبعدين ده اللى ف سنى بيتجوز اللى ف سنك ههههههههههه
نور : ههههههههههههههه ماعندناش بنات صغيره تتجوز قبل اختها الكبيره
مصطفى : لمى الدور يا فوزيه .. عارف قصدك
مى : هههههههههههههه ايه الحكايه ها ها ؟ ايه الحكايه ؟
نور : ماتشغليش بالك هبقى احكيلك
مى : موووووشى ... هنشوووف
........................
مصطفى : يلا اتفضلوا يا برنسيسه انتى وهى .. خلى بالكوا من بعض
انتوا هتخرجوا امتى النهارده ؟
نور : يعنى على 2 ونص كده
مصطفى : ماشى لو جيت ف ميعاد طلوعكوا هبقى ارن عليكوا .. اشطا ؟
نور : اشطا
مصطفى : سلام
نور : سلام يا صاصا
مى : سلام يا عمو
مصطفى : امشى يابت انتى وهى من هنا
مى : هههههههههههههههههههه
............................
مى : عسل اخوك يابت يا نور ماتجوزيهولى
نور : لا ياختى انا حاجزاه لواحده تانيه
مى : واحده مين بقا ان شاء الله . هتلاقوا احلى منى فين ؟
نور : حاجزاه ل أسماء اختك
مى : اه اذا كان كده ماااااشي
نور : بقولك ايه !! عاوزين نخليهم يتقابلوا كده بدل ماهما كل واحد ف وادى
مى : ههههههههههههههههه فكرى وخططى وانا معاكى يا كبيره ولو روحنا ف داهيه ولا اعرفك
نور : اه يا ندله ههههههههههههه اصل انتى مش عارفه
مى : عارفه ايه ؟
نور : الواد اخويا شكله شاف واحده تانيه من اصحاب اختك ومفكرها ان هى دى اسماء .. عمال يقولى اوزعه ومش حلوه ومعرفش ايه .. ف انا عاوزاهم يشوفوا بعض .. يمكن ربنا يسهلهم ويحصل ف الامور امور
مى : بصراحه ... هما الاتنين لايقين على بعض .. البت اختى ابويا مستخسر يجوزها اى حد ودايما كان يقولها مش هجوزك الا واحد يكون راجل وشايل نفسه واهله ويكون حلو زيك كده عشان يغنيك عن الدنيا كلها
نور : طب وأسماء ؟ بتفكر ف الجواز ولا لسا بتقول مش وقته
مى : أسماء دى عسل .... بتقول بس انا ربنا يقابلنى ف الانسان اللى احبه من اول نظره وانا اللى مش هسيبه
نور : هييييييييح طب واحنا يا منيله مش هنحب ونتحب ولا ايه ؟
مى : اخرسي بقا .. وبعدين فيه مشكله هتقابلنا
نور : مشكله ايه ؟
مى : من كم يوم كده سمعت اسماء بتكلم امانى صاحبتها وهما عندنا ف اوضتهم ... وكانت أسماء شبه بتتكلم عن واحد شافها ف الشغل ومعجب بيها ومعرفش ايه ....
نور : طب واسماء ؟ مهتمه بالموضوع ده ولا مكبره دماغها
مى : هى قالت عنه انه باين عليه راجل ووسيم جدااااا ولو جات فرصه وقابلته تانى ممكن تفكر لو صارحها وطلب ايديها
نور : اوباااااااااااا .. لا يا حبيبتى احنا النهارده لازم نخلى مصطفى يشوف اسماء باي شكل
مى : ناويه على ايه يا سوسه ؟
نور : جاتنى حته فكره .... اسمعى يا ستى
.................................
((يتبع))