#صدفة
#الكاتبةورودالخالدي
البارت١
ڤيان:::
رجعت من الكلية لكيت ماما معزله البيت ومخليه المواعين ..والجداري بكراتين..وكم جهاز كهربائي بسلال وقسم من ملابسها وملابسي اني وروان بجنط..رغم احنا لحد الان ملاكين بيت نأجره ونشيل بس ماما تتحضر لشيلتنا من هسه لان بعد متتحمل كلام ابو البيت صار ٣,شهور يهدد بينا يريدنا نطلع من البيت بحجة يريد يفلشه ويبنيه من جديد ..ماما تعبت كل ميجي تكوله اصبر علينا كم يوم الى ان نلكي بيت زغير لو شقه لو مشتمل سعرهن مناسب..بس هو اخر مرة كال الجن اسبوع واحد اذا مطلعتن من بيتي اشمر غراضجن بالشارع والاسبوع بعدله يومين ويخلص اول مفتت للبيت كلت:
هلووو ماما..شو معزله الغراض!!
اي شسوي لازم اعزلهن كولشي يصير يجوز يجي ابو فاروق ويشمرغراضنا بالشارع ع الاقل مرتبات بجنط وكراتين وسلال
ضجت من حجيها فكلت:
يوم الله لايكولها ..ليش يشمرون غراضنا بلكي نلكة مكان اليوم لو باجر ونشيل..
هسه انتي لتضيعين الوقت بسرعة تغدي وغدي اختج ..وانطيها علاجها ..بينما اروح اطلع الهدوم ..اريد افتح بث ..لازم ابيعهن اليوم كولهن تنزيلات حتى لو بخسارة ..ولا يبقن على كلبي ع الاقل يصير عندي كم فلس ادفعهن مقدمة ايجار..
ماشي ماما..انتي لتضوجين ..هسه رب العالمين يفرجها!!
الله كريم ماماتي يله استعجلي. حتى ادورين بالكروبات بلكي نحصل مشتمل لو شقه مناسبات
ورحت صبيت غده وكعدت اتغدة اني وروان طبعا روان اختي مريضة ..بالسكر..من عمر ٥ سنوات وهي حاليا عمرها١٠سنوات حيل ماثر عليها المرض وسوالها مضاعفات بالكبد وبالكلى وعايشه ع العلاج وبين فتره وفتره توكع علينا ونضل حايرين ..بعلاجها لان احنا دخلنا محدود ماما تقبض راتب الرعايه مال الارامل وتدفعه للايجار..كوله..وتشتغل بالبيت تبيع ملابس باله وفرشات وديباجات تفتح بث مباشر والنسوان يشترن منها وهي هم صحتها مو مثل قبل تشكي..من رجليها وظهرها خطية ..واني دائما احس نفسي مقصره رغم اخذ منها شي قليل مصاريف للكلية يعني بس فلوس ابو الخط الي ياخذني ويرجعني من الكليه وابد ما اصرف انقل محاضرات بايدي من البنات ..وما افوت لكافتريا الكليه ابد ..وملابسي بسيطات بس البنات المقربات يكوللي انتي حلوة رغم ملابسج ..العاديه بس نازكة وتخبلين..الحمد لله ع تمام الخلقه وجمالها...واحاول اتجنب اختلط بأي ولد من داومت بالكليه الى ان وصلت للمرحلة الاخيره حاليا رغم كومه شباب حاولو يتقربون مني بس اني مثل السيف ما اسمح حتى احد يجاملني ولا انطي مجال لاي ولد
يتقرب..رغم عانيت هوايه من شباب الكليه بس رب العالمين حماني من تدخلاتهم ومحاولاتهم السخيفه المكشوفة..واكو شباب ..تعجبهم اخلاقي وكم مره البنات وصلن الي حجي ع اساس يردون يتقدمولي بس اني اصد الفكرة وارفضها واحس اني لازم اتخرج واشتغل واساعد ماما ع هالحياة مو اروح اتزوج واخليها وحدها هي وروان..وحدهن
