عدوك في وجبة

الحجز

في مديرية امن القاهرة ، جوة حجز الرجال متجمع وليد ومراد مع بعض ، والدكتور كارم ودكتور حازم وعمر مع بعض ، وليد يكلم مراد ويقوله ، انا مش عارف ايه اخرة اللي احنا فيه دا ، يرد مراد عليه والله ما عارف زي ما انت شايف بنخرج من نقرة نقع في توحضيرة ، ربنا يسترها وما يبقاش فيها سجن ، وليد عنيه تبرق ويردد اخر كلمة قالها وليد ، سجن .. يا نهار اسود ويبدأ يضحك بطريقة هيسترية ، ههههههههه تخيل كدا بقى انا عملت كل دا عشان انتقم من حماتي ، الحكاية تلف عليا وهى اللي تنتقم مني وتشوفني وانا لابس البدلة الزرقا ، هههههه وانا بقى عارف خالتي كويس دي هتشمت فيك شماتة ، انت هتقولي حماتي وعارف بتحبني قد ايه ، والاتنين يضحكوا وبعدها وليد يقول لمراد ، إلا قولي صحيح هو دا الدكتور ابن المجانين اللي كان خطفنا ، ايوة يا سيدي واللي جنبه على ايده الشمال دا يبقى تلميذه والمساعد بتاعه ، واللي من الناحية التانية دا بقى بتاع الكومبيوتر ، اه هو دا بقى اللي عمل موقع عدوك في وجبة دا ، بالظبط كدا هو اللي عمله واحنا اللي شربناه ، وعلى الناحية التانية ، حازم يكلم دكتور كارم ويقوله ، انا كدا مستقبلي ضاع يا دكتور كارم ، لا ضاع ولا حاجة يا حازم ، اثبت انت بس وكل حاجة هتعدي ان شاءالله ، احنا لا أذينا حد فيهم ولا جينا جنبهم بأي حاجة ، طب دا انتوا كدكاترة لكن انا اعمل ايه ، هبقى واحد مختل عامل موقع اعلان للقتل ، دول مش بعيد يعلقوني على حبل المشنقة ، واهون حاجة ممكن تحصلي يرحلوني على مستشفى المجانين ، اهدا يا عمر انت كمان مفيش حاجة هتحصلك زيك زي حازم ، ازاي بس يا دكتور ، زي ما بقولك يا عمر اهم حاجة انك تكون هادي ، يتكلم حازم برعب واضح ، المصيبة لو وصلوا لمكان الجثة المدفونة في المكان هناك ، يرد دكتور كارم عليه بسرعة وبعنف لكن بصوت واطي ، انت اتجننت ازاي تجيب سيرة الموضوع دا هنا ، الموضوع دا انتهى بنهاية التجربة اللي فاتت ، وحتى لو وصلوا ليها هو مات بهبوط حاد في الدورة الدموية ادى الى توقف عضلة القلب ، يعني وفاة طبيعية مية في المية ، يرد عليه عمر ويقول ايوة يا دكتور بس هو مات بسببكم ، اقصد اقول بسبب التجربة اياها يعني احنا اللي هنتحمل نتيجة موته ، يرد الدكتور كارم بحزم وصرامة ، انا قولت الموضوع دا انتهى ، ومش عايز اسمع عنه اي حاجة على الاطلاق ، طيب على الاقل نتكلم في المصيبة اللي احنا فيها دي ، ولا إيه يا دكتور حازم انت برضوا مش معايا ، اكيد طبعا معاك يا عمر ، بس انا متأكد ان دكتور كارم هيقدر يتصرف ، ايوة يا حازم خلاص انا فعلا اتصرفت وفي محامي له اسمه هو اللي هيمسك القضية وهيتولى الدفاع عننا ، مين دا يا كتور ؟ المستشار رضا نصار عبد الحميد اظن تسمع عنه يا عمر ، هو في حد في مصر كلها ما يعرفش المستشار رضا نصار عبد الحميد ، ان شاء الله براءة وهنخرج من هنا قريب ، وفي اوضة الحجز الحريمي علا ورانيا منهارين من العياط ، وبدرية ثابتة ولا كأنها في اوضة سونة في فندق خمس نجوم ، رانيا تسألها ودموعها على وشها ، انتي ازاي يا ماما ثابتة كدا وهادية ؟ انتي مش خايفة من الوضع اللي احنا فيه دا ؟ وهخاف من ايه بقى ، انا واحدة وكنت مخطوفة لا انا اتفقت مع ناس عشان تقتل حد معين ، ولا اكلت لحمهم وعملتها حواوشي ، اه طبعا يا طنط انتي الوحيدة فينا اللي مافيش اي حاجة عليكي ، طب واحنا يا رانيا هنعمل ايه في الورطة اللي احنا فيها دي ، والله يا علا انا مابقتش عارفة حاجة خالص ، بندخل في كل مصيبة اكبر من اللي قبلها ، ربنا وحده هو اللي قادر يخلصنا منها ، ربنا .... عرفتوا ربنا دلوقت انتي وهى ، وهو ربنا قالكم تقتلوا لا ومش بس كدا تطلبوه في غدوة دا انتوا جبابرة ، وانا اللي كنت فاكرة نفسي ياما هنا وياما هناك ، دا انا طلعت جنبكم غلبانة ، هو انتي هتقطمينا يا ست ماما ، اللي حصل  خلاص حصل المهم دلوقت اللي جاي ، فعلا يا رانيا عندك حق المهم دلوقت هنتصرف ازاي ، يدخل عسكري الحجز وينده على رانيا وبدرية ، يخرجوا ويدخلوا اوضة تانية فيها مكتب وقاعد عليه رتبة لكنه لابس ملكي ، ويتفاجئوا براضي تجري رانيا عليه وتحضنه ، بابا وحشتني اوي رانا عاملة ايه طمني عليها يا بابا ، دلوقتي بس افتكرتي رانا ، ما فكرتيش فيها ليه قبل كل دا ما يحصل ، خلاص يا بابا ارجوك انا عرفت غلطتي واتعلمت منها ، مش انا وبس انا ووليد وماما كمان ، ازيك يا بدرية قلقت عليكي اوي لما اختفيتي ، وما تتخيليش زعلت عليكي قد ايه لما عرفت انك بعد الشر عليكي اتقتلتي ، اومال مكنتش عايز تقلق ولا تزعل عليا يا راضي بعد العشرة الطويلة دي ، دا انت لو كنت مربي قطة وخرجت ولا رجعتش هتقلق عليها ،  يا ماما بابا قصده انك غالية عليه اوي ، يوه ما انا عارفة يا بت بس بنغشه هو واخد مني على كدا ، يضحك راضي هههههه عندك حق يا بدرية ولو كنتي قولتي حاجة تانية كنت قولت انهم بدلوكي ، المهم دلوقت يا بابا هنخرج ازاي من الورطة دي ، المحامي بتاع الدكتور المخبول دا قابلني وقالي نعمل ايه بالظبط ، قالك ايه يا راضي ، قال انكم كلكم تقولوا انكم متفقين على كدا مع الدكتور ، يعني انكم تخوضوا تجربة علمية نفسية وانكم كنتم على العلم بدا ، انا كتبت الكلام في الورقة دي زي ما قال بالظبط عشان منساش ، طيب كويس اوي الكلام دا بس وليد ومراد لازم ياخدوا خبر بالاتفاق دا ، ما تخافيش جوز خالتك منيرة زمانه قابل مراد وفهمه على كل حاجة  ، طيب والبلاغ بتاعك يا راضي ماهو كدا انت اللي هتتشد فيها ، لا ما انا قولت اني مكنتش عارف حاجة وبسبب السن اختلط عليا الامر ، يعني هما لما يدوروا على الانترنت على الموقع بتاع عدوك في وجبة ، رد راضي عليها وقالها حاليا مش هيلاقوا حاجة خالص  ، وهما كمان معندهموش اي دليل غير كلامي ، اللي هو بقى اي كلام بالنسبالهم ، الحمدلله تقولها علا بعد ما عرفت بالكلام الجديد دا ، يعني خلاص هنخرج من هنا ، يرد مراد على وليد بعد ما قال كدا يقوله ، ايوة خلاص اخيرا الكابوس دا هينتهي ، ويخرجوا كلهم من الحجز وكل واحد فيهم نظرته للحياة اتغيرت ، وليد ورانيا رجعوا بيتهم وعاشوا مع بنتهم اسرة صغيرة سعيدة ، وعددها زاد بعد ما رانيا خلفت زياد ، ومراد وعلا اتجوزوا وعاشوا مع بعض في منتهى السعادة ، واكتملت سعادتهم بحمل علا ، وبدرية صحيح بعدت عن حياة رانيا لكن ما بطلتش منقارة مع وليد ، وهو كمان بقى يستمتع بمنقارتها وبقوا عاملين زي توم اند جيري ، اما دكتور كارم مش عايز يبطل تجارب نفسية على الناس ، ولسة دكتور حازم وعمر ماشين وراه