البارت الثامن
" عريس مين "
سألها بهدوء مصطنع وهو جواه بيغلي من الغيرة
حبيبة بلعت وبتوتر وارتباك وهي خايفة من نظرة الغضب الل فعنيه : ش ش شكل سلمى اتقدمت لعريس
نطقت بسرعة وزفرت أنفاسها بقوة وعادل ماقدرش يسيطر على نفسه بعدما سمع كلامها وانفجر فضحك .. وحبيبة بصتله بصدمة خلته يضحك أكتر بكل صوته .. حتى أن الموظفين الل فالمكاتب الل جنبه سمعو ضحكته ولأول مرة من ساعة ما اشتغل من سنين بالشكل ده
حبيبة رجعت بكرسيها لورا وبعدت عنه وهي جواها لخبطة .. مش فاهمه تصرفاته واندفاعه غضبه الغير مبرر بالنسبة لها .. وضحكه دلوقتي
عادل سيطر على ضحكه بصعوبة وهو بيفكر عدنان هيعمل ايه لما يقولها انها تقدمت ليه وضحك تاني بس بخفوت .. ولاحظ أن حبيبة بتبصله بدهشة وارتياب وفهم أنه اتسرع وأظهر مشاعره بسرعة هي متقدرش تفهمها ..
عادل بهدوء : احم .. احم
حبيبة انتبهت انها شاردة فيه فبصت للارض واتكسفت من نفسها وعادل ابتسم بحب وهو شايف كسوفها وتورد خدودها وقرب خطوة كمان من مقعدها وبهدوء قال : تعرفي مين الل خطبها
هزت راسها بلاء وهي لسه باصه للأرض وعادل كمل بحنية : بصيلي
رفعت عنيها ليه وهو كان مبتسم بجاذبية غريية وعيونه بتلمع بوميض خاص ليها هي وبس
عادل بإبتسامة سحرتها : عدنان أخويا
فتحت بقها ببلاهة وعنيها اتفتحت للآخر : ها
عادل بضحك من منظرها : ايو أصله بيحبها زي
حبيبة بصدمة : انت بتحبها
عادل ضحك بجنون : لاء بحبك أنت
وسابها ورجع لمكتبه وقفل الباب وراه وتنهد براحة وهو مبسوط لأن عدنان اخيرا تقدم لسلمى زي ما هو فاكر .. لف و قعد يكمل شغله : نستني شغلي بنت الذين ربنا يخليهالي1
قدام مكتبه حبيبة قاعدة مصدومة وشوية وهتبكي : أنا عمري ما اتعمل في كده طول عمري بعمل مقالب .. وامشيا حارتنا والحواري الل جنبها على عجين ماتلخبطوش
يقوم هو يجنني ويخليني لا طايله سما ولا طايلة أرض .. انا يعمل في كده .. منه لله مجنون .. مختل .. منفصم .. كان مالي انا ومال الشغل .. أنا مش بتاعة شغل أصلا .. يا بختك يا أميرة تستتي وقعدتي فبيتك معززة مكرمة .. أنما أنا معبدة .. اه ياني على الل بيجرالي
سكتت شوية وهي بتفكر فكلامه : يعني اخوه اتقدم لسلمى .. وسلمى عايزة تأجر عريس .. وهو بيحبني أنا ... وحسام يكتبلي مبروك عليك .. طب خدو انت وريحني .. قال بيباركلي قال .. أنا لازم أفهم سلمى عايزة ايه
اخدت الموبايل وبعتتلها رسالة على الواتس " أنت بجد عايزة عريس " دقايق ووصلها الرد " أيو شوفي حد يمثل يومين واديه قريشين كويسين "
حبيبة قرت بصدمة وماردتش لحظات وسلمى بعتت لها تاني " هااا هتساعديني"
" أكيد طبعا بس نتقابل الأول " كتبت حبيبة وهي لسه مدهوشة
لحظات وسلمى ردت " هاجيلك الشركة ونروح نقعد سوا "
" اوكي " ردت حبيبة وقفلت الموبايل ورجعت بضهرها ورا وهي بتفكر فكل الل حصل
💖💖💖💖💖💖💖
" يعني يامحمد مااخدتش منها لا حق ولا باطل"
محمد قعد جنبها بهدوء وحط ايده على كتفها : ما انت عارفة بنتك يا زهرة
زهرة بزعل بعدت عنه : عارفة بنتي بس عارفة انها تربيتك وأنت الوحيد الل بتقنعها
محمد : انا لاء أبدا دي مابتقتنعش اصلا
زهرة بحزن : بس هي فعلا متغيرة وعلى طول بسألها بتقولي مافيش وانا حاسة بحاجة وا...
محمد قام لما سمعو صوت حد بيخبط وقرب منها : معلش يا زهرة تعالي نشوف مين ونكمل كلامنا بعدين
زهرة هزت راسها وراحت معاه طلعو من اوضتهم ولقو زياد بيفتح الباب وبسمة داخلة
بسمة بحنية : ازايك يا حبيب خالتك
زياد : كويس ازايك انت وازاي الحج عبد الله
بسمة بحب : كلنا كويسين عامل ايه فدراستك
زياد : وليه السيرة دي ماكنا كويسين
بسمة ضحكت ومسكت خده : مامتك فين
زهرة : تعالي ياحبيبتي
بسمة : عاملة ايه يا زهرتي
زهرة بحب افتكرت حبيبة الل كانت بتناديها بكده : والله وحشتني حبيبة بقالها يومين ماجاتش
بسمة وهي بتبوسها وبتقعد جنبها : معلش بتيجي من الشغل مهدود حيلها وبتدخل تنام على طول .. ازايك يا محمد عامل ايه
محمد : كويس الحمد لله امال فين الحج
بسمة بضيق : مع المعلم شعبان تحت فالقهوة
زهرة باستغراب : مش شايفه انه بقا بيروحله كتير
بسمة بغضب : راجل يفور الدم .. قال ايه علاقتهم اتحسنت لما البنت حبيبة عتقت المعلم من مشاكلها .. نرفزني الله ينرفزه
زهرة بغضب : لا ده جوزك اتجنن وبقى يخرف .. هي أصلا حبيبة مالها ومال المعلم دي بلسم .. ملااااااك
محمد بصلها بصدمة وقام وقف : عن اذنكم
زهرة : رايح فين
محمد بسخرية وهو بيقلدها : رايح اقوله ان حبيبة بلسم .. ملاااااك
زهرة بغضب : روح كان معاها حق راجل نكدي
محمد بصلها بغضب وماردش وراح للقهوة
💝💝💝💝💝💝💝💝
عدنان راح بيته وماقدرش يفضل معاها فنفس المكان عدى على مكتبه اخد مفاتيحه والجاكت وطلع على ببته وعلى اوضة التدريب على طول ..
