لا ظلم يطغى على عدلتنا ⚖️

الجزء الخامس جريمة في المدرسة

مكتب محاماه بالتحديد غرفة اديب واوسم الساعه ٦:١٤ المغرب
كلهم كانوا قاعدين الا عيسى الي كان يدور بالغرفه
عيسى : مستحيل ٣٠ طالبه بالصف مافي وحده بينها وبين غصن شي !!
اوسم : ممكن مثل ما قالت المديره محبوبه
عيسى : الله العالم الحين احنا ركزنا على البنات الي استأذنوا من المعلمه عشان تكرمون يروحون الحمام ما بين الساعه ٩:٥٠ وبين ١٠:١٠
اديب : انت بتركز على كل البنات يعني بالمرحلتين المتوسط والثانوي ؟
هز راسه ب اي : وكانوا ٩ بنات اربعه من مرحلة الثانويه وخمسه من المتوسطه
اديب : عرفت قوانين يديده غير القواتين الغريبه الي ندري عنها
قعد عيسى ب اندماج
اديب : كلنا عارفين انه جوتي المدرسه موحد واهو فعلاً موحد حسب الي شفناه بس الشي الغريب ولي عرفت عنه اليوم انه اثار مرحلة المتوسطه غير عن اثار مرحلة الثانويه على انه الجوتي نفسه نفسه بس اثار المرحلتين مختلفه
اوسم بحماس : هالشي وايد راح يساعدنا
اديب : فعلاً بس في شي ثاني حتى المدرسات جوتيهم موحد نفس مال الطلبه بس الغريب انه اثار المعلمات غير عن اثار رؤساء القسم وغير عن الي يشتغلون بالاداره والإخصائيه والمديره وهذيل الي معاهم
وغير عن عاملات النظافه
عقد اوسم حواجبه : وشنو الحكمه من اختلاف الاثار اذا الجوتي نفسه ؟
رفع اديب حواجبه : مادري
طلع ورقه من الملف الي كان جدامه : كل الاثار الي تكلمت عنهم موجودين بالورقه
سحب عيسى الورقه من اديب
طلع الاثار الي كانت يم الجثه
وبدا يدور الاثار لمنو ؟
رفع راسه من الاوارق ونطق : اثار لمرحلة المتوسطه يعني اذا كانت النظريه مثل ما قلت بالمحكمه على حسب الاثار الي كانت بين الحمامين بأنه القاتله .....
رفع كفه ل اديب عشان يكمل : القاتله ظلت معاها بالحمام ل ثواني وبعدها طلعت من الحمام واتجهت للحمام الي يمه عشان تمسح اثار الدم الي على جوتيها
عيسى : اذا كانت نظريتك صح واتوقع انها صح على الاثار الممسوحه بين الحمامين بأنه القاتله وحده من هالخمس طالبات الي كانوا خارج الصف بين هالفتره
قام واتجهه للصبوره الي كانت بزاوية الغرفه وكتب
رسميه ، نجاح ، نوت ، مزنه ، الجادل
عيسى : اسامي ال خمس بنات الي كانوا خارج الصف
اديب : القانون الثاني الي عرفته عن المدرسه الي مادري شلون صايره انه اي طالبه تبي تروح الحمام لازم على المعلمه تكتب الوقت بالضبط متى راحت ومتى رجعت

فتح نفس الملف وطلع ورقه : كل الاسامي الي كتبت موجودين بالورقه مع الوقت الي راحوا فيه للحمام ورجعوا
اخذ منه الورقه
اوسم : سجن مركزي حشى مو مدرسه
اتجهه عيسى للصبوره وشطب على اسم نجاح واسم نوت
اشر بالقلم على مزنه : حسب كلامها انها ما تعرفها وهي بصف التاسع يعني اكبر من الضحيه بسنه
اشر بالقلم على الجادل : بينهم معرفه قديمه كون انها كانت معاها  بالصف السادس وحسب كلامها انه صداقتهم انتهت
اشر بالقلم على رسميه : بنفس المرحله وحسب كلامها بينها سلام وعليكم السلام يعني معرفه سطحيه
اوسم : وهل يا ترى كلامهم صحيح ولا لا
عيسى : الجادل الوحيده الي كانت خابفه بشكل اوفر
اديب : الي بينهم معرفه قديمه ؟
هز راسه ب اي : انت شعندك ؟
شبك اصابعه بيعض ونطق : مثل ما انتو عارفين انها انحجزت على ما ايي موعد الجلسه الثانيه واحتمال احاول اقدم يوم الجلسه المهم بالوقت الي صارت فيه الجريمه كانت بغرفة مادة الانجليزي عند معلمتها
عيسى : يعني هذا دليل يثبت انه بوقت الجريمه كانت بعيده عن مكان الحادثه بس شلون وصل السواره ؟
اديب : خلني اكمل لانه اهني راح تيي الصدمه من رحت لمعلمتها وسألتها انكرت انه وهج كانت معاها
ولي كان معاها معلمه مع طالبتها وتواصلت معاهم هم الاثنين وللاسف قالوا نفس الكلام انه وهج ما كانت موجوده ب هالوقت
اوسم : يعني ما زارتها ؟
اديب : زارتها بس حسب كلامها انه وهج من دخلت عليها بعد دقيقتين رن الجرس ينبهه عن انتهاء الحصه وبداية الفرصه
اوسم : اديب !! ترى هالشي كله ضد وهج انت مستوعب !
عيسى : فعلاً سوارها الي كان متعلق ب جاكيت الضحيه وعليه بصماتها وروحتها قبل الفرصه ب دقيقتين
اوسم : انزين ما سألتها عن السوار ؟
هز راسه ب اي : اكيد سألتها قالت انه حست فيه انه ضاع وهي بالبيت لانها كانت لابسه اكثر من سواره
عيسى : اديب يمديك تنسحب وتكتفي بدفاعك عن الضحيه
هز راسه بالنفي ونطق بحده : لا مستحيل انا للحيني متأكد انه وهج بريئه وغير جي انا شاك بالمديره ومساعدتها
اوسم : على طاري المديره وقت الجريمه هي ما كانت بالمدرسه
توسعت عيون اديب : شلون يعني والكلام وثقتها ب انه وهج هي القاتله والكتاب يبين من عنوانه !!!!
اوسم : كان في اجتماع ب مدرسة الجيل الجديد مع مديرة كل مدرسه عن الانشطه الي راح تكون بين المدارس وكانت المديره مع مساعدتها موجودين ب هذا الاجتماع
اديب : هل هذا كلام المديره ؟