حياة مزيفه

الحلقه 11

#حياة_مزيفه

#الحلقه_11

#للكاتبه_ژوژو_الطشهه

#لايك_قبل_ما_تقري_وتعليق_بعد_ما_تكملي🌸

صلن ع النبي جميلاتي 💕...

(الحللللقه هدي عبنها ليا تعليقات طواااال نبي نستمتع ونا نقرا فيهن 😍😍🤤💕🥺)

عند الاء طلعت من المربوعه بسرعه فتحت باب فيلتهم وطلعت منها للحديقه تتنفس بسرعه ودموعها ينزلن قعدت ع الكرسي متاع الحديقه وتبكي
سمعت صوت يقول :مرتاحه هكي ؟!
التفتت وانصدمت لقاته صهيب حاط ايديه في جيوبه ويشوفلها ب نظرة عميقه نظره هيا مجرد ما شافتها فهمتها نظرة عتاب وقهر والمخ ووجع وكره نظره فيها كل شي والله مرات نظرات بس يوحنله شن فيه في قلب الإنسان 🥺
الاء نزلت راسها ودموعها ينزلن
صهيب ضحك ب قهر :ليش تبكي مش مفروض تكوني اسعد انسانه مش اليوم خطوبتك ع ولد خالك
الاء بصوت قهر :اسس
صهيب مكمل يحكي : إن شاء الله غير يكون نفس مواصفات الي تبيهن وإن شاء الله غير يكون يحبك صح ومعاكي راجل
الاء كل كلمه تنزل ع قلبها زي السم :قتلك اسس
صهيب ولا ع باله :هههه بس أنا أول مره نعرف وحده اليوم خطوبتها وتبكي ليش تبكي مرات دموع الفرحه هههه
الاء كلامه يقهر فيه ناضت بصوت عالي :قتلكككك اسسسسس يعني تسكتتتتت ماعش تزيدها عليا بنموت كنت بنقهرك قهرت روحي 😭😭
خشت بسرعه تبكي
وصهيب أنصدم من كلامها وقعد يعاود يراجع فيه ما فهمش شن قصدها والي مستغرب منه أكثر ليش مقهوه وتبكي للدرجه هدي مش وافقت عليه ب إرادتها
طلع بسرعه متعصب ومصدوم وزادت تعقدت عنده القصه ....
********
عند عزو بعد ركب فوق لي شقه أول ما خش حس بي شعور ضيق بكل لعند راسه داخ ماحلاش يقعد دق الباب استغربت وناض فتح
رغد ابتسمت :اهلين
عزو ب استغراب :اهلين رغد
رغد ب ضحكه ونظره ع جنب عيونها قلوب :جبتلك عشاك قالولي مش متعشي 😍
عزو ضحك :منوره والله
خداه منها الصحن
رغد بي ابتسامه خبث :عادي نهدرز معاك شويا
عزو ابتسم :اكيد تفضلي
خشت معاه رغد وقعدت ع صالون الصاله :حلوه شقتك
عزو ابتسم : اها
رغد بصوت تجعوين :كولل مزال ساخن خير ما يبرد
عزو شافلها وضحك : شكراً والله بس ما عنديش نيه
رغد ب صوت تجعوين وترمش في عيونها :عشاني يا عزووو تردني
عزو حس بي شعور حلو وهوا يشوفلها كأنه اول مره يشوفها يشوف فيها انسانه ثانيه :حاضر
خش للمطبخ جاب كاشيك وبدا ياكل ورغد تتأمل فيه وبحب وفرحانه الي تبيه صار
عزو : سمحح بكل صحيتي
رغد ناضت وابتسمت :ولو عزو تبي اي شي كلمني واه سمعت بخصوص مراتك بصراحه افتكيت منها مفروض اطلقها ب سرعه لأنه الي زيها توقع ادير اي شي
عزو ب كره:اكيد ح نطلقها وشكراً مره ثانيه
رغد شافتله ب نظرة حلوه وضحك :هههه العفو
طلعت رغد بسرعه وهيا فرحانه وتشوف وراها وحمدت ربي إنه ما شافها حد بس للأسف من حظها في وحده شافتها وفتحت عيونها بصدمه وخشت تجري جوا بدون ما تحسس رغد إنه شافتها من في نظركن الوحده هدي ؟😱...
******
عند هبه وصلت لي حوش فاطمه دقت الباب فتحلها مراجع خشت لي فاطمه فاطمه أول ما شافتها حظنتها وقعدت تبكي وهبه تهدي فيها فاطمه حكتلها كل شي
هبه :يا روحي عليكي
فاطمه تبكي :نحبه يا هبه نحبه وربي ما نحسابش روحي نحبه هك حتا لما عمي قال نقدم قضيه ما قدرتش والله لأنه نحبه ما رضيتش ينحبس وجعني ب ضربه ليا والله الضرب ما حسيتاش حسيت ب قهر منه 😭😭
هبه :خزي حقير إن شاء الله مرض
فاطمه :لا ما تدعيش عليه بعيد السوء عليه 🥺
سمعن صوت عياط ناضن يجرن وانصدمن بالي سمعنه
فيصل بصوت عالي وصدمه :ك كككككييييف شن تقولوووووو انتم كييييف اختي كييييف 😭😭 انا نقوللكم اخطبوها ليا وتوا تطلع اختي في الرضاعه كيييييف
فاطمه تشوف لي هبه ومصدومه :م م من الي ا ا اختك في ال الرضاعه ؟
كلهم التفتو وشافولها بصدمه
فيصل دموعه ينزلن :مش مسامحك يا امي كنتي بديري جريمه كبيره ليش سااااااكته ليش ما قلتي من زمان لما نقولك نبيك تخطبيلي فاطمه تقوليلي اصبر شوي وتوا الفتره هدي مسكره راسك ع الزواج منها تقوليلي ما تناسبكش في النهايه تطلع اختي في الرضاعه حررررام ذنب كبير شلتيه 💔
فاطمه حطت يدها ع راسها بصدمه من الي سمعته
هبه مسكتها بخوف :فاطمه
فاطمه قعدت تبكي بصوت عالي وتعيط :ليشششششش بس ليشششششش كل يوم نعيشه اسوء من الي قبله يارب تعبت وربي تعبببببببتتتتت خلااااااااااااص لعند امتى هك ماعش نقدر نتحمل 😭😭😭كيف فيصل خويا في الرضاعه وكنتو بتزوجوه ليا كيف يا عميمه فيروز وين ماما ليش انتي الي مرضعتيني
فيروز تبكي بعبره :باتك يهدد فيا ما نخبر حد والله 😭😭 مش عارفه ليش ما يبيش يعرف كل الي قاله ليا كل ما يجيبك ليا إنه كان متزوج وامك جاباتك وماتت باتك كان برا ليبيا حوالي سنه ولما جابك ليا كان عندك شهرين ممكن وجانا وقال تزوجت ومراتي ماتت نحنا ما عندناش علم من تزوجها بعدها بفتره تزوج سناء كنت أنا نرضع فيك رافض إنه سناء ترضعك مش عارفه عليش لعند بعدين بعد كبرتي تعودتي ع الرضاعه وشوي شوي بدأ باتك هوا الي مهتم بيك 😭😭😭 وانا وقتها كان فيصل عمره 4 شهور نرضع فيكم مع بعض 😭😭 باتك قالي لو يعرف مراجع ح يقتلني مش عارفه ليش ما يبيش حد يعرف
فاطمه ماسكه هبه بقوه قريب تفقد توازنها خشت تجري للدار وهبه لاحقتها
مراجع قدم من فيروز بعصبيه بيضربها كف
فيصل جا يجري مسكه :لا ارجوك باتي 💔
فيروز شافت لي فيصل وتبكي بقهر :سامحني سامحني خليتك تحب اختك 😭😭 والله كنت ديما نلمحلك إنه ما تصلحوش لي بعضكم لاكن ما بيتوش تفهموني تحسابوني ما نحبش فاطمه فاطمه تعتبر بنيتي والله غاليه عليا لاكن مش في مصلحتي تعرفو موسى مش ساهل ولو قلت ح يضرنا كلنا بس اهو هوا الي حكاه السر
(طبعا يا بنات كيف عرفو اكيد تبن تعرفن صح ؟
دق الباب فتح فيصل وكان ساعي البريد مدله رساله مكتوب فيها
(انا موسى.. فاطمه اخت فيصل في الرضاعه ردبالك تخليهم يتزوجو يا مراجع فيروز من خوفها مرات ما نحكيش وتصير كارثه )
مهم فيصل استلمها وقراها طول وخش يعيط وهدا الي صار
الوقت الحالي
فيصل تنهد :مافيش داعي يا باتي أمي صح غلطت بس الغلط الكبير غلط عمي وخلاص الحمدالله الي عرفنا وفاطمه من اليوم اختي وربي يسامحني ع تفكيري فيها💔
فيروز خشت تجري لي دارها وتبكي
أما مراجع قعد مصدوم وفيصل طلع من الحوش مصدوم البنت الي يحبها طول عمره تطلع اخته في الرضاعه والطريقة الي عرفو بيها صادمه وهوا كان بيدير خطوه رسميه ويخطبها تخايلن حجم الكارثه الي كانت ح تصير 😱...
أما عند فاطمه في دارها
فاطمه تبكي وهبه حاضنتها تهدي فيها :يارب والله مش معترضه ع قضائك بس الي يصير معايا صعب صعب ماعش عندي صبر نتحمل
هبه تبكي معاها :اهدي يا عمري ما صار شي خلاص فيصل توا يرد لي عقله خلاص هوا مسكين شفتيه كيف منهار مش عارف شي الحمدالله الي عرفتو بدري
كملت فاطمه الليله هدي وهبه تهدي فيها وروحت متأخر بكللل...
*******
عند الاء بعد خشت تجري جوا خشت طول لي دارها دارت دوش وغيرت دبشها وخشت سريرها تغطت طول
خشت عليها ويه بنت خالتها
ويه ب استغراب وخوف :الاء كنك راقده مريضه
الاء :لالا بس تعبانه ويه بنرقد
ويه بخوف :الاء شن صاير معاكي كيف ترقدي مزال بدري بنات العيله قاعدات وقبل بنسهرو توا كلهن يستغربن
الاء ب تعب وحزن :ويه خليني ع راحتي والله بنرقد الي تسأل عليا قوليلها رقدت تعبانه
ويه :بس ح تحكيلي صح
الاء هزت راسها
طلعت ويه وطفت الضي وهيا خايفه عليها ...
*******
عند إبراهيم خو عزو يحكي مع فهد ولد عمه طبعاً شباب العيله كلهم عرفت عليهم وقلت فهد خاطب بنت خالته وإبراهيم برضو خاطب مهم فهد وإبراهيم صحبه بكل بكل
ابراهيم ضحك :تم ما عندكش مشكله نديرو الفرح مع بعضنا
فهد :الي عندي تزن تبيع نهاية السنه عشان تكمل قرايتها
إبراهيم ضحك :تلقاها تزن تزن عشان تكمل قرايتها بعدها تتزوج في النهايه تعزق الشهاده في الحوش
فهد ضحك :لا بس الي عندي شاطره متاع قرايه
إبراهيم :اعانك الله
فهد :اي عزو خوك كنه مش ع بعضه اليومين اهنا
إبراهيم تنهد :مش عارف والله حتا انا لاحظت بس عزو اقرب شي لاه مراد وصهيب هما الي يحككيلهم كل شي
فهد :يلا ربي يهونها عليه
إبراهيم رن تيلفونه وكانت خطيبته
ناض ورد عليها
خطيبته :حبيبي
إبراهيم ابتسم :اهلين شن جوك
ورد خطيبتهه :تمام شن أجواء الفرح
إبراهيم :لعند الآن جو تمام بس اقارب شوي يعني أقارب جدي وهك لأنه الفرح الاسبوع الجاي
ورد ابتسمت :ربي يهنيهم
إبراهيم :عقبالنا 💞
ورد ابتسمت :يارب حبيبي 💞
وكملو يحكو
أما عند فهد يحكي مع خطيبته
فهد :صفاء سكري ع الموضوع توا
صفاء بعصبية:حبيبي انت عارف هدين شروطي من لما تعرفنا ع بعضنا نتخرج بعدها نتزوجو مزال ع التخرج 4 شهور بس
فهد :صفاء ماعش نتحمل لنا سنه رآه خاطبين وبعدين أنا ح ندعمك واقري عندي شن فيها
صفاء ضحكت :خليني نفكر حبيبي ماتلعبش عليا بكلامك السمح
فهد ابتسم :نحبك يا فرخه
صفاء بحب :نموت فيك 💞💞💞
***
وانا نحبكن 😂 عموماً نبي نتعمق في الشخصيات من حلقة اليوم يعني عيلة الحاج محمود ما تعمقتش واجد فيهم ح نتعمق 💞💞..
*****
عند سلوى وبنتها في حوشهم
رغد بفرح:الباين إني عجبته يا ماما كان يشوفلي ومبتسم 😍
سلوى بفرحه :اهو شغلنا بدا يجيب نتيجه خليه يطلق المصيبه الي كان متزوجها بعدها كان ما تزوجك توا تشوفي😈
تسنيم تشوفلهن ب قهر وقالت في سرها "لا يفلح الساحر حيث أتى 💔"
""""""""""""
عند فدوى وراجلها يوسف
يوسف ابتسم:طالعه تخيلي
فدوى ابتسمت بدلع :حبيبي ربي يخليك ليا
يوسف ضحك :وين كلام سمح غريبه
فدوى ضحكت :حرام عليك ...حبيبي بنسألك
يوسف :شنو
فدوى :عزو خوك صح بيطلقها مراته
يوسف :اي سمعت هك ليش تسأل
فدوى :اممم بس البنت باين عليها كويسه خوك شكله ما يعجبه عجب... اممم بس تعرف شكلها دايره حاجه كبيره
يوسف بعصبية :لييييله وحده خاطري يمشي يومنا زي الناس بدون ما تجيبي سيرة الناس شن دخلك بيهم هما يعرفو سكري ع السيره
خش للحمام وسيبها
فدوى بعصبية :اننننن 😒😒 إلا ما نعرف ...
*****
عند صهيب قاعد في داره
دق الباب انفتح وكانت امه
صهيب ابتسم : نبع الحنان
حليمه ابتسمت :وليدي جبتلك كباية عصير روق بيها روحك واخطا التفكير
صهيب تنهد : إن شاء الله
حليمه ابتسمت :كان نصيبك فيها والله ما واخدها غيرك
صهيب ابتسم ب قهر :ماعش ينفع خلاص
حليمه :ربي يرزقك ب بنيت الحلال الي تسر خاطرك وليدي انت تستاهل كل خير
صهيب :ربي يخليك ليا امي رقديني ع كرعيك زي زمان ♥️
حليمه ابتسمت وجت قعدت ع السرير وصهيب رقد ع كرعيها وهيا تمسحله في راسه وتدعيله من كل قلبها ربي يهون ع قلبه 🥺♥️