لقيت الامان بحضنه

الجزء الرابع ..

حامد كان وايد متضايق بسبب الي صار و في وايد اسأله تدور ف باله و خالد كان يفكر كيف يحل الموضوع بدون ما يزعل مهره اخته 
حامد : اقولك خلود
خالد : هلا ؟
حامد : تتوقع منو هالبنت و كيف رقمها تسجل بتلفوني 
خالد : احس ان احمد ورا السالفه مادري ليش بس ها الي احسه 
و فجأه قاطعهم صوت بنت ( البنت هاذي تقرب لهم بنت عمهم ) و اسمها دانه 
دانه بصراخ من بعيد : حامد خالد حامد 
حامد و خالد فزوا من مكانهم 
حامد : شو فيج مهاري فيها شيء ؟؟
خالد : شو فيج بنت العم ؟؟
دانه : مهاري تبا حامد و قاعده تصيح و مب راضيه تسكت 
حامد رفع كندورته و ركض اما خالد تم واقف مكانه يكلم دانه 
خالد : دانه عادي تعطيني شوي من وقتج 
دانه : هيه اكيد شو تبا ؟
خالد : الصراحه انا ابا اعترف لج بشي 
دانه بحيا : قول 
خالد : دانه انا احبج و اباج ام لعيالي 
دانه : ................صمت
خالد : شو فيج ساكته ؟
دانه و هي مستحيه و منزله راسها ع الارض : انا بروح اجوف مهاري 
خالد مسكها من ايدها : حامد عند مهاري لا تروحين 
دانه : خلود عادي تهدني ؟
خالد ح على نفسه و هدها : وين بتروحين 
دانه : بروح غرفتي 
خالد : تمام 
عند حامد و مهره 
حامد : مهاري والله العظيم ما اعرفها ولا تعرفني 
مهره : هيه صح ما تعرفها و رقمها مسجل بتلفونك 
حامد : ماعرفها والله صدقيني 
مهره : صح صح ما تعرفها 
حامد : مهاري اباج تساعديني ابا اعرف كيف رقمها تسجل بتلفوني و منو هالبنت 
مهره : يعني انته ما تعرفها ؟؟
حامد : والله العظيم ما اعرفها 
مهره : انزين بصدقك بس بشرط ؟
حامد : انا موافق شو شرطج 
مهره : خل تلفونك عندي هالفتره لان لو دقت انا ابا ارد عليها 
 حامد : فديت الي يغارون انااا ... بس تم هاذوه تلفوني عندج 
مهره بحيا : حامد انا بنام 
حامد : تصبحين على خير 
مهره : و انته من اهل الخير 
عند احمد ف المستشفى 
الدكتور : يا احمد الاصابات الي فيك بليغه و مبين ان في حد ضاربنك 
احمد بصراخ : انته ممكن تعالجني و انته ساكت 
الدكتور : تبا تبلغ الشرطه ؟
احمد : الف مره قلت لك لا و ما يخصك 
الدكتور : بس يا احمد 
دخل هزاع ف هاللحظه 
هزاع : السلام عليكم 
الدكتور : عليكم السلام 
هزاع : مب لازم يبلغ الشرطه ولا شيء هو غلطان و كل انسان لازم يتعلم من اغلاطه و اتمنى ان الاخ احمد يكون اتعلم من غلطه 
احمد : انته واقف وياهم ؟؟
هزاع : هيه لان انت ما تستاهل حد يوقف وياك 
احمد : هزاع يعني انا شو اسوي عشان مهره تحبني 
هزاع : مهره تحب حامد ف مستحيل تحبك و مب عشان تخليها تحبك تقوم تهددها بصورها 
احمد : الصراحه انا ما ندمت ع الي سويته 
هزاع عصب و طلع 
و اليوم الثاني احمد طلع من المستشفى احمد و هو راد البيت 
احمد : الووو
شخص : هلا 
احمد : شو الاخبار ؟
شخص : زينه و سويت الي انته تبا و تمت المهمه و جنه شبت نار بين حامد و مهره 
احمد : كفو كفو المهم بكلمك عقب يوم بوصل البيت في حد عندي 
طبعا احمد كان يكلم البنت الي دقت حق حامد و ما حب يكلمها بصيغه بنت لان هزاع عنده 
وصل البيت احمد و لقى حامد و مهره قاعدين جنب بعض و يسولفون و يضحكون طلع و هو معصب 
احمد : ع اساس سويتي الي انا اباه ؟؟
البنت : سويت انزين دقيت لحامد و مهره زعلت منه 
احمد : ردي دقي الحينن 
البنت : تمام 
رن تلفون حامد مهره ردت لان التلفون عندها 
مهره : الوو 
البنت : زين انج رديتي 
مهره : شو تبين ؟
البنت : مهره بقولج شيء اباج تساعديني 
مهره : قولي 
البنت : انا الي امس دقيت حق حامد 
مهره : و تراج تاليوم داقه لحامد بعد 
البنت : ادري بس اسمعيني للاخر 
مهره : قولي اسمعج 
البنت : انا اسمي الحقيقي مب حصه اسمي مها 
مهره قامت من مكانها راحت تتكلم مكان بعيد عشان محد يسمع و حامد راح وياها 
مهره : كملي 
البنت : اول شيء رقمي تسجل بتلفون حامد و احمد الي سجله 
مهره : انزين ؟
البنت : احمد يهددني بصوري و لو ما سويت الاشياء الي هو يباها بينشر صوري 
مهره اتعاطفت معاها : انزين كيف نقدر نساعدج ؟
البنت : الحين ردوا داخل سوو نفسكم متضاربين لا تكلمون بعض و بتكونون ساعدتوني 
مهره : دقيقه دقيقه بنسوي الي تبينه بس بسألج ؟
البنت : اسـألي ؟
مهره : تقـدريـن تصورين المحادثات الي احمد يهـددج فيهم ؟
البنت :هـيه
مهره : بطرش لج رقمي و صوري المحادثات و طرشيهم لي و انا بساعدج و الحين انا و حامد بندش داخل بنسوي عمرنا متضاربين 
البنت : تمام و مشكوره وايد 
مهره : العفو 
مهره طرشت الرقم للبنت و البنت طرشت الصور لمهره و مهره قالت لحامد السالفه و ردوا داخل سوو نفسهم متضاربين 
مهره راحت غرفتها و خالد راح وراها و عبير ودانه و نوف و ميره راحوا معاها و مهره قالت لهم السالفه كلها و كلهم كانوا متعاطفين مع البنت و يفكرون كيف يحلون المشكله 
خالد : انا بسير اضربه و خلاص انتهى الموضوع 
البنات كلهم بصوت واحد : خالد لاا 
خالد : بسير بضربه 
دانه : خلود لا تضربه بتكبر المشكله و ما تدري شو يمكن يسوي ف البنت 
خالد ذاب لما شاف دانه تكلمه : تمامم 
قعدوا يفكرون و يفكرون و اخر شيء مهره قررت تبلغ عليه الشرطه بالرغم من انه ولد عنها لكن بتبلغ عليه لانه ما يستحي على ويهه قليل ادب 
و كلهم وافقوا ع راي مهره و قالوا للعايله كلها و ام احمد كانت موافقه ان يبلغون عليه عشان يتأدب و ما يرد يهدد بنات الناس لان مها ما كانت اول بنت يهددها كان في قبلها وايد 
و طلعوا كلهم من غرفه مهره و صار انتشار كل واحد راح مكان اما بالنسبه لهزاع ف من طلع من غرفه مهره كان مصدوم من الي احمد يسويه مب عرف وين يروح كان متلته لان احمد هو اقرب واحد لهزاع ف راح هزاع للحديقه و قعد بروحه شافته نوف و راحت صوبه 
نوف : هزاعع 
هزاع : هلا ؟
نوف : شو فيك ؟
هزاع : والله مادري شو اقولج يا نوف احس الدنيا مب شالتني مصدوم 
نوف : هزاع انته ما كنت تدري ان جي سوالفه صح ؟
هزاع : ما كنت ادري ما تشوفيني اقولج مصدوم من الي صار 
نوف : تمامم 
هزاع : انتي شو يايبنج هنيه 
نوف : من طلعت من غرفه مهاري شفتك مب عارف وين تروح ف تميت وراك 
هزاع : تطمنين علي يعني 
نوف : هيه تقدر تقول 
هزاع : انزين احبج 
نوف : ها بس لاني اتطمنت عليك 
هزاع : لا صدق صدق انا احبج 
نوف : من متى 
هزاع : من زمانن 
نوف استحت و تمت ساكته 
هزاع : يلا روحي نامي مبين عليج تعبانه 
نوف : و انته ما بتنام ؟
هزاع : ما اضن اني بقدر انام 
نوف : ما بروح 
هزاع : ليش ؟
نوف : كيف تباني انام و اخليك هنيه ؟
هزاع : نوف انتي تحبيني  
نوف : و لو قلت لك لا بتصدق ؟
هزاع : لا طبعا ما بصدق 
نوف : شو الي يخليك ما تصدق ؟
هزاع : لما نكون قاعدين عند الاهل نظراتج ما تشلينها عني و لما كلهم يسولفون ما تهتمين بس لما انا اقول سالفه تركزين و لما يسولفون و اييبون طاريي تيلسين تسمعين 
نوف : تعرف كل هاذا وياي تسألني اذا احبك او لا 
هزاع : بس ابا اتأكد اباج تقولينها ابا اسمع كلمه احبك بصوتج 
نوف : يلا يلا تعال ندش داخل و روح نام 
هزاع : ما بنام اذا ما قلتي لي احبك 
نوف قربت من اذن هزاع : احبك 
و ركضت نوف داخل و هزاع حس بفرحه ما تنوصف و راح نام و كلهم ناموا 

.............................................................................................................................................. 
تتوقون شو بيصير ف احمد ؟
شو المصيبه اليديده الي تنتظرهم ؟
و هل تتوقعون في اشخاص بيحاولون يخربون علاقه حامد و مهره ؟
و اهلهم كيف بيعرفون عن حب مهره و حامد ؟ هل الطريقه بتكون غريبه و صادمه ؟ ولا حامد هو الي بيقول لهم ؟
و هل بيعصبون لو عرفوا ؟