الفصل الخامس عشر
ملوك :- يا شيخه إسكتي إنتي قادرة تقفي على رجلك بطلي أكل الأول و بعدين كلميني
ملك بصت ليهم و كلهم ضحكوا عليهم و قامت وقفت مره واحده و قالت:-
ماشي يا ملوك مهو الغلط مش عليكي الغلط على اللي بيمليكي الكلام
مسكتها من إديها بقوة و قالت:-
أنا هعرف أربيكي من أول و جديد عشان تبقي بعد كدا تحترمي الأكبر منك
ملوك بتذمر:-
يا ملك هي اللي كانت بتضربني من غير سبب و تقعد تقولي إنتي شكل الضفدع إرسميه يلا ، و تشد في شعري عشان تشوفه حقيقي وإلا لا روحت قولت لـ منال و هي اللي قالت ليا أعمل كدا
كلهم بصوا لـ منال و منال ضحكت بتوتر و قالت:-
إية أسبها تضايق البت و أقعد أتفرج ، لا لازم تتعلم تأخد حقها بإديها
ملك سابت ملوك و طلعت على أوضيتها و ملوك بصت عليها بالبراءة و بصت على مالك اللي بصلها جامد فتجمعت الدموع في عنيها
مالك راح ورا ملك و دخل الاوضة لقاها قاعدة على السرير بتهز رجليها و بتعيط
قعد جنبها و حضنها و قالت:-
لسة صغيرة يا ملك بكره تكبر و تعرف
ملك بصتله و قالت:-
إنت مصدق كلامك دا يا مالك ؟ إنتوا لية مش قادرين تفهموا إنها بنتي و إني عوزاها أحسن الناس ، يا مالك ملوك دلوقتي في مرحلة الإعداد لو سبناها سايبة كدا هتفضل كدا علطول ، مش بقول متدلعش لا تدلع لكن متتعتملش بالطريقة دي البت بتقول كلام أكبر من سنها
مالك باس على رأسها و قال:-
أنا فاهم قصدك لكن إنتي عارفة ملوك طالعة ليكي ، شوية و هتلاقيها جاية تصالحك
ملك بزهق :-
أنا مش عاوزة اتصالح ولا زفت ، أنا عاوزة بنتي تتربي صح ، مش كل حاجه تجري على حد يقولها تعمل إية و هي زي البغبغان بتردد وراه
مالك ضحك و قال:-
يعني إنتي زعلانة عشان هي بغبغاء
ملك نفخت بضيق و قالت:-
لا مش عشان بغبغاء علشان الطفل على حسب ما بتربية ، لو ربيته إنه يحترم الأكبر منه غصب عنه هيحترمه ، لو ربيته إنه يكون جرئ و يعمل أي حاجة هيفضل كدا ، ملوك ماشية ورا منال بتعمل كل حاجه هي بتقولها عليها بالحرف و دا يخلي تصرفات و كلام ملوك أكبر من سنها
مالك زفر بضيق و قال:-
يبقي الغلط دلوقتي على منال يا ملك
ملك بصت ليه جامد و مالك كمل :-
أيوة الغلط عليها لأن هي اللي بتحفظها الكلام و بتقولها تعمل إية ، بدل ما تقول ليها عيب و غلط لا بتقول ليها تأخد حقها إزاي
ملك عيطت و قالت:-
أنا قصرت معاها أوي يا مالك ، أنا أم فاشلة
مالك حضنها جامد و قال:-
متقوليش كدا يا ملك إنتي أعظم أم في الدنيا
ملك لسة هتتكلم ملوك كانت واقفة قدامهم و بتعيط
ملك بصت ليها و ديرت وشها الناحية التانية فملوك عيطت و قالت:-
أنا آسفة يا مامي مش هعمل كدا تاني
ملك :- كُل مرة أسمع الكلمتين دول و برضوا اللي في دماغ منال بتعملية
ملوك :- وعد آخر مره مش هعمل كدا تاني
ملك مسكتها من كتفها و قالت:-
مش هتعملي كدا تاني ، و مش هتسمعي كلام حد غيري مفهوم
ملوك هزت رأسها بايجاب و قالت:-
مفهوم
ملك بصت لـ مالك و قالت بغل :-
أما بقي المس بنت *** دي انا هطلع عينها عشان تبقي تشتم عليكي و تشدك من شعرك تاني
مالك إنفجر في الضحك و هز رأسه بالنفي و قال:-
مفيش فايده هتفضلي زي ما إنتي بنت منال ، و مستغربه البت كدا ليه نامي يا ملك ربنا يهديكي يا حبيبتي
ملك بصت ليه بتبريقة:-
إية إنت شايفني بشد في شعري وإلا اية ما تنقي كلامك يا مالك
ملوك هزت رأسها و قالت:-
اه يا ماما و البت اللي كانت قاعدة قدام مكتبه مكنتش راضية تدخلني و كانت هتضربني كمان
ملك زقت ملوك من قدامها و قامت وقفت و قالت بصوت عالي:-
إية كانت عاوزة تضربك ؟
ملوك بحزن مصطنع:-
وقالت عليا مش متربية
ملك برقت و قالت:-
كمان ؟ بصت لـ مالك و قالت:-
ورحمت أمك يا مالك لهكون مطلعة عليها قرف الحمل إزاي تقول على بنتي كدا و تسيبها
مالك بتوتر بص لـ ملوك و قال:-
شعلتيها يا بنت ملك و إرتاحتي قلبتي الترابيزة لصالحك ، هقول إية تربية منال مغطية عليكي
ملك حطت ايديها في وسطها و قالت:-
و مالها يخويا تربية منال لا إصحي كله إلا منال خط أحمر كدا
مالك بسخرية:- ملهاش يختي هتودينا في داهية كُلنا
ملك برقت و قالت:-
كدا يا مالك ؟ طيب
راحت فتحت الدولاب و خرجت منه بطانية و إتحركت ناحية السرير
مالك باصص عليها و قال:-
إنتي بتعملي إية هتغضبي زي العيال الصغيرة
ملك مسكت المخده و حطتها في إيد ملوك و حطت الغطا في إيد مالك و قال:-
بره إنت و بنتك من الأوضة إياك أشوف حد فيكم هنا لمده أسبوع
ملك بتذمر:-
الله أنا مليش دعوة يا ملك هو اللي غلط مش أنا ، سبيني أنام معاكي و هو ينام في الصالة جنب وليد هو كدا كدا منه هتكرشة زي كل يوم
ملك برقت ليها و قالت:-
يلا على أوتك متخرجيش منها غير الصبح
ملوك خرجت و هي بتدب في الأرض و مالك بص ليها بإبتسامة و قال :- إنتي أكيد بتهزري معايا يا ملك صح ؟
ملك مسكته من إيده و خرجته من الباب و قفلت الباب وراها و قالت:-
عشان تبقي تغلط في تربية منال أوي يخويا ، اهي تربية منال هنتيمك متشرد أسبوع
مشيت خطوتين و وقفت و قالت:-
لازم يطلعوا أسوء ما فيا ، قولت بلاش منال تدخل في الموضوع محدش سمع كلامي
