صدف

5

#صدف
بقلمي : زينب أمير (5)

دقيقه انا الزول ده شوفتو وين لكن؟! ي ربي قعدت افكر وافكر فجأة كده صرخت،،،.

فلاش باك..
بتذكر كانت معانا حبوبه ( ام امي) عندها ضرس عايز قلع المهم امي قالت لي قومي امشي معاها وفعلا لبست أقرب عبايه وجاا ابوي ساقناا بالعربيه،،، اهاا وصلنا وبقينا قاعدين منتظرين دورناا قعدنا قريب الساعتين والجو مسخن شديد م باقي لي غير ابكي والله لمن عيوني دمعوا حبوبه قالت ل ابوي البت دايره تبكي م متعوده ع السخانه بت راحات وكده وقعدوا يضحكوا،، انتظرنا شويه تاني اتمنيت بس لو كنت جبت معاي تلفوني كان شغلني شويه،، آها شويه كده تاني قالو لينا دوركم جاا وفعلا دخلنا كان شاب كده مديني ضهرو رفع رأسو قال عايز الكرت اديتو ليهو وتااني قال لينا مرافق واحد للمريض قمت طلعت انا انتظرتهم بره في النهايه  ناس ابوي جو ومشينا...

#بيحكي قال..
ح تسألوني شفتها وين وكيف ح اقول ليكم لا شفتها مره ولا مرتين ودائما كنا بنلتقي صدفه بس م عارف اذا هي شافتني قبلي كده ولا لأ او حتى لو شافتني هل هي متزكراني؟؟! ...

يوم كنت قاعد في العياده شغال من الصباح والعصر كان باقي ليهو نص ساعه تعبت وبقيت م قادر اشوف زاتو من التعب،،، استأذنت خمسه دقائق اشرب فيها قهوه واصحصح شويه يوميتها الكهرباء كان في جزء منها فاصل،، كنت ماشي في الممر لمن شوفتها ودي م كانت أول مره اشوفهااا كانت ماسكه ليها ورقه في يدها وبتهبهب بيهاا شكلها خلاص فاض بيهاا وتشيل وتصرصر في وشها ضحكت عليها ومشيت،،، بس م فارقتني نهائي،، جيت راجع المكتب وقعدت شويه كده كان عندي ورقه قبلت اجيبها التفتا ع صوت زول بفتح في الباب لمن قبلت لقيتهااا هي تقدروا تتخيلوا كميه الفرحه الدخلت فيني اليوم داك بس ي فرحه م تمت كان لازم واحد فيهم يطلع،،، ابوها التفت عليها وقال ي لجين انتظري بره،،، لجين؟؟ يعني هي اسمها لجين! لي سته شهور بصادف وبلقاها بس ياداب،، ياداب عرفت اسمهاا !! طلعت وبالي كلو معاهاا،، خلصت وكنت عايز اطلع معاهم اصلا هم كانوا تقريبا آخر ناس وخلاص بشيل في حاجاني تلفوني ضرب اضطريت ارد ع المكالمه بقيت ماسك التلفون بيد وبرتب في حاجاتي ب يد وللأسف اتأخرت شديد ولمن طلعت لقيتها ماف كأنها اتبخرت في الهوا...

نرجع..
يعني طلع ده هو زاتو نفس الشخص اللاقيتو في العياده... بفكر وبفكر لقيت روحي نمت...
الصباح قاعدين نتونس مع بعض ابوي قال لي آها قلتي شنو ي بتي سكت م رديت أحمد قال لي لو خجلانه مننا كلمي امي وهي بتكلمنا عمر قال ليهو خجلانه؟ لا يعني أسي هي بتعرف الخجل وقعد يضحك هو ولمياء،، امي قالت لي آها ي بتي قلتي شنو اتنفست بصعوبه وقلت ليها بصوت واطي نتعرف اول اكيد اكيد ابوي م سمعني علشان سأل امي قال شنو لحدي م امي كلمتوو قال لي م مشكله من حقك تتعرفي عليهو اول،، في النهايه انتي الح تعيشي معاهو وده في النهايه زواج ولا كيف؟ امي قالت ليهو فعلا فعلا،، آها تمينا باقي ونستنا ديك وبعدها ابوي قام للشغل وعمر قام ع جامعتو ( طبعا ابوي عندو مصانع زيت وكده يعني حالتنا الماديه كويسه الحمدلله ) أحمد شغال في المستشفى اشعهه دي كانت رغبتو وابوي م جبرو بالعكس شجعوو،،،

اليوم كلو قاعده افكر فيهو ابتسمت وقلت بصوت واطي كده رامز! لمياء قاعده جنبي لكزتني وشغاله تغمز لي قالت لي قلتي شنو قلت ليها اتلهي بالله بس وين ياه لسه مع تشغيلاتها غصبا عني ضحكت قلت ليها غايتو انتي!...المساء كده قاعدين في صينيه الغدا ابوي قال لي بكره ان شاء رامز ح يجينا يشرب معانا شاي المغرب ومنها تتعرفوا ع بعض قلت ليهو حاضر،، سرحت كده وقلت متين بس يجي علشان اعرف شافني وين هو ولو طلع يوم العياده معقول بس كده طوالي من اول مره كده دايرني؟؟

يتبع....