عيناكِ منظومة تحتوي قصائدها

البارت٣١ والاخير

عند ريم وفراس ..
جالسه على السرير بتعب ..
دخل فراس بابتسامه: ليه للحين مو مبدله فستانك؟
ريم: تعبت قلت اجلس شوي والحين قايمه ابدل
وقف قدامها وسحبها من يدها عشان تصير قدامه: خليك شوي لا تبدلين!
ريم: ليه؟
حط يده على خصرها: بشوفك بهالكشخه!ما شفتك كويس!
بعدت ولفت بفستانها: شرايك فيني؟
ابتسم على حركتها بحب: تاخذين العقل!
وقفت لفلفه وسكتت، سحبها لحضنه وحضنها بقوه واندفن وجهه بشعرها، تنهد براحه وهو يشم ريحتها العذبه والناعمه، بادلته الحضن بحب وراحه...

صباح يوم جديد ..
عند رائد واديم .. فتحت عيونها وشافته ماسك يدها ونايم جنبها، شدت على ايده وتلمست وجهه وشعره وهي تتامله وتتامل ملامحه الي كانت جداً حلوه وملفته، ابتسمت وحمدت ربها عليه وعلى وجوده بحياتها..
حس بوجودها وحس انها قباله وتتلمس وجهه، ابتسم وهو مسكر عيونه وسحبها لحضنه بسرعه ..
ضحكت: يا كذاب ما كنت نايم!
باسها من رقبتها بخفه وسريع: لا خفت افتح عيوني وما تكوني جنبي فكرت اني بحلم وانك مو جنبي!
حطت يدها بين شعره من ورا: خلاص فتح عيونك انا جنبك ومعك حقيقي مو حلم!
رائد: متاكده ما رح تروحي اول ما افتح؟
ضحكت بخفه: متاكده متاكده!
فتح عيونه وتاملها بدون ولا كلمه..
ابتسمت له وارتمت بحضنه: يلا قوم مو قلت لي مجهز مفاجاة؟
رائد: اي صح قومي ما معنا وقت!
اديم: طيب قول لي وش هي؟؟وما معنا وقت لشنو؟
وقف: بتروش ونفطر بعده اقولك!
رجعت انسدحت على السرير: افف! تمام بنام لين تخلص!
رائد: قومي ما معنا وقت!
اديم: تمام تمام
جلست على السرير وراح يتروش ...
طلع ولبس تيشرت الثوب وبنطاله بدون الثوب، وقف وانحنى جنبها وكانت مسكره عيونها وشبه غافيه، باسها وتكى جنب السرير ..
ابتسمت: ما كنت نايمه!
رائد: يمه منك رديتيها بسرعه! قومي تروشي وانا بطلب اكل!
ابتسمت: تمام

فبيت ابو زيد ..
طلع ماجد للصاله وجنبه سلمى الي كانت بالعبايه والنقاب ..
ابو زيد: ان شاء الله خير؟ وين من الصباح؟
ماجد: للمستشفى
ام زيد: ليه؟ سلمى فيك شي حبيبتي؟
سلمى: لا يامي بس عندي مراجعه!
الكل: على خير ان شاء الله
ماجد: ان شاء الله يلا عن اذنكم
طلعو متوجهين للمستشفى ، دخلت وفحصتها الدكتوره وقالت لها انه البيبي كثير صغير ولازم تعتني بصحتها الغذائيه اكثر لحتى يصير احسن ..

الظهريات ..
عند رائد واديم .. جالسين على الكنب وحاطه راسها على صدره وماسكين ايادي بعض..
اديم: رائد!
رائد: امريني يا عين رائد؟
ابتسمت: يلا قول لي وين بنطلع العصر؟
رائد: طيب بقولك بس فكري شوي!
اديم: لمح لي؟!
رائد: امم مكان خاطرك تروحين له!
اديم: الاسطبل؟
رائد: لا!
اديم: اممم اهلي؟
رائد: برضو لا! امس كنتي عندهم
اديم بحيره: يوهه خلاص قول لي!
رائد: فكري شوي!
باسته وكانها تستطعفه: قولي يخي
رائد بابتسامه: عرفت انك تحبين فرنسا ومن وانتي صغيره بخاطرك تروحين لها
فزت اديم بحماس: لا تقولها!!
ضحك على فزتها: وشو؟؟
اديم: بنروح لفرنسا؟
هز راسه بابتسامه: اي!
حضنته بحماس وبدت تبوسه بوسه ورا بوسه وهو الابتسامه شاقه وجهه على فرحتها وحركاتها ..
تكلم بابتسامه: والله الواضح انك فرحتي لهالسفره اكثر من لما جيت اطلبك!
اديم: لا شدعوه بس تحمست منجد بخاطري اروح لها!
رائد: الله يخليك لي وبحقق كل الاشياء الي خاطرك فيها وعد مني!
ابتسمت بحب: حبيب خاطري انت! بس ما قلت لي شدراك اني ابي اسافر لفرنسا من وانا صغيره؟
رائد: يعني ما بكذب نقدر نقول استعنا بصديق!
اديم: ومن هو؟
رائد: كلمت ريم تسال فراس وش اكثر شي حابه تسويه واكثر مكان حابه تزوريه وقال لها انه بخاطرك تروحين لفرنسا وقالت لي وانا حجزت تذاكر اليوم بعد العصر!
اديم: فراس يخي!
باسها على راسها: يلا قومي نجهز الشنط ما معنا وقت؟
قامت بحماس وجلسو يرتبو الشنط والاشياء الي بياخذوها..
بعد العصر..
طلعو متوجهين لاهلهم سلمو عليهم وطلعو للمطار ركبو الطياره وتوجهو لفرنسا ..
قضو هناك شهر كامل ورجعو للديره ولبيتهم ..

بعد 4 سنوات مرت على ابطالنا ...
احمد وريوف تزوجو واخيرا وصار عندهم ولد سموه عبد الله ، سلمى وماجد عندهم بنت عمرها 4 سنوات وبنت عمرها سنتين " جود وجوري" ريم وفراس كملو حبهم وكل يوم يقوى اكثر وصار عندهم سعاد الي عمرها ثلاث سنوات وطلعو لبيت لوحدهم طلب من فراس ، سمر وتركي قررو يستقرو بالمدينه مع بنتهم ريناد وولدهم محمد، زايد مرت عليه 4 سنوات ولا غيرته، كرس حياته لامه وابوه وعيال اخوانه فقط، رائد واديم الي كان حبهم كل يوم يزيد ولا يقل صار عندهم توأم اولاد عمرهم ثلاث سنوات وشوي سموهم " معاذ ومروان" ، وعلى روتينهم الاعتيادي كملو ابطالنا حياتهم السعيده والمليانه حب وفرحه وكل منهم مكتفي بشريك حياته وعياله ..

بنهايه الروايه ..
ام زيد، ام خالد المعنى الحقيقي للام، الام القويه، الصبوره، الحنونه، الي ما ترضى الحزن والزعل لعيالها، الام الي تتحمل اي شي لاجل عيالها ..
ابو زيد، ابو خالد جسدو معنى الاب الحقيقي القوي الصبور القاسي والحنون الاب الي ما يرضى الخطا على عياله، الاب الي يعطي القوه لعياله ويستمد قوته منهم، يقسى عليهم لاجل سعادتهم وحبا فيهم ولهم،
الله يخلي اهلكم ويرحم الاموات منهم🤍..

شخصيه فراس علمتنا ما نوثق باحد، ما نعطي قيمه كبيره لناس ما تستاهلنا، علمتنا نتخطى وما نوقف حياتنا على حساب شخص ولا نبني سعادتنا على وجوده..
ساره، علي شخصيات علمونا ما نوثق بالنوعيه الي نفسهم وبالاحرى ما نعطي قلوبنا لكل من جا ولا نعامل احد نفسهم بالاخير بنندم على اخطائنا ..
زايد علمنا انه الحب الاول الحقيقي ما يجي بعده اذا كان من القلب وصادق ولا يقدر احد ياخذ مكانه بسهوله، واخطائه تعلمنا ما نسكت عن حقنا ونبرر للي نحبه غصب وباي طريقه حتى لو ما كان راضي يسمعنا ..
ماجد الشخص الصلب الصدوق الحنون، كل الصفات الحلوه تجتمع بهالانسان صدق، حب، حنان، ثقه، قوه، تملك، شجاعه، ماجد علمنا انه العقل ماله اي علاقه بالعمر ومن الممكن يكون عمرك صغير وعقلك اكبر واوعى ، سلمى الانسانه الي مهما قلنا ما نوفيها حقها الانسانه الي ضحت بكل شي لاجل حبها ما فكرت بشي سوا انها تكون مع الشخص الي تحبه وتبي حياتها معه والاهم انه هالشخص يستاهل ..
اديم علمتنا نكمل حياتنا ونعطي فرصه لقلبنا وللاشخاص الي يحبونا وما نوقف حياتنا وننهي كل شي متعلق بالحب لاجل خطا واحد ، من الممكن العوض قدامنا ينتظر منا فرصه وحده
رائد الشخصيه الي اذا حبت تحارب لاجل حبها، ما طفش ولا ترك حبه رغم رفض اديم الكثير، حاول لين نال الي يبيه وما يأس ابداً من محاولاته،
مازن، ريفان، زيد، اريج، مريم، خالد والكل تركو اثر حلو فينا وكملو حياتهم طبيعي مع عيالهم ..
اخر شي .. بيت ابو خالد ، ابو زيد البيت الي يعلمنا انه عمار البيوت اهلها، وقفتهم جنب بعض وسندهم لبعض بكل مَرة ومُرة، بكل فرح وحزن البيت الي علمنا معنى الاخوه والحب والصداقه ..

واخر شي ..
اتمنى قراءه ممتعه لكم مليئه بالحب ..
شكراً لكل شخص اعطى روايتي شوي من وقته لقراءتها، كلمه شكراً ما توفي حقكم،
شاركوني بهاشتاق #عيناكِ_منظومه_تحتوي_قصائدها
على تويتر وتيك توك مع كلامكم ورايكم عنها🤍🤍..
وانتظروني بروايه جديده بالسنه الجديده
حسابات الكاتبه، تويتر+ سناب :kholod25m
انستا: _kholod25
اللهم لك الحمد تم ختم اول روايه لي بعد ما اخذت مني قرابه 3 اشهر 🤍.
بدايه كتابتي للروايه : 5/9
النهايه: 13/12

" النهايه "