اخواتي
١٧
في المطعم
يوسف قاعد مع زينه بيتكلمو ووصل الاكل
زينه : انا كنت شاكه أن ورا العزومه دي حاجه. هتتجوز عليا أمتي. قول سمعاك . بس لعلمك انا مش مسامحاك قلبي وصوابع ايدي غضبانين عليك يا يوسف وكمان هروح اشتكي لامك ولاهلك نفر نفر
يوسف : شششش. أيه اتسدي شويه. وبعدين هي اسمها امك . انتي مش هتتعلمي تكوني رقيقه. هتفضلي دبش كده. انا جبتلك سيره اني هتجوز. انا لسه بقول عايزك في حوار. هو في واحد يرمي نفسه في التهلكه مرتين
زينه : انا عارفه الرجاله ملهمش امان ، الاستاذه مني حلمي في فيلم ولاد العم جوزها قالها تعالي افسحك وفي الاخر خدها تل أبيب .. مخرجني ودلوقتي بتقولي عايزك في حوار. اعترف وقول الحقيقه
يوسف اتعصب : اتصدقي انا الغلطان عشان خرجتك . انتي عندك حق . انا متجوز ثلاثه وكمان اسمي الحقيقه دانيال. عايزه ايه تاني
زينه : ياتي عسليه وانت معصب كدا . كلك علي بعضك حلو .. بحب اعصبك ووشك يحمر . فاكر اما كنا في المعسكر كنت تقولي انزلي اعملي ١٠٠ ضغط وتنصب عليا وتخليهم ٢٠٠ كنت بطلع عيني . بس دلوقتي بقيت انا اللي بطلع عينك بنتقم من اللي كنت بتعمله فيا
يوسف : اقسم بالله انتي رخمه . يلا نمشي انا قفلت خلاص ومليش نفس اكل
زينه : خلاص بقي يا يوسف . متبقاش شرير. كنت برخم عليك زي كل مره . قولي كنت عايزني في ايه
يوسف : عندي مؤمريه شغل ولازم اسافر .
زينه : بتهزر انت عايز تسافر وتسبني لوحدي . لا هعيط والله ، مش مصدقه نفسي
يوسف :اهدي بس يا حبي. ، هتعيطي ليه ؟
زينه : هعيط من الفرحه يا بني ، هيكون ليه يعني . سبلي عشره الف عشان اصرف ولو هتقعد اكتر من اسبوعين هات الفيزا
يوسف : بقي كدا يعني مش مضايقه وله زعلانه. انا اللي كنت فاكر هتزعلي وصرفت نص المرتب في الخروجه قولت اهيئك نفسيا ، يارتني ما كنت أكلتك.
زينه: يجي ايه المطعم ده جمب اختراعاتي في المطبخ . انا عليا صينيه سوليفيان إنما ايه. روعه
يوسف : اما تعرفي تنطقي الاكل الاول ابقي اتكلمي. يلا قومي انتي وش فقر
في البيت . زينه دخلت ليوسف : هو انت لو سافرت هتقعد قد ايه وهتكون فين . وهتسافر مع مين
يوسف. : يمكن شهر او اكتر . هسافر مع زين والفريق . هكون في سيناء
زينه : خلي حد تاني يسافر مكانك . انا مش عايزاك تسافر.
يوسف : ليه عشان ترخمي عليا وله تعلي ضغطي
زينه : لا عشان بحبك واول مره هتبعد عني. وكمان خايفه عليك من السفر . انا بس مردتش اقولك الحقيقه
أنت تقرأ
تؤامي المجنون ( أخواتي قنبله ذريه)مكتمله
Humorقررت تنتحل شخصيه اخوها بعد ما سافر وراحت علي الكليه مكانه. هيحصل ايه تابعو هتعرف🤫🙆
