The Beauty From The South「တောင်ပိုင်းက အလှလေး」||Completed||

1 - နတ်ဆိုးဘုရင်လာပြီ။ မသေချင်ရင် ရှောင်ကြ၊ ရှားကြ။

Original Author - Approximately
Translated by - Starry

တရုတ်ပြည် Republican ကာလ၊ သူလျှိုတိုက်ပွဲ

ကြိုတင်သတိပေးချက် : ဗီလိန်က နည်းနည်းကြမ်းတမ်းပြီး ကာရိုက်တာတွေက နည်းနည်းထူးဆန်းတဲ့ဘက် ပါတယ်။ စိတ်ရှည်ရှည်ထားပေးရမယ့်အရာလေးတွေရှိပြီး စိတ်လှုပ်ရှားရမယ့်အရာတွေ ပါပါတယ်။

ဒီဇာတ်လမ်းထဲမှ တချို့ဇာတ်လမ်းအနေအထားတွေက ရုပ်ရှင်တွေ၊ ဒရာမာတွေဖြစ်တဲ့ [风声(Sound of the Wind)] နဲ့ [伪装者(The Pretender)] ထဲကနေ Inspire ယူထားတာပါ။

လက်ဖက်စိမ်း ဇာတ်လမ်းအနည်းငယ်ပါပြီး သွေးထွက်သံယိုခန်းများ ပါပါတယ်။

*

"မင်းကို ကြည့်လိုက်တိုင်းမှာ တောင်တန်းနဲ့ မြစ်ချောင်းတွေဟာ ဝေးကွာသွားခဲ့တယ်"

________

မတ်လရဲ့ အစောပိုင်း နွေဦးရာသီအချိန်မို့ အနည်းငယ် အေးစက်စက် ရှိနေတုန်းပဲ။ မိုးဆက်တိုက် ရွာထားတာမို့ မြေပြင်ဟာ စိုစွတ်နေတယ်။ လမ်းပေါ်က လေထုနဲ့ လမ်းကြားတွေမှာ ရေခိုးရေမှုန်တွေ ရှိနေပြီး လက်ကို မြှောက်လိုက်ရုံနဲ့ တိမ်တွေကို ဖမ်းဆုပ်နိုင်တော့မလားလို့ ထင်ရတယ်။

လမ်းကြားလေးထဲ ဖြတ်လျှောက်သွားတဲ့အခါ မျက်နှာဝါဝါ၊ ပိန်ပါးပါးနဲ့ သတင်းစာရောင်းတဲ့ကောင်လေးကို တွေ့လိုက်ရတယ်။ သတင်းစာရောင်းတဲ့ကောင်လေးဟာ စုတ်ချာနေတဲ့ အဝတ်အစားကို ဝတ်ထားပြီး နာကျင်နေတဲ့မျက်နှာပေးနဲ့ သူ့ဗိုက်ကို ဖိကိုင်ထားတယ်။ သူ တနေ့လုံးမှ ပေါက်စီတခြမ်းပဲ စားထားရသေးတယ်။ ညခင်းဟာ ချမ်းအေးနေဆဲပေမဲ့ အနည်းငယ်သော ကြေးပြားကို သူ မသုံးရဲဘူး။ လက်ထဲမှာ မရောင်းရသေးတဲ့ သတင်းစာတွေ တထပ်ကြီး ကျန်နေသေးတယ်။ ကြည့်ရတာ ဒီညတော့ သူ ထမင်းမစားရတော့ဘူးထင်တယ်။

သူ ခေါင်းငုံ့လို့ ရှေ့ကို ဆက်လျှောက်သွားတယ်။ ရုတ်တရက် သူ့ရှေ့မှာ တစုံတယောက်က ပိတ်ရပ်သွားတာမို့ မော့ကြည့်လိုက်တဲ့အခါ ကုတ်အရှည်ကြီးဝတ်ထားတဲ့လူတယောက်ကို တွေ့လိုက်ရတယ်။ ထိုလူက လက်ထဲမှာ ထီးတချောင်း ကိုင်ထားတယ်။ အဲ့ဒီလူဟာ အသက် ၂၈၊ ၂၉ ဝန်းကျင်လောက် ရှိပုံရပြီး အရမ်းကို ညင်သာတဲ့ မျက်နှာနဲ့အတူ ကြည့်ကောင်းချောမောတဲ့ မျက်နှာအစိတ်အပိုင်းတွေ ရှိတယ်။ သူ့အသံကအစ အရမ်းကို နားထောင်ကောင်းတယ်။ သူက ညင်သာတဲ့လေသံလေးနဲ့ မေးတယ်။