قصه منقوله
محمد صاحب البوست ده اتوفى من ساعات وسبحان من هداه إنه يحكي موقف حصل ليه لنصيحة فرقت معاه .. والبوست انتشر بشكل كبير ما شاء الله من وقتها وناس كتير تتأثر بيه علشان ربنا يرزقه ثوابهم بصدق نيته في النصيحة ..
*كفى بالموت واعظًا ..*
البوست ..👇🏻
يوم التلات الي فات الموافق ٧ / ٦ / ٢٠٢٢ حصل معايا موقف أتمنى إنه يكون علامة ليا ولكم..
كنت بمتحن رسم هندسى وهندسة وصفية ومدة الامتحان ٤ ساعات متواصلة، والحمدلله ربنا جبر بخاطري وحليت كويس..
المهم خرجت من الكلية وروحت موقف العربيات عشان اروح البيت، وأول ما وصلت كانت في عربية بتحمل ومرضتش أركب فيها وقولت أركب الي بعدها..
ركبت العربية الي بعدها في الكرسي الاخير، وجه قعد جنبي رجل وزوجتة واتحركت العربية..
انا للأسف متعود دايما إني اسمع أغاني وانا في العربية وبقول من باب إنها بتكون مُسلية وبتهون عليا الطريق..
ولسه هخرج الهاند فري وأبدأ أسمع اغاني، لقيت الرجل الي جنبي شغل سورة البقرة وحقيقي سورة البقرة قريبة أوي أوي لقلبي، فطبعاً شلت الهاند فري وبقيت مُستمع لسورة البقرة وبدأت أردد مع التلاوة لاني حافظ منها جزء كبير..
وكان كل شوية الرجل يوقف القرآن ويفسر لي آيه ويقولي بص ربنا بيقول إيه لبني إسرائيل وهم بيقولوا إيه لربنا، انت شايف التمرد والتشدد على عدم الطاعة..
ولأكتر من ٤٥ دقيقة وأحنا على الحال ده، وانا مستمتع ومبسوط أوي، فهو قالي أنا شايفك بتردد مع السورة ماشاءالله عليك وفضل يدعيلي كتير، فأنا قولتله والله حضرتك انا كنت هشغل أغاني والحمدلله انك كنت سبب إني أستمع واردد القرآن..
فمسك ايدي وداس عليها جامد وقالي أسأل الله الثبات لك والهداية، ونصيحة لك يا حبيبي زاحم أي شئ بالقرآن وانت حياتك هتتغير ١٨٠ درجة، قالي عايز تبطل سماع أغاني أسمع قرآن بتلاوة عذبة وحقيقي قلبك هيتعلق به وهيبقى صاحب عمرك..
وقبل ما ينزل أداني ازازة مسك صغيرة كده وقالي عشان كل ما تشوفها تفتكرني..
وفضل يدعيلي كتير اوي..
فأنا بإذن الله من النهاردة عقدت النية إني مش هسمع أغاني تاني وهزاحم حياتي بالقرآن وأسأل الله إنه يكون خير صديق لي..
فإدعوا لي بالثبات والهداية 🙏
ونصيحة لكم يا شباب انا حالياً اهوه ليا ٥ أيام بعيد بُعد تام على سماع الأغاني وبسمع قرآن حتى ولو دقيقة في اليوم، حياتي بقت أفضل وعندي يقين إن ربنا سبحانه وتعالى هيرضى عني ويكرمني اكتر لأني تركت شئ بيغضبة ..
ربنا يرحمك يا محمد ويسكنك فسيح جناته ويجعل صدق نيتك في نصيحة شاركتنا بيها صدقة جارية ليك وعمل يشفع ليك عند لقائه
لا تنسوه من دعائكم .. واذكروني فى دعائكم ..
